ક્રાઈમ / પતિ-પત્નીના ઝઘડામાં ખૂની ખેલ, કુહાડીના ઘા ઝીંકી પત્નીની કરી હત્યા, આરોપી પતિ જેલના સળિયા પાછળ

દાહોદ જિલ્લાના સિંગવડ તાલુકાના તારમી ગામે પતિ-પત્ની વચ્ચેના ઝઘડામાં એક મહિલાએ જીવ ગુમાવ્યો છે. મળતી માહિતી મુજબ, તારમી ગામના નિશાળ ફળિયામાં રહેતા રવિન્દ્રભાઈ ભાવસિંગભાઈ માલીવાડ અને તેમની 30 વર્ષીય પત્ની શંકુલાબેન વચ્ચે કોઈ કારણોસર ઝઘડો થયો હતો. આ દરમિયાન ઉશ્કેરાયેલા પતિએ લોખંડની કુહાડી વડે પત્નીના માથાના ભાગે હુમલો કર્યો હતો.

કુહાડીના ઘા વાગતાં શંકુલાબેન ગંભીર રીતે ઘાયલ થયાં હતાં. બનાવ બાદ તેમને તાત્કાલિક સારવાર માટે દાહોદની ઝાયડસ હોસ્પિટલ ખાતે લઈ જવામાં આવ્યાં હતાં. જોકે, માથાના ભાગે ગંભીર ઇજાઓ થતાં સારવાર દરમિયાન તેમનું મોત નીપજ્યું હતું. ઘરેલુ ઝઘડામાં બનેલી આ ઘટનાએ સ્થાનિક વિસ્તારમાં ચકચાર મચાવી છે.

આ સમગ્ર મામલે ઇટાડી ગામના નિશાળ ફળિયામાં રહેતા રામસિંગભાઈ હરજીભાઈ તાવિયાડ દ્વારા રંધીકપુર પોલીસ મથકે ફરિયાદ નોંધાવવામાં આવી હતી. ફરિયાદના આધારે પોલીસે આરોપી પતિ રવિન્દ્રભાઈ માલીવાડ વિરુદ્ધ હત્યાનો ગુનો નોંધી કાયદેસરની કાર્યવાહી હાથ ધરી છે. ઘટનાના ચોક્કસ કારણો અને અન્ય પાસાં અંગે પોલીસ દ્વારા વધુ તપાસ કરવામાં આવી રહી છે.

આ પણ વાંચોઃ સરકારે ત્રણ-ચાર જિલ્લાને લોલીપોપ આપી છે, ખેડૂતોની ચિંતા હોય તો સાચો સર્વે કરાવવો જોઈએઃ કિરીટ પટેલ

હાલમાં રંધીકપુર પોલીસ સમગ્ર બનાવની તપાસ કરી રહી છે. પતિ-પત્ની વચ્ચે કયા કારણોસર ઝઘડો થયો હતો અને હત્યાની ઘટના કેવી રીતે બની તે સહિતના મુદ્દાઓની તપાસ હાથ ધરવામાં આવી છે. ઘરેલુ વિવાદમાં હિંસક હુમલો થતાં એક મહિલાનું મોત નીપજવાની આ ઘટનાએ પંથકમાં અરેરાટી ફેલાવી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ