- ભોપાલના જાવેદખાને પત્નીના ઘરેણા વેચ્યાં
- ઓટોને મિનિ એમ્બ્યુલન્સ બનાવી
- મિનિ એમ્બ્યુલન્સમાં કોરોનાના દર્દીઓની સેવા શરુ કરી
- પોલીસે ધારા 144 ના ભંગ હેઠળ કેસ દાખલ કર્યો
- પાછળથી જાવેદખાનની સેવાની જાણ થતા કેસ પાછો ખેંચ્યો
પહેલા તો ભોપાલ પોલીસે જાવેદખાનની સામે કેસ દાખલ કરી દીધો પરંતુ પાછળથી પોલીસે પાછો ખેંચી લીધો હતો. જાવેદખાને પત્નીના ઘરેણા વેચીને પોતાની ઓટોને મિનિ એમ્બ્યુલન્સમાં ફેરવી નાખી હતી.
જાવેદખાન આ મિનિ એમ્બ્યુલન્સમાં દર્દીઓને હોસ્પિટલમાંથી ઘેર અને ઘેરથી હોસ્પિટલ લઈ જતો હતો. તેના આ કામની ચારેબાજુ પ્રશંસા થવા લાગી હતી. પરંતુ શનિવારે જ્યારે જાવેદખાન પોતાની આ ઓટો લઈને જઈ રહ્યો હતો ત્યારે ભોપાલના છોલા પોલીસના જવાનોએ તેની ઓટોને અટકાવી હતી. જાવેદખાને પોલીસને વિનંતી કરી હતી કે કોવિડ ડ્યુટીમાં છે તેમ છતાં પણ પોલીસે તેની વાત ન સાંભળી.
પોલીસે મારી વાત ન સાંભળી, કેસ દાખલ કરી દીધો-જાવેદખાન
જાવેદખાને જણાવ્યું કે મેં પોલીસને જણાવ્યું કે આ મારી મિની એમ્બ્યુલન્સ છે અને તેમાં દર્દીઓને લઈ જવાનું કામ કરુ છું. મારી ઓટોમાં કોરોનાના દર્દીઓની મદદ માટ ઓક્સિજન સિલિન્ડરની પણ વ્યવસ્થા છે. તેમ છતાં પણ પોલીસે મને વઢવાનું શરુ કર્યું. મેં આ ઘટનાનો વીડિયો પણ શુટ કર્યું. પોલીસે મારી સામે કેસ પણ દાખલ કરી દીધો. પરંતુ સોશિયલ મીડિયા પર ટીકા થતા ભોપાલ પોલીસે કેસ પાછો ખેંચી લીધો.
ભોપાલ દક્ષિણ પોલીસ અધિક્ષક વિજય ખત્રીએ જણાવ્યું કે ભોપાલમાં સંપૂર્ણ લોકડાઉન છે. વાહનોની અવરજવર પર પ્રતિબંધ છે. પોલીસે જાવેદને પૂછ્યું હતું પરંતુ તેણે તેના ઉદ્દેશ અંગે કંઈ ન જણાવ્યું અને બેરિકેડ હટાવવા લાગ્યો હતો. તેથી પોલીસે ધારા 144 નો ભંગ કરીને કેસ દાખલ કર્યો હતો. જોકે પાછળથી અમને તેની આ સેવાની જાણ થતા કેસ પાછો ખેંચવાની કાર્યવાહી હાથ ધરી હતી.
