ગુજરાત / ભાવનગર-અમદાવાદ એક્સપ્રેસ હાઈવે પર કાયદાના ધજાગરા ઉડાવતી 'મોતની સવારી'

ગુજરાતના સૌથી વ્યસ્ત અને હાઈસ્પીડ રોડ નેટવર્ક પૈકીના એક એવા ભાવનગર-અમદાવાદ એક્સપ્રેસ વે પરથી હૃદય ધ્રુજાવી દે તેવા દ્રશ્યો સામે આવ્યા છે. સામાન્ય રીતે એક્સપ્રેસ હાઈવે પર વાહનોની ગતિ મર્યાદા ખૂબ જ વધારે હોય છે અને અકસ્માતની સંભાવના પણ એટલી જ વધુ રહે છે. તેવામાં આ હાઈવે પર ટ્રાફિકના નિયમોની ઐસીતૈસી કરીને પસાર થતી એક ખતરનાક 'મોતની સવારી'નો વીડિયો અત્યારે ઇન્ટરનેટ પર ભારે વાયરલ થઈ રહ્યો છે, જેણે માર્ગ સલામતી અને હાઈવે પોલીસની કામગીરી સામે મોટા સવાલો ઊભા કર્યા છે.

વાયરલ વીડિયોમાં શું છે

વાયરલ થઈ રહેલા આ વીડિયોમાં સ્પષ્ટપણે જોઈ શકાય છે કે, એક્સપ્રેસ વે પરથી પસાર થઈ રહેલા એક વાહનમાં ક્ષમતા કરતા પણ વધુ પ્રમાણમાં ઘરવખરીનો સામાન (સાંસારિક ઘર સમાન) ખડકી દેવામાં આવ્યો હતો. આટલું ઓછું હોય તેમ, વાહનની અંદર બેસવાની જગ્યા ન હોવાથી કેટલાક લોકો આ જોખમી રીતે ભરેલા સામાનની બિલકુલ ઉપરના ભાગે જીવના જોખમે બેઠેલા જોવા મળ્યા હતા.

પોતાની જિંદગીની સહેજ પણ પરવા કર્યા વગર

ખુલ્લા વાહનમાં આટલી ઊંચાઈ પર બેસીને મુસાફરી કરવી એ કોઈપણ મોટી હોનારતને સીધું આમંત્રણ આપવા બરાબર છે. વાહન ચાલક અને તેમાં બેસેલા લોકો પોતાની જિંદગીની સહેજ પણ પરવા કર્યા વગર એક્સપ્રેસ વે પર મોતની સવારી કરી રહ્યા હતા.અહીં સૌથી મહત્વની અને નોંધનીય બાબત એ છે કે ભાવનગર-અમદાવાદ એક્સપ્રેસ વે પર નાની-મોટી તમામ ગાડીઓ સામાન્ય રીતે 100 કિલોમીટર પ્રતિ કલાકથી પણ વધુની સ્પીડમાં ચાલતી હોય છે.

આ પણ વાંચો : અત્યાર સુધીમાં રાજ્યભરમાંથી ઝડપાયા કુલ 568 બાંગ્લાદેશી નાગરિકો, Dy. CMએ કહ્યું ''બાંધછોડ...''

આવા હાઈસ્પીડ ટ્રેક પર જો વાહનનું સંતુલન સહેજ પણ બગડે, અથવા પાછળથી આવતું કોઈ વાહન ભટકાય, તો સામાન પર બેસેલા નિર્દોષ લોકો સીધા રોડ પર ચગદાઈ જાય તેવી ભયાનક પરિસ્થિતિ સર્જાઈ શકે છે. આવી પરિસ્થિતિમાં જો કોઈ ગંભીર અકસ્માત સર્જાય અને કોઈનો કિંમતી જીવ જાય, તો તેના માટે આખરે જવાબદાર કોણ? વાહન ચાલકની બેદરકારી, સામાન પર બેસનારા લોકોની મૂર્ખામી કે પછી હાઈવે પર પેટ્રોલીંગ કરતી પોલીસ, જે આવા વાહનોને રોકવામાં નિષ્ફળ જાય છે? આ સવાલ હાલ દરેક નાગરિક પૂછી રહ્યો છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ