ફરીયાદ / અમદાવાદની માથાભારે નર્સ: ચાર ખોટા મેડિક્લેમ બતાવી 2 લાખની કરી છેતરપિંડી, MPમાં સારવાર લીધી હોવાનો દાવો

• થલતેજની હોસ્પિટલમાં કામ કરતી નર્સ સામે ફરીયાદ 
• એક જ વર્ષમાં 4-4 ખોટા મેડિક્લેમ કરી રૂ.2 લાખ ખંખેર્યા
• નર્સ શીતલ પટેલ અને તેના ભાઈ પ્રતીક વિરુદ્ધ વસ્ત્રાપુર પોલીસમાં ફરીયાદ 

મેડિક્લેમના નામે છેતરપિંડીના કિસ્સાઓ અવારનવાર સામે આવતા હોય છે આવી સ્થિતિમાં અમદાવાદની નર્સે લાલચમાં આવી એક વર્ષમાં 4 ખોટા મેડિક્લેમ કર્યા હતાં. જેમાં કંપનીને 2 લાખનો ધુમ્બો મારતા અમદાવાદના થલતેજની હોસ્પિટલમાં કામ કરતી માથાભારે નર્સ સામે ફરીયાદ નોંધાઇ છે. જેને લઈને પોલીસે કાર્યવાહી હાથ ધરી છે. પોલીસે નર્સ શીતલ પટેલ અને તેના ભાઈ પ્રતીક વિરુદ્ધ ગુન્હો દાખલ કરી તપાસનો ધમધમાટ શરૂ કર્યો છે.

શીતલ પટેલે અલગ અલગ બિમારી બતાવી ખોટા મેડિક્લેમ કર્યાનું ખુલ્યું
અમદાવાદના થલતેજની હોસ્પિટલમાં કામ કરતી નર્સ સામે વસ્ત્રાપુર પોલીસ સ્ટેશનમાં છેતરપિંડીની ફરીયાદ નોંધાઇ છે.ICICI લોમ્બાર્ડ જનરલ ઈન્સ્યોરન્સના મનોજ શાહે ફરિયાદ નોંધાવી છે.જેમાં ચોંકાવનારા આરોપો લગાવ્યા છે. આરોપી શીતલ પટેલે અલગ અલગ બિમારી બતાવી ખોટા મેડિક્લેમ કરી લીધાનું ભોપાળુ છતું થયું છે. મધ્યપ્રદેશની હોસ્પિટલમાં સારવાર લીધી હોવાનો દાવો કરાયો હતો. આથી શંકા ઉભી થતા સબંધિત વિભાગ દ્વારા તપાસ હાથ ધરવામાં આવી હતી. જેમાં તપાસ કરતા શીતલ પટેલ કામ પર હાજર હોવાનું સામે આવ્યું હતું. જેને લઈને સમગ્ર ભોપાળુ છતું થતા અધિકારીયો પણ ચોંકી ઉઠ્યા હતા અને ખોટા મેડિક્લેમના આધારે 2 લાખની છેતરપિંડી કરતી હોસ્પિટલમાં કામ કરતી નર્સ સામે ફરીયાદ નોંધાવી હતી. જેની તપાસમાં નર્સે એક વર્ષમાં 4 ખોટા મેડિક્લેમ કર્યાનું પણ ખુલ્યું છે.