શાતિર / આ પ્રકારના ઈ-મેઈલ આઈડીથી સાવધાન.! સુરતમાં વેપારી 97 લાખમાં લૂંટાયો, પોલિસીને નામે ઠગાઈનો ખેલ ઉઘાડો

• પોલિસીને નામે ઠગાઈનો ખેલ 
• પોલિસી બંધ કરવા માટે 97 લાખનો ચૂનો 
• શાતિર શખ્સે વેપારીને ચૂનો લગાડ્યો 

વીમા પોલિસી કેન્સલ કરાવી આપવાના બહાને છેતરપિંડી આચરનારની પોલીસે ધરપડ કરી છે. વાત જાણે એમ છે કે, અલગ અલગ સરકારી ચાર્જીસ ગણાવી સુરતના ફરિયાદી સાથે 97 લાખથી વધુની છેતરપિંડી આચારનાર ગેંગની ગાઝિયાબાદ ખાતેથી સુરત સાયબર ક્રાઈમે ધરપકડ કરી છે. 

એક વર્ષ બાદ આરોપી ઝડપાયો 
ગાઝિયાબાદ ખાતે આ ગેંગ ગેરકાયદેસર રીતે કોલ સેન્ટર ચલાવી રહી હતી. જે કોલ સેન્ટર પર પાંચ મોનિટર, સીપીયુ,  22 નંગ મોબાઈલ તેમજ પેન ડ્રાઈવ અને 10 જેટલા અલગ અલગ બેંકના એટીએમ કાર્ડ સાયબર ક્રાઇમે જપ્ત કર્યા છે. સાયબર ક્રાઇમની તપાસમાં આ ગેંગ દ્વારા અલગ અલગ લોકોને ફોન કોલ્સ કરી પોલિસીનું પેમેન્ટ રિલીઝ કરવાના બહાને છેતરપિંડી આચરતા હતાં. સરકારી કચેરીઓના નામના બોગસ ઇ-મેલ આઇડી ઉપરથી બોગસ અને બનાવટી લેટરો મોકલી અલગ અલગ ચાર્જિસના નામે રૂપિયા પડાવવામાં આવતા હોવાની હકીકત સામે આવી છે. 

કેવી રીતે ઠગાઈ કરી ?
સુરતના એક ફરિયાદી પાસેથી વર્ષ 2016થી પોલિસી કેન્સલ કરી આપવાના બહાને ઠગ ટોળકી દ્વારા 97 લાખ 17 હજારની છેતરપિંડી આચરવામાં આવી છે. આ ઠગ ટોળકીએ સુરતના ફરિયાદીને પોલિસી કેન્સલ કરી આપવાના બહાને અલગ અલગ ચાર્જ જણાવ્યા હતા. ત્યારબાદ સરકારી કચેરીઓના નામના અલગ અલગ બોગસ ઇ મેલ આઇડી ઉપરથી બનાવટી લેટરો મોકલવામાં આવ્યા હતા. જેમાં આઈ.જી.એમ.એસ ડિપાર્ટમેન્ટ, જી.બી.આઈ.સી વીમા અને વિકાસ પ્રાધિકરણ ડિપાર્ટમેન્ટ ઉપરાંત ભારતીય રિઝર્વ બેન્ક, ઇન્કમટેક્સ ડિપાર્ટમેન્ટ, મિનિસ્ટ્રી ઓફ ફાઇનાન્સના લોગો વાળા લેટરો મૂક્યા હતાં. ફરિયાદીએ પોતાની ફ્યુચર જનરલ ઇન્ડિયા કંપનીની બે જીવન વીમા પોલિસી લીધી હતી. જે પોલીસી કેન્સલ કરાવવા માટે સુરતના ફરિયાદીએ આઈ આર.ડી.એ.આઈના ઓનલાઈન આઈ.એમ.જી.એસ પોર્ટલ પર ઓનલાઇન ફરિયાદ કરી હતી. 

આરોપીઓની ધરપકડ કરાઈ
પોલીસ તપાસમાં સમગ્ર સાયબર ક્રાઇમનું નેટવર્ક ઉત્તર પ્રદેશના ગાજિયાબાદ ખાતેથી ઓપરેટ થતું હોવાનું બહાર આવ્યું છે. જેથી મળેલી ચોક્કસ માહિતીના આધારે સુરત સાઇબર ક્રાઇમે ઉત્તર પ્રદેશના ગાઝિયાબાદ ખાતે આવેલા એન્જલ મેગા મોલ તપાસ કરતા કોલ સેન્ટર મળી આવ્યું હતું. જે કોલ સેન્ટર પરથી આરોપીઓની ધરપકડ કરાઈ છે.