ગુજરાત / અમદાવાદમાં ગેરકાયદે ફટાકડાની ફેક્ટરીમાં ભીષણ બ્લાસ્ટના પ્રથમ CCTV આવ્યા સામે, 9 લોકોનાં થયા હતા મો*ત

અમદાવાદમાં ગેરકાયદે ચાલતી ફટાકડાની ફેક્ટરીમાં થયેલા ભયાનક બ્લાસ્ટ મામલે હવે CCTV ફૂટેજ સામે આવ્યા છે. આ ફૂટેજમાં બ્લાસ્ટ બાદ ફેક્ટરીમાં લાગેલી ભીષણ આગના દૃશ્યો જોવા મળી રહ્યા છે. ઘટનાએ સમગ્ર શહેરને હચમચાવી દીધું છે અને ગેરકાયદે રીતે ચાલતા ફટાકડાના કારખાનાઓ અંગે અનેક ગંભીર સવાલો ઊભા કર્યા છે. પોલીસ અને સંબંધિત એજન્સીઓ સમગ્ર ઘટનાની વિગતવાર તપાસ કરી રહી છે.

અચાનક જોરદાર ધડાકો થતાં આગ ભભૂકી ઊઠતી

સામે આવેલા CCTV ફૂટેજમાં ગેરકાયદે ફટાકડાની ફેક્ટરીમાં અચાનક જોરદાર ધડાકો થતાં આગ ભભૂકી ઊઠતી જોવા મળે છે. ધડાકો એટલો પ્રચંડ હતો કે થોડા જ સમયમાં આગે સમગ્ર ફેક્ટરીને પોતાની ઝપેટમાં લઈ લીધી હતી. ઘટનાસ્થળે અફરાતફરીનો માહોલ સર્જાયો હતો અને આસપાસના લોકોમાં પણ ભયનો માહોલ ફેલાઈ ગયો હતો.

પરમિટ વિના ગેરકાયદેસર રીતે ચલાવવામાં આવી રહી

પ્રાથમિક તપાસમાં સામે આવ્યું છે કે આ ફેક્ટરી કોઈપણ પ્રકારના પાસ અથવા પરમિટ વિના ગેરકાયદેસર રીતે ચલાવવામાં આવી રહી હતી. અહીં ગેરકાયદે ફટાકડાનું ઉત્પાદન કરવામાં આવતું હતું.

નિયમોનું પાલન કર્યા વગર અને જરૂરી સુરક્ષા વ્યવસ્થાના અભાવે આ કારખાનું ધમધમતું હોવાના આક્ષેપો પણ સામે આવ્યા છે. હવે તપાસ એ દિશામાં પણ આગળ વધી રહી છે કે ગેરકાયદે રીતે ચાલતી આ ફેક્ટરીને કોણ સંચાલિત કરતું હતું અને તેમાં અન્ય કોણ-કોણ સંડોવાયેલા હતા.

દુર્ઘટનામાં કુલ 9 લોકોના મોત

આ ભયાનક દુર્ઘટનામાં કુલ 9 લોકોના મોત થયા છે. બ્લાસ્ટ એટલો વિનાશક હતો કે ફેક્ટરીમાં હાજર લોકોને બહાર નીકળવાની પણ તક મળી નહોતી. ઘટનાના કારણે સમગ્ર વિસ્તારમાં શોકનો માહોલ છવાઈ ગયો છે. પોલીસ, ફાયર બ્રિગેડ અને અન્ય તંત્રે તાત્કાલિક બચાવ કામગીરી હાથ ધરી હતી અને આગ પર કાબૂ મેળવવાનો પ્રયાસ કર્યો હતો.

આ પણ વાંચો : અમદાવાદ ફટાકડાની ફેક્ટરી બ્લાસ્ટ કેસમાં મોટી કાર્યવાહી, ગેરકાયદે કારખાનું ચલાવનાર સંચાલકો સામે FIR નોંધાઈ

ઘટના બાદ પોલીસ દ્વારા સમગ્ર કેસની ગંભીરતાથી તપાસ કરવામાં આવી રહી છે. CCTV ફૂટેજ સહિતના તમામ પુરાવા એકત્ર કરવામાં આવી રહ્યા છે, જેથી બ્લાસ્ટનું ચોક્કસ કારણ જાણી શકાય અને જવાબદારો સામે કડક કાયદેસરની કાર્યવાહી કરી શકાય. સાથે જ ગેરકાયદે ફટાકડાની ફેક્ટરીઓ સામે પણ તંત્ર દ્વારા તપાસ અને કાર્યવાહી તેજ કરવામાં આવી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ