ગુજરાત / અમદાવાદમાં શાકભાજીના ભાવમાં મોટો ભડકો, વરસાદી અસરથી આવક ઘટતા છૂટક બજારમાં ભાવ વધ્યા

અમદાવાદમાં વરસાદી માહોલ વચ્ચે શાકભાજીના ભાવમાં ફરી એકવાર વધારો થતાં ગૃહિણીઓનું ઘરખર્ચનું બજેટ ખોરવાયું છે. શહેરનાં વિવિધ શાકમાર્કેટ અને છૂટક બજારોમાં અનેક શાકભાજીના ભાવમાં છેલ્લા કેટલાક દિવસની સરખામણીએ ઉછાળો નોંધાયો છે. ખાસ કરીને રીંગણનો ભાવ રૂ.૧૨૦ પ્રતિ કિલો સુધી પહોંચતાં ગ્રાહકોને મોટો ઝટકો લાગ્યો છે.

વરસાદને કારણે આસપાસના વિસ્તારોમાંથી શાકભાજીની આવક અને ગુણવત્તા બંને પર અસર પડી હોવાનું વેપારીઓ જણાવી રહ્યા છે. ખેતરોમાં પાણી ભરાવા, પરિવહનમાં મુશ્કેલી અને આવકમાં ઘટાડાની અસર સીધી છૂટક બજારના ભાવ પર પડી રહી છે. પરિણામે રસોડામાં વપરાતાં શાક ખરીદવા માટે પણ ગ્રાહકોને વધુ રૂપિયા ચૂકવવા પડી રહ્યા છે.

રસોડાનું બજેટ સંભાળવું મુશ્કેલ બની રહ્યું

શાકભાજીના ભાવ વધતાં ગૃહિણીઓ માટે રસોડાનું બજેટ સંભાળવું મુશ્કેલ બની રહ્યું છે. એક તરફ દાળ, તેલ અને અન્ય કરિયાણાની વસ્તુઓના ખર્ચ વચ્ચે હવે શાકભાજીના વધેલા ભાવનો વધારાનો બોજ આવ્યો છે. પરિણામે અનેક પરિવારો મોંઘાં શાકની જગ્યાએ સસ્તા વિકલ્પો તરફ વળી રહ્યા છે. વેપારીઓના જણાવ્યા મુજબ અમદાવાદમાં શાકભાજીની આવક મુખ્યત્વે આસપાસના ગ્રામ્ય વિસ્તારો ઉપરાંત અન્ય જિલ્લામાંથી થાય છે. ભારે વરસાદના કારણે કેટલાક માર્ગો પર પરિવહન ધીમું પડતાં તથા ખેતરમાંથી આવતી આવક ઘટતાં હોલસેલ બજારથી છૂટક બજાર સુધી ભાવમાં વધારો જોવા મળી રહ્યો છે.

શાકભાજી અને અંદાજિત ભાવ (પ્રતિ કિલોગ્રામ)

• રીંગણ: રૂ. ૧૦૦થી ૧૨૦
• ટામેટાં: રૂ. ૬૦થી ૮૦
• ભીંડા: રૂ. ૮૦થી ૧૦૦
• કોબીજ: રૂ. ૫૦થી ૭૦
• ફ્લાવર: રૂ. ૮૦થી ૧૦૦
• ડુંગળી: રૂ. ૪૦થી ૬૦
• બટાકા: રૂ. ૩૦થી ૪૦
• કારેલાં : રૂ. ૧૦૦
• ચોળી: રૂ. ૧૨૦
• પરવળ: રૂ. ૧૨૦
• કંકોડા: રૂ. ૧૨૦
• ગવાર: રૂ. ૧૦૦

આ પણ વાંચો : પ્લોટ વિહોણાઓ માટે ગુજરાત સરકારનો મહત્વનો નિર્ણય, જાણો વિગત

આકસ્મિક ભાવ વધારા પાછળનાં મુખ્ય કારણ

• વરસાદને કારણે ખેતરમાં પાકને મોટું નુકસાન.
• પાક બગડવાથી બજારમાં શાકભાજીની આવક ઘટતાં.
• ગ્રાહકોની માગ વધુ હોવાથી ભાવ આસમાને.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ