કાર્યવાહી / 9 મહિના પહેલા ગ્રેડ-પે આંદોલનમાં જોડાયેલો અરવલ્લીનો પોલીસકર્મી સસ્પેન્ડ, થઇ ખાતાકીય કાર્યવાહી

• ગ્રેડ-પે આંદોલન મુદ્દે અરવલ્લીમાં પોલીસકર્મી સસ્પેન્ડ
• ASI જયદીપસિંહ વાઘેલાને કર્યા સસ્પેન્ડ
• 9 મહિના પહેલા ગ્રેડ-પે આંદોલનમાં જોડાયા હતા

ગ્રેડપેમાં વધારાની માંગને લઈને પોલીસ કર્મીઑ દ્વારા  અનેક વખત રજૂઆત કરાઇ છે. વધુમાં આંદોલનો પણ થયા છે. તેવામાં  ગ્રેડ-પે આંદોલન મામલે અરવલ્લીના પોલીસકર્મી સસ્પેન્ડ કરી દેવામાં આવ્યા  છે. મહત્વનું છે કે ASI જયદીપસિંહ વાઘેલા 9 મહિના પહેલા ગાંધીનગર ખાતે ગ્રેડ-પે આંદોલનમાં જોડાયા હતા. જેની વિરૂધ શિસ્તભંગ મુદ્દે ખાતાકીય કાર્યવાહી કરવામાં આવી છે.

 
SP વિશાલ વાઘેલાએ ASI જયદીપસિંહ વાઘેલાને કર્યા સસ્પેન્ડ 
ગાંધીનગર પોલીસ હેડક્વાર્ટર ખાતે ગત તારીખ 7 જાન્યુઆરીના રોજ ગ્રેડ પે મામલે મહિલાઓ ધરણાં કરવા બેસી હતી. આ દરમિયાન  ગ્રેડ પે મામલે પોલીસ કર્મીઑએ સરકાર વિરુદ્ધ સૂત્રોચાર કરી માંગ ઉઠાવી હતી. જે વેળાએ અનેક પોલીસ પરિવારની મહિલાઓની અટકાયત કરવામાં આવી હતી.  તેવામાં જે તે વેળાએ પોલીસ મહિલાઓને ઉશ્કેરવા બદલ અરવલ્લીના ઈસરી પોલીસ મથકમાં ASI તરીકે ફરજ બજાવતા જયદીપસિંહ વાઘેલાને સસ્પેન્ડ કરી દેવામાં આવ્યા છે.  અરવલ્લી SP વિશાલ વાઘેલાએ ASI જયદીપસિંહ વાઘેલાને  સસ્પેન્ડ કરી દેતા આ કાર્યવાહી ચર્ચાનો વિષય બની છે.

પોલીસકર્મીઓની  23 જેટલી માંગ 
પોલીસકર્મીઓ પોતાની  23 જેટલી માગને લઈને લાંબા સમયથી આંદોલનના માર્ગે વળ્યા છે. જેમાં કોન્સ્ટેબલ, હેડ કોન્સ્ટેબલ તેમજ એએસઆઇનો ગ્રેડ પે વધારીને બદલે 2800, 3600 અને 4200 કરવામાં આવે ઉપરાતં સાતમા પગારપંચ મુજબ રજા પગારનું ચુકવણું કરવામાં આવે છે, તેમજ પોલીસકર્મચારીને ચૂકવાતાં ભથ્થાંની રકમ વધારવામાં આવે. એટલુ જ નહિ 8 કલાક ઉપર જો કામની ફરજ પાડવામાં આવે તો દર કલાકના રૂ.100 લેખે વધારાનું ભથ્થું આપવામાં આવે તે સહીતની માંગ કરી રહ્યા છે.