ભયાનક પરિસ્થિતિ / હમાસના આંતકવાદીઓના હુમલામાં ઈઝરાયલના મેયરનું મૃત્યુ: શહેરના નાગરિકોને બચાવવા માટે જંગના મેદાનમાં આવ્યા હતા

• ઇઝરાયેલમાં પ્રાદેશિક પરિષદના વડાની હમાસના ઉગ્રવાદીઓએ હત્યા કરી 
• ઈઝરાયેલના સંરક્ષણ મંત્રી યોવ ગાલાંટે હુમલા બાદ ચેતવણી આપી 
• હમાસે ઇઝરાયેલમાં 5,000 રોકેટ છોડ્યા હોવાનો દાવો કર્યો હતો

ઇઝરાયેલમાં પ્રાદેશિક પરિષદના વડાની હમાસના ઉગ્રવાદીઓએ હત્યા કરી હતી. ગાઝા પટ્ટીમાંથી રોકેટની આડશ અને પેલેસ્ટિનિયન જૂથ દ્વારા ઈઝરાયેલમાં મોટી સંખ્યામાં ઘૂસણખોરીએ ઈઝરાયેલમાં આતંકનું દ્રશ્ય રજૂ કર્યું છે. સ્થાનિક મીડિયાના અહેવાલો અનુસાર હમાસના ઉગ્રવાદીઓ સાથેની લડાઈ દરમિયાન શાર હનેગેવ પ્રાદેશિક પરિષદના વડા ઓફિર લિબસ્ટીનનું મૃત્યુ થયું હતું. એક સ્થાનિક ન્યૂઝ વેબસાઈટે જણાવ્યું હતું કે, ઓફિર જ્યારે ઉગ્રવાદી હુમલા દરમિયાન લડવા માટે બહાર ગયા ત્યારે માર્યા ગયા. ઈઝરાયેલના સંરક્ષણ મંત્રી યોવ ગાલાંટે હુમલા બાદ ચેતવણી આપી હતી કે હમાસે આજે સવારે ગંભીર ભૂલ કરી છે.

ઈઝરાયેલમાં શું થઈ રહ્યું છે?

શનિવારે સવારે હમાસે ઇઝરાયેલમાં 5,000 રોકેટ છોડ્યા હોવાનો દાવો કર્યો હતો. આ પછી સમગ્ર શહેરમાં એલર્ટ જારી કરવામાં આવ્યું હતું. હમાસના લડવૈયાઓએ ઈઝરાયેલના ઘરો પર કબજો કરી લીધો છે. આ દરમિયાન ઈઝરાયેલના પીએમ નેતન્યાહુએ કહ્યું છે કે અમે યુદ્ધમાં છીએ, હમાસને આની ભારે કિંમત ચૂકવવી પડશે.

હમાસનું નિવેદન

હમાસના પ્રવક્તા મોહમ્મદ ડેઈફે ઈઝરાયેલ પર હુમલાની જવાબદારી લેતા કહ્યું કે દુનિયાના કોઈપણ ખૂણે હાજર પેલેસ્ટિનિયન નાગરિકોએ ઈઝરાયલ સામે ઉભા રહેવું જોઈએ. તેણે કહ્યું, અમે આ હુમલાઓ જેરુસલેમની અલ અક્સા મસ્જિદ પર તેમના હુમલાના જવાબમાં કર્યા છે. આ સાથે તેણે ઘણા દેશોના મુસ્લિમોને એક થવાનું આહ્વાન કર્યું છે.

હુમલાનું કારણ?

હુમલાનું કારણ અલ-અક્સા મસ્જિદ કમ્પાઉન્ડ છે. અલ-અક્સા મસ્જિદ જેરુસલેમ શહેરમાં છે. તાજેતરના સમયમાં યહૂદી લોકો તેમના પવિત્ર તહેવારોની ઉજવણી કરવા અહીં આવ્યા છે. ટેમ્પલ માઉન્ટ આ કમ્પાઉન્ડમાં જ છે, જ્યાં યહૂદીઓ પ્રાર્થના કરે છે. આજે યહૂદીઓનો તહેવાર છે, તેથી માનવામાં આવે છે કે હમાસે આ જ કારણસર હુમલો કર્યો હતો.