શિક્ષણ / બોર્ડમાં ઓછું પરિણામ આવ્યું તો દર 15 દિવસે લેવાશે પરીક્ષા, અમદાવાદ ગ્રામ્ય DEOની તૈયારી

સરકાર પાસેથી ગ્રાન્ટ લેતી સ્કૂલોનું પરિણામ દિવસેને દિવસે ઘટી રહ્યું છે ત્યારે અમદાવાદ ગ્રામ્યના શિક્ષણાધિકારીએ સ્કૂલો અને વિદ્યાર્થીઓ માટે એક નવી પહેલ કરી છે. આ પહેલમાં ડીઈઓએ (Ahmedabad Rural DEO) દ્વારા ઓછા પરિણામવાળી સ્કૂલોની એક યાદી તૈયાર કરવામાં આવી છે.

આ યાદીવાળી શાળાઓમાં હવે દર પંદર દિવસે વિદ્યાર્થીઓની પરીક્ષા લેવાશે. આ સાથે સાથે એજ્યુકેશન ઈન્સ્પેક્ટરની પણ એક ટીમ તૈયાર કરાઈ છે જે અલગ-અલગ સ્કૂલમાં જઈ કેટલો અભ્યાસક્રમ ચાલ્યો. કેવી રીતે શિક્ષકો ભણાવે છે તે તમામ બાબતોનું નિરીક્ષણ કરશે અને એક રિપોર્ટ તૈયાર કરાશે.

સ્કૂલોનું પરિણામ કેમ ઓછું આવે છે તેના પર ચર્ચા કરવા ડીઈઓ દરેક પ્રિન્સિપાલને ડીઈઓ કચેરી બોલાવશે અને દરેક પ્રિન્સિપાલ સાથે વન ટુ વન ચર્ચા કરશે. કેમ કે, અમદાવાદ ગ્રામ્યમાં અત્યારે 80 જેટલી સ્કૂલો એવી છે જેનું ધોરણ 10નું પરિણામ 40 ટકા કરતા નીચે આવે છે. આ વખતે અમદાવાદ ગ્રામ્ય અને શહેરની સરકારી અને ગ્રાન્ટેડ સ્કૂલોનું ધોરણ 10નું પરિણામ ઊંચુ આવે તેના માટે અત્યારેથી જ ડીઈઓ દ્વારા પ્રયાસો શરુ કરી દેવાયા છે. ત્યારે હવે જોવાનું એ રહે છે કે, વિદ્યાર્થીઓની મહેનત અને સરકારી પ્રયાસ કેવો રંગ લાવે છે.