ગુજરાત / બ્લેક ફિલ્મ અને નંબર પ્લેટ વિનાના વાહનો સામે RTOની તવાઈ, 2 લાખથી વધુનો દંડ વસૂલાયો

શહેરમાં વાહનો પર નિયમ વિરુદ્ધ બ્લેક ફિલ્મ લગાવવી અને નંબર પ્લેટ વગર કે નિયમ મુજબની નંબર પ્લેટ ન રાખવી હવે વાહનચાલકોને ભારે પડી રહી છે. આરટીઓ દ્વારા બંને પ્રકારનાં વાહનો સામે ચેકિંગ ડ્રાઇવ તેજ કરવામાં આવી છે. શહેરમાં રોજ સરેરાશ ૧૦૦થી ૧૫૦ વાહનો સામે કાર્યવાહી થતી હોવાનો અંદાજ છે અને દંડની રકમ દૈનિક રૂ. બે લાખથી વધુ સુધી પહોંચી રહી છે. ખાસ કરીને બ્લેક ફિલ્મવાળાં વાહનોમાં કાચની પારથી અંદરનું દૃશ્ય ન દેખાતું હોય તો સ્થળ પર જ ફિલ્મ દૂર કરાવવાની કાર્યવાહી પણ કરવામાં આવી રહી છે.

શહેરના મુખ્ય માર્ગો, ચાર રસ્તા અને વાહનોની વધુ અવરજવરવાળા વિસ્તારોમાં આરટીઓની ટીમ દ્વારા વાહનો રોકી તપાસ કરવામાં આવી રહી છે. ચેકિંગ દરમિયાન વાહનની નંબર પ્લેટ નિયમ મુજબ છે કે નહીં, નંબર સ્પષ્ટ રીતે વાંચી શકાય છે કે નહીં તેમજ કાચ પર નિયમ વિરુદ્ધ ફિલ્મ લગાવવામાં આવી છે કે નહીં તેની ચકાસણી કરવામાં આવે છે. RTOની આ ડ્રાઇવમાં હવે ‘બ્લેક ફિલ્મ’ અને ‘નંબર પ્લેટ’ બંને સીધા રડારમાં હોવાથી વાહનચાલકો માટે વાહન રસ્તા પર ઉતારતા પહેલાં આ બે બાબતોની ચકાસણી કરવી જરૂરી બની છે.

બ્લેક ફિલ્મ‘દૂર કરો અને પછી આગળ વધો’ની સ્થિતિ

વાહનના કાચ પર નિયમ વિરુદ્ધ ડાર્ક ફિલ્મ લગાવેલી મળી આવે તો માત્ર દંડની કાર્યવાહી જ નહીં, પરંતુ ફિલ્મ દૂર કરાવવા પર પણ ભાર મૂકવામાં આવે છે. કેટલાક વાહનચાલકો કારની સુંદરતા, ગરમીથી બચવા અથવા પ્રાઇવસી માટે બ્લેક ફિલ્મ લગાવતા હોય છે, પરંતુ નિયમની મર્યાદા બહારની ફિલ્મ વાહનચાલકને દંડ સુધી પહોંચાડી શકે છે.

આ પણ વાંચો : કેપ્ટન સ્મિતને ગુજરાત સરકાર વિશિષ્ટ ગુજરાત ગરીમા એવોર્ડથી કરશે સન્માનિત, જાણો કોણ છે કેપ્ટન સ્મિત મચ્છર

વાહનચાલકો માટે ચેક લિસ્ટ

• વાહન પર માન્ય અને નિયમ મુજબની નંબર પ્લેટ લગાવવી.
• નંબર પ્લેટ પરનો નંબર સ્પષ્ટ રીતે વાંચી શકાય તેવો રાખવો.
• નંબર પ્લેટને ઢાંકવી કે તેમાં ફેરફાર કરવો નહીં.
• વાહનના કાચ પર નિયમ વિરુદ્ધ ડાર્ક ફિલ્મ ન લગાવવી.
• ચેકિંગ દરમિયાન વાહનના જરૂરી દસ્તાવેજો સાથે રાખવા

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ