સાવધાન / પોલીસનો વેશ ધરીને આવ્યો લૂંટારો અને મહિલાને છરો બતાવી...: અમદાવાદમાં ચેતવણીરૂપ ઘટના

• નકલી પોલીસથી સાવધાન
• પતિનો અકસ્માત થયો હોવાનું કહીને ઘરમાં ઘુસ્યો
• મહિલાને છરી બતાવીને ચલાવી લૂંટ

જો તમે ઘરે એકલા હોવ તો કોઇ અજાણ્યા માણસને ઘરમાં પ્રવેશ આપતા પહેલા સોવાર વિચારજો. ભલેને તે પછી પોલીસ જ કેમ ન હોય. શહેરમાં ચોરી, લૂંટફાટ જેવી ઘટનાઓ વધી રહી છે ત્યારે હવે ધોળે દહાડે પણ ઘરફોડ ચોરીના કિસ્સા વધી રહ્યા છે. ત્યારે અમદાવાદીઓ માટે એક ચેતવણીરૂપ કિસ્સો સામે આવ્યો છે. 

નકલી પોલીસ બનીને આવેલો લૂંટારૂ દાગીના લઇને ફરાર 

તમારા ઘરમાં જો એકાએક પોલીસ આવી ચઢે તો શું કરો ? પોલીસને જોઇને આપણે આવકારો તો આપીએ જ પરંતુ હવે લૂંટારૂઓએ આ તકનો લાભ ઉઠાવીને અજાણ્યાના ઘરમાં જવાનો બેસ્ટ રસ્તો શોધી નાંખ્યો છે. અમદાવાદાના જુહાપુરામાં નકલી પોલીસ બનીને લૂંટ મચાવી હોવાનું સામે આવ્યું છે. પોતે પોલીસ હોવાની ઓળખ આપીને કહ્યુ કે તમારા પતિનો અકસ્માત થયો છે. એમ કરીને ઘરમાં પ્રવેશ્યો અને બાદમાં છરી બતાવીને મહિલાના દાગીની લૂંટી લીધા.  તિજોરી ખોલીને દાગીનાના 3 બોક્સની લૂંટ કરી. કુલ 1.36 લાખની કિંમતના દાગીના લૂંટીને આરોપી ફરાર થઇ ગયો. ઘટનાને પગલે મહિલાએ વેજલપુર પોલીસ સ્ટેશનમાં ફરિયાદ નોંધાવતા પોલીસે વધુ તપાસ હાથ ધરી છે. 

નકલી પોલીસે માર્યો હતો માર

અગાઉ સુરતના રાંદેરમાં નકલી પોલીસ દ્વારા દુકાનદારને માર મારવાની ઘટના સામે આવી હતી.  રાંદેર ગોરાટ રોડ પર મોડી રાત્રે આ મારામારીની ઘટના બની હતી. આરોપીએ મુબારક પટેલે પોલીસમાં નોકરી કરતા હોવાથી ઓળખ આપી હતી. જે બાદ સિગારેટ લેવા બંધ દુકાન ખોલવા બબાલ કરી હતી. જે બાદ દુકાનદારને મારમાર્યો હતો.