ગંભીર / ભારત માટે ફરી આવ્યા ચિંતાજનક સમાચાર, આ નવા કોરોનાના પ્રકારની એન્ટ્રી

• કોરોના મુદ્દે દેશ માટે ગંભીર સમાચાર 
• ભારતમાં વધુ બે વેરિયન્ટની એન્ટ્રી નોંધાઈ 
• દક્ષિણ આફ્રિકા અને બ્રાઝિલના વેરિયન્ટની એન્ટ્રી કન્ફર્મ થઈ

આઇસીએમઆરના મહાનિર્દેશક ડો.બલરામ ભાર્ગવના જણાવ્યા અનુસાર દેશમાં હવે ઑફિશિયલી બે નવા કોરોના વેરિયન્ટના કેસ સામે આવ્યા છે, જેમાં યુકે બાદ હવે સાઉથ આફ્રિકા વેરિયન્ટ અને બ્રાઝિલ વેરિયન્ટના કેસ સામે આવ્યા છે, જો કે મહત્વનું છે કે આ વેરિયન્ટના હજુ સુધી માત્ર પાંચ જ કેસ સામે આવ્યા છે અને આ બધાને કવોરંટીન કરી નાખવામાં આવ્યા છે, અને આ લોકોના સંપર્કમાં આવેલા લોકોનું ટેસ્ટિંગ કરવામાં આવી રહ્યું છે. 

વેક્સિનની પ્રભાવકતા ચકાસવાના પ્રયોગો થઈ રહ્યા છે 

ડો.ભાર્ગવે વધુ માહિતી આપતા કહ્યું હતું કે વેક્સિનની પ્રભાવશીલતા માપવા માટે આ પ્રયોગ કરવામાં આવી રહ્યા છે, જો કે આ બંને વેરિયન્ટ યુકેના વેરિયન્ટથી અલગ છે. મહત્વનું છે કે સાઉથ આફ્રિકી સ્ટ્રેઇનના 4 જ્યારે કે બ્રાઝીલ વેરિયંટનો એક મામલો સામે આવ્યો છે અને આ મુસાફરોના સમ્પર્કમા આવનારા લોકોનું ટેસ્ટિંગ કરવામાં આવ્યું છે. 

આઈસીએમઆરના મહાનિર્દેશક ડો. ભાર્ગવના જણાવ્યા અનુસાર અત્યાર સુધીમાં દેશમાં કોરોનાના યુકે વેરિયંટના કુલ 187 કેસ સામે આવ્યા છે અને આમાંના એક પણ કેસમાં દર્દીનુ મોત થયું નથી, મહત્વનું છે કે આપણી રસીમાં યુકે વેરિયન્ટને પણ નિષ્પ્રભાવી કરવાની શક્તિ છે, અને એનઆઈવી પુણેમાં આ  યુકે સ્ટ્રેઇનને સફળતા પૂર્વક આઇસોલેટ કરવામાં આવ્યો છે. 

કેન્દ્રીય આરોગ્ય મંત્રાલયના સચિવ રાજેશ ભૂષણના જણાવ્યા અનુસાર યુકેથી આવનારા દરેક યાત્રી માટે આરટી પીસીઆર ટેસ્ટ ફરજીયાત કરી દેવામાં આવ્યા છે અને અમને લાગે છે કે આ એક સારી રણનીતિ છે અને સાઉથ આફ્રિકા અને બ્રાઝિલના સ્ટ્રેઇન સામે પણ આ રણનીતિને સફળતાપૂર્વક વાપરી શકાય છે. 

કેટલા દેશોમાં દક્ષિણ આફ્રિકી વેરિયંટ ફેલાઈ ચૂક્યો છે ?

એક માહિતી અનુસાર અત્યાર સુધીમાં લગભગ 44 જેટલા દેશોમાં આ સ્ટ્રેઈન ફેલાઈ ચૂક્યો છે અને આ મામલે આઈસીએમઆરના મહાનિદેશક ડો. ભાર્ગવે કહ્યું હતું એક અમારા વૈજ્ઞાનિકો આ વેરિયંટને આઇસોલેટ કરવાના બધા જ પ્રયત્નો કરી રહયા છે, જ્યારે કે બ્રાઝીલીયન વેરિયંટને સફળતાપૂર્વક આઇસોલેટ કરી દેવામાં આવ્યો છે. નોંધનીય છે કે અત્યાર સુધીમાં આ બ્રાઝીલીયન વેરિયંટ વિશ્વના કુલ 15 દેશોમાં ફેલાઈ ચૂક્યો હોવાની માહિતી છે, જેમાં ભારતમાં હજુ સુધી માત્ર એક જ કેસ નોંધાયો છે.