ગાંધીનગર / દિલ્હી બેઠક બાદ CM ભૂપેન્દ્ર પટેલના કડક વલણની ચર્ચા, ગુજરાતના અમલદારો પર જવાબદારીનો બોજ વધવાના સંકેત!

અમદાવાદ: મુખ્યપ્રધાન ભૂપેન્દ્ર પટેલની તાજેતરમાં દિલ્હી ખાતે વડા પ્રધાન નરેન્દ્ર મોદી સાથે થયેલી બેઠકના પગલે રાજ્યના અમલદારશાહીમાં અનેક અટકળો શરૂ થઈ છે. બંને વચ્ચે બંધબારણે એકાંતમાં થયેલી આ બેઠકની વિગતો જાહેર કરવામાં આવી નથી, જોકે મુખ્યપ્રધાન વધુ સક્રિય અને પરિણામલક્ષી અભિગમ સાથે પરત ફર્યા હોવાની ચર્ચાએ અમલદારશાહીમાં જવાબદારી અને કામગીરી અંગે કડક વલણ અપનાવવાની શક્યતા અંગે ચર્ચા જગાવી છે. વરિષ્ઠ અધિકારીઓના મતે આ ઘટનાક્રમ અમલદારશાહીમાં જવાબદારી નક્કી કરવાની પ્રક્રિયા વધુ કડક થવાના સંકેત સમાન હોઈ શકે છે. બે આઈએએસ અધિકારીઓ સામે તાજેતરમાં ફરજિયાત નિવૃત્તિની કાર્યવાહી કરવામાં આવી હતી. આવી કાર્યવાહી આગળ પણ ચાલુ રહી શકે તેવી ચર્ચા છે. આથી રાજ્યભરના અમલદારો સરકારી ગતિવિધિઓ પર બારીકાઈથી નજર રાખી રહ્યા છે અને સરકાર તરફથી આગળ શું સંકેત મળે છે તેની રાહ જોઈ રહ્યા છે.

જયંતી રવિનો વિદેશ પ્રવાસ મુલતવી

અમદાવાદ: ગુજરાત સરકારના સચિવાલયમાં ઊર્જા પ્રધાન ઋષિકેશ પટેલ અને મહેસૂલ વિભાગનાં અધિક મુખ્ય સચિવ જયંતી રવિની આગેવાની હેઠળનો વાઈબ્રન્ટ ગુજરાત ગ્લોબલ સમિટનો પ્રચાર પ્રવાસ રદ થયાની અટકળો વહેતી થઈ હતી. ડેનમાર્ક, ફિનલેન્ડ અને ‌િસ્વડનના પ્રવાસને લઈને ચાલી રહેલી આ ચર્ચા વચ્ચે અધિકારીઓએ સ્પષ્ટતા કરી છે કે પ્રવાસ રદ થયો નથી, પરંતુ મુલતવી રાખવામાં આવ્યો છે. સૂત્રોના જણાવ્યા અનુસાર વડા પ્રધાન નરેન્દ્ર મોદીનો ૩૦ અને ૩૧ ઓક્ટોબરે એકતાનગર તથા ઉત્તર ગુજરાતનો નિર્ધારિત પ્રવાસ હોવાથી આ ફેરફાર કરવામાં આવ્યો છે. આંતરરાષ્ટ્રીય સ્તરે રોકાણ અને ઉદ્યોગોને આકર્ષવા માટેની આ પહેલનો કાર્યક્રમ વડા પ્રધાનના પ્રવાસ બાદ ફરી ગોઠવવામાં આવશે. અધિકારીઓના જણાવ્યા અનુસાર જયંતી રવિને વડા પ્રધાનના પ્રવાસ બાદ કાર્યક્રમ ફરી નક્કી કરવા જણાવાયું છે. આંતરરાષ્ટ્રીય સંપર્કો અને રોકાણલક્ષી પ્રયાસો ચાલુ રહેશે.

વડોદરા કલેક્ટરની બદલીની ચર્ચા તેજ

અમદાવાદ: ગુજરાત હાઈકોર્ટે વડોદરાના કલેક્ટર અનિલ ધામેલિયાની કામગીરી અંગે કરેલી આકરી ટિપ્પણીઓ બાદ વહીવટી વર્તુળોમાં તેમની બદલીની ચર્ચાએ જોર પકડ્યું છે. વધતી અટકળો વચ્ચે સામાન્ય વહીવટ વિભાગના અધિક મુખ્ય સચિવ અનુજ શર્માનું નામ પણ સંભવિત બદલીના સંદર્ભમાં ચર્ચાઈ રહ્યું છે. સૂત્રોના જણાવ્યા અનુસાર વાઈબ્રન્ટ ગુજરાત ગ્લોબલ સમિટના પ્રચાર પ્રવાસ બાદ અનુજ શર્માને ગાંધીનગરમાં કોઈ વિભાગની જવાબદારી સોંપવામાં આવે તેવી શક્યતા છે, જોકે આ અંગે સત્તાવાર જાહેરાત થઈ નથી. હાઈકોર્ટની ટિપ્પણીઓના પગલે સરકાર ધામેલિયાની કામગીરી અંગે વિભાગીય તપાસ શરૂ કરે તેવી પણ શક્યતા વ્યક્ત થઈ રહી છે. બિનખેતી જમીનના રૂપાંતરણને લગતા એક કેસમાં ગુજરાત મહેસૂલ ટ્રિબ્યુનલ સમક્ષ ન્યાયિક અધિકારી અંગે કરેલી ટિપ્પણી બદલ હાઈકોર્ટે તેમની બિનશરતી માફી સ્વીકારવાનો ઈનકાર કર્યો હતો. સૂત્રોના જણાવ્યા અનુસાર જિલ્લામાં કેટલાક જૂના વિવાદાસ્પદ મુદ્દાઓના સંચાલનને લઈને પણ અધિકારી સામે કડક કાર્યવાહી થઈ શકે છે.

ખેડૂતો માટે એઆઈ સેવા લાવશે કૃષિ વિભાગ

ગાંધીનગર: ગુજરાતનો કૃષિ વિભાગ ખેડૂતો અને પશુપાલકો માટે આર્ટિફિશિયલ ઈન્ટેલિજન્સ (એઆઈ) આધારિત સેવાઓ શરૂ કરવાની તૈયારી કરી રહ્યો છે. કૃષિ અને સહકાર વિભાગના અગ્ર સચિવ આર. સી. મીણાએ વિભાગની પ્રથમ આર્ટિફિશિયલ ઈન્ટેલિજન્સ આધારિત પહેલનો પ્રસ્તાવ રજૂ કર્યો છે. આ પહેલ હેઠળ ખેડૂતો અને પશુપાલકોને ટેક્નોલોજીની મદદથી વધુ અસરકારક સેવાઓ પૂરી પાડવાનું આયોજન છે. પ્રસ્તાવિત યોજનાઓનો અમલ ટૂંક સમયમાં શરૂ થવાની શક્યતા છે. વિભાગના મોટા ભાગના અધિકારીઓ તરફથી આ વિચારને સકારાત્મક પ્રતિસાદ મળ્યો હોવાનું કહેવાય છે, જોકે કેટલાક અધિકારીઓએ યોજનાને વધુ મજબૂત બનાવવા માટે સુધારા સૂચવ્યા છે. ગુજરાતમાં ૨૦૨૭ની વિધાનસભા ચૂંટણી નજીક આવી રહી છે ત્યારે આ મહત્ત્વાકાંક્ષી પ્રસ્તાવને સંપૂર્ણ કાર્યરત સેવા તરીકે અમલમાં મૂકવો અને સમયસર તેનો અમલ સુનિશ્ચિત કરવો મીણા માટે મોટો પડકાર બની રહેશે.

પ્રધાનમંડળમાં ફેરબદલની અટકળો

ગાંધીનગર: ગુજરાતમાં ૨૦૨૭ની વિધાનસભા ચૂંટણી નજીક આવતાં મુખ્યપ્રધાન ભૂપેન્દ્ર પટેલના પ્રધાનમંડળમાં ફેરબદલ થવાની અટકળોએ જોર પકડ્યું છે. જાન્યુઆરીમાં યોજાનારી વાઈબ્રન્ટ ગુજરાત ગ્લોબલ સમિટ બાદ ટૂંક સમયમાં પ્રધાનમંડળમાં ફેરફાર થઈ શકે છે તેવી ચર્ચા રાજકીય અને વહીવટી વર્તુળોમાં ચાલી રહી છે. સૂત્રોના જણાવ્યા અનુસાર પ્રધાનમંડળમાંથી પાંચથી છ પ્રધાનોને પડતા મૂકીને નવા ચહેરાઓને સ્થાન આપવામાં આવે તેવી શક્યતા છે. આ ફેરફારમાં રાજકીય સમીકરણો મહત્ત્વની ભૂમિકા ભજવી શકે છે. આ ઉપરાંત વિવિધ બોર્ડ અને નિગમોમાં નિમણૂકોની પ્રક્રિયા પણ લાંબા સમયથી બાકી છે. ગુજરાત ભાજપના પ્રદેશ પ્રમુખ જગદીશ વિશ્વકર્માની ટીમમાં ફેરફાર અંગે પણ ચર્ચા ચાલી રહી છે. આ તમામ સંભવિત ફેરફારોને આગામી ચૂંટણી પહેલાં પક્ષમાં વ્યાપક રાજકીય અને સંગઠનાત્મક પુનર્ગઠનના સંકેત તરીકે જોવામાં આવી રહ્યા છે.

નર્મદાનાં પાણીની ફાળવણીમાં સાવચેતી

ગાંધીનગર: નર્મદા કેનાલ નેટવર્ક મારફતે સિંચાઈ માટે વધુ પાણી ફાળવવાની માગ વચ્ચે સરદાર સરોવર નર્મદા નિગમ લિમિટેડના ચેરમેન અને મેનેજિંગ ડિરેક્ટર મૂકેશ પુરીએ પાણીની ફાળવણીમાં સાવચેતી અને સંતુલન જાળવવાનો અભિગમ અપનાવ્યો છે. ભાજપના સાંસદો, ધારાસભ્યો અને અન્ય આગેવાનો તરફથી વિવિધ વિસ્તારો માટે વધારાનાં પાણીની માગ સતત થઈ રહી છે, જોકે કેટલાક વિસ્તારોમાં વરસાદની અછત અને પાણીની વધતી જરૂરિયાતને ધ્યાનમાં રાખીને દરેક માગ સ્વીકારવી શક્ય નથી અને હંમેશાં યોગ્ય પણ નથી તેમ પુરીએ જણાવ્યું છે. ગયા અઠવાડિયે યોજાયેલી કેબિનેટ બેઠક દરમિયાન પ્રધાનોએ પોતાના વિસ્તારો માટે વધુ પાણી ફાળવવાની માગ કરી હતી. મુખ્યપ્રધાન ભૂપેન્દ્ર પટેલે શરૂઆતમાં સિંચાઈ માટે વધુ પાણી આપવાની દિશામાં વિચારણા કરી હતી, જોકે ત્યાર બાદ પુરીએ પાણીની ઉપલબ્ધતા અને મર્યાદાઓ અંગેનું મૂલ્યાંકન રજૂ કર્યું હતું. તેમણે પીવાના પાણીની જરૂરિયાતને પ્રાથમિકતા આપવાની સાથે સંભવિત અછતને પહોંચી વળવા આકસ્મિક આયોજન તૈયાર રાખવાની જરૂરિયાત પર ભાર મૂક્યો હતો. પાણીના મુદ્દે લોકપ્રિયતાલક્ષી દબાણના બદલે ઉપલબ્ધ સંસાધનોના સંતુલિત સંચાલન પર તેમના વલણને વહીવટી વર્તુળોમાં પ્રશંસા મળી રહી છે.

આ પણ વાંચોઃ દેવભૂમિ દ્વારકા, કચ્છ, પોરબંદર અને જામનગર દુષ્કાળગ્રસ્ત જાહેર, ખેડૂતોને હેક્ટરદીઠ ચૂકવાશે આટલા રૂપિયાની સહાય

પીએચડીના થિસિસનો પ્રચાર ચર્ચામાં

ગાંધીનગર: એક આઈપીએસ અધિકારી દ્વારા પત્નીના પીએચડીના સંશોધન પર આધારિત પુસ્તકને પ્રોત્સાહન આપવાના પ્રયાસે વહીવટી વર્તુળોમાં ચર્ચા જગાવી છે. સૂત્રોના જણાવ્યા અનુસાર પુસ્તકની નકલો વરિષ્ઠ ગૃહ વિભાગના અધિકારીઓને આપવામાં આવી રહી છે. અધિકારીઓને પુસ્તક ખરીદવા માટે પ્રોત્સાહિત કરવામાં આવતા હોવાની પણ ચર્ચા છે. આ ઘટનાના પગલે સવાલ ઊભો થયો છે કે આ પુસ્તકનો પ્રચાર ખરેખર શૈક્ષણિક સંશોધનને પ્રોત્સાહન આપવાનો પ્રયાસ છે કે પછી સરકારી હોદ્દાની અસરથી પુસ્તકનો વ્યાપ વધારવાની પહેલ છે. પીએચડીના સંશોધનને તેના શૈક્ષણિક મૂલ્યના આધારે માન્યતા મળી શકે છે, જોકે વરિષ્ઠ અધિકારી દ્વારા પુસ્તકના પ્રચારમાં સક્રિય ભૂમિકા ભજવવામાં આવે ત્યારે વ્યક્તિગત પ્રશંસા અને ફરજિયાત સમર્થન વચ્ચેની રેખા ઝાંખી થતી હોવાની ચિંતા કેટલાક નિરીક્ષકોએ વ્યક્ત કરી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ