તેજી / ક્રિપ્ટોકરન્સી માર્કેટમાં ભારે ઉથલપાથલ બાદ મળી રાહત, Binance Coin સહિત જુઓ શેમાં શેમાં જોરદાર ઉછાળો

• ક્રિપ્ટોકરન્સી માર્કેટમાં ફરી જોવા મળી તેજી 
• ગ્લોબલ માર્કેટનાં ભાવમાં જોવા મળ્યો ઉછાળો 
• ચીને લગાવેલ પ્રતિબંધ બાદ ડાઉન હતું માર્કેટ

સતત બીજા દિવસે ક્રિપ્ટોકરન્સી માર્કેટમાં તેજી જોવા મળી રહી છે. ચીનના ક્રિપ્ટોકરન્સી પર લગાવવામાં આવેલ પ્રતિબંધ બાદ આખા માર્કેટમાં મોટી ઉથલપાથલ મચી ગઈ હતી. સતત ડાઉન ચાલી રહેલા માર્કેટમાં હવે ફરીથી તેજી નોંધાઈ રહી છે. 

ગુરુવારે ગ્લોબલ ક્રિપ્ટોકરન્સી માર્કેટમાં 3.69 ટકાનો વધારો નોંધાયો હતો જે બાદ માર્કેટ 1.9 ટ્રિલિયન ડોલર પર ટ્રેડ કરી રહ્યો છે. ટોટલ ક્રિપ્ટોકરન્સી માર્કેટ છેલ્લા 24 જ કલાકમાં 91.84 બિલિયન ડોલર સુધી પહોંચી ગયું છે જેમા 0.07 ટકાનો ઘટાડો સામે આવ્યો છે. 

બિટકોઇનમાં સવારે વધારે તેજી જોવા મળી હતી જોકે બાદમાં આ તેજી નહીવત જેટલી રહી ગઈ છે. બિટકોઇનમાં 0.09 ટકાની મામૂલી તેજી જોવા મળી છે જે બાદ માર્કેટ પ્રાઇસ હાલમાં 33.5 લાખ રૂપિયા સુધી પહોંચી ગઈ છે. ગયા મહિને બિટકોઇનમાં જોરદાર તેજી જોવા મળી હતી અને રેકોર્ડબ્રેક કમાણી બાદ પ્રાઇસમાં જોરદાર કડાકો થયો હતો. જે બાદ આખું ક્રિપ્ટોકરન્સી માર્કેટ કડડભૂસ થઈ ગયું હતું. 

સૌથી મોટી વાત કહી શકાય કે Binance Coinમાં 11.27 ટકાનો જોરદાર ઉછાળો જોવા મળ્યો છે અને તે 29,500 રૂપિયા પર વેચાઈ રહ્યો છે. Tetherમાં 0.25નો કડાકો જ્યારે Polkadotમાં 5.20 ટકાની તેજી નોંધાઈ છે. 

Ether ક્રિપ્ટોકરન્સીમાં પણ આજે સારી એવી તેજી જોવા મળી રહી છે, આજે Ether 2,31,780 રૂપિયા પર વેચાઈ રહ્યો છે અને 3.01  ટકાની તેજી જોવા મળી રહી છે. આ સિવાય XRPમાં પણ 4.82 ટકા અને Cardanoમાં 2.68 ટકાનો વધારો નોંધાયો હતો.