ગુજરાત / ધોળકા અને વિરમગામમાં કમળ ખીલ્યું, ગોંડલ-ગણદેવીમાં ભાજપની ક્લિન સ્વિપ

દક્ષિણ ગુજરાતની ગણદેવી નગરપાલિકામાં ભારતીય જનતા પાર્ટીએ જબરદસ્ત પ્રદર્શન કર્યું છે. પાલિકાની તમામ 24 બેઠકો ભાજપના ખાતામાં ગઈ છે, જેના કારણે વિપક્ષને સંપૂર્ણપણે પછાડવામાં આવ્યો છે. ખાસ વાત એ છે કે આમાંથી 22 બેઠકો પર ભાજપના ઉમેદવારો ચૂંટણી પહેલાં જ બિનહરીફ જીત્યા હતા. બાકી રહેલી બે બેઠકો પર પણ ભાજપે જીત મેળવીને સમગ્ર નગરપાલિકામાં પોતાનું પ્રભુત્વ સ્થાપિત કર્યું છે.

વિરમગામમાં ભાજપની બહુમતી

અમદાવાદ જિલ્લાના વિરમગામ નગરપાલિકામાં પણ ભાજપે બહુમતી મેળવી છે. કુલ 36 બેઠકો ધરાવતી આ પાલિકામાં ભાજપે 19થી વધુ બેઠકો જીતતા સત્તામાં આવવું લગભગ નક્કી બની ગયું છે. મતગણતરી શરૂ થાય તે પહેલાં જ ભાજપના 13 ઉમેદવારો બિનહરીફ વિજેતા બન્યા હતા, જ્યારે બાકીની બેઠકોમાં પણ પક્ષે સારું પ્રદર્શન કરીને બહુમતીનો આંકડો પાર કર્યો છે.

ધોળકામાં ભાજપનો ડંકો

ધોળકા નગરપાલિકામાં પણ ભાજપે મજબૂત સ્થિતિ બનાવી છે. અહીં કુલ 36 બેઠકોમાંથી ભાજપે પહેલેથી જ 11 બેઠકો બિનહરીફ જીતી લીધી હતી. ત્યારબાદ મતગણતરી દરમિયાન વધુ બેઠકો જીતતા પક્ષે 21 બેઠકો સાથે સ્પષ્ટ બહુમતી મેળવી છે. હજુ કેટલીક બેઠકોના પરિણામો બાકી હોવા છતાં ભાજપની જીત નિશ્ચિત માનવામાં આવી રહી છે અને કાર્યકરોમાં ખુશીનો માહોલ જોવા મળી રહ્યો છે.

આ પણ વાંચોઃ આમ આદમી પાર્ટીનું ખાતું ખુલ્યું, બગસરા તાલુકા પંચાયતની ચૂંટણીમાં દકુભાઈ ગાજીપરાનો વિજય

રાજકોટ જિલ્લાના ગોંડલ નગરપાલિકામાં ભાજપે તો ઐતિહાસિક જીત નોંધાવી છે. અહીં 11 વોર્ડની તમામ 44 બેઠકો ભાજપે જીતતા વિપક્ષનો સફાયો થઈ ગયો છે. લોકોનો વિકાસના મુદ્દાઓ પર વિશ્વાસ અને નેતૃત્વ પ્રત્યેનો ટેકો ભાજપને મળ્યો હોવાનું માનવામાં આવી રહ્યું છે. આ પરિણામે ગોંડલમાં ભાજપનું પ્રભુત્વ વધુ મજબૂત બન્યું છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ