ગાંધીનગર / સુરતની જેમ અમદાવાદમાં પણ ચૂકવાશે વરસાદથી થયેલા નુકસાનની સહાય, ગુજરાત સરકારનો મહત્વનો નિર્ણય

રાજ્યમાં છેલ્લા કેટલાક દિવસોથી પડેલા ભારે વરસાદના કારણે અનેક જિલ્લાઓમાં જનજીવન પ્રભાવિત બન્યું છે. ઘણા વિસ્તારોમાં દુકાનો, લારી-ગલ્લા, વેપારિક એકમો અને અન્ય મિલકતોને નુકસાન થયું છે. આ પરિસ્થિતિને ધ્યાનમાં રાખીને મુખ્યમંત્રી ભૂપેન્દ્ર પટેલની અધ્યક્ષતામાં મળેલી રાજ્ય કેબિનેટની મહત્વપૂર્ણ બેઠકમાં વરસાદથી અસરગ્રસ્ત લોકોને રાહત આપવા અંગે અનેક નિર્ણયો લેવામાં આવ્યા છે. ખાસ કરીને અમદાવાદમાં વરસાદથી નુકસાન વેઠનારા વેપારીઓ માટે રાજ્ય સરકારે મહત્વની જાહેરાત કરી છે.

કેબિનેટના નિર્ણય મુજબ અમદાવાદમાં વરસાદના કારણે નુકસાન ભોગવનારા વેપારીઓને હવે સુરતમાં અપાયેલી સહાયના જ ધારાધોરણ મુજબ સહાય ચૂકવવામાં આવશે. એટલે કે સુરતમાં વરસાદી નુકસાન બાદ જે નિયમો અને માપદંડના આધારે સહાય આપવામાં આવી હતી, તે જ તમામ નિયમો અમદાવાદ માટે પણ લાગુ રહેશે. આ નિર્ણયથી શહેરના હજારો વેપારીઓ, દુકાનદારો તેમજ લારી-ગલ્લા ધારકોને સીધો લાભ મળશે તેવી આશા વ્યક્ત કરવામાં આવી રહી છે.

વિડિયોના આધારે સહાય માટે અરજી કરી શકશે

સરકારે સહાય મેળવવાની પ્રક્રિયા પણ સરળ બનાવી છે. વેપારીઓ વરસાદથી થયેલા નુકસાનના ફોટા અને વિડિયોના આધારે સહાય માટે અરજી કરી શકશે. આ ઉપરાંત નુકસાનનું સ્થળ પર સર્વે પણ કરવામાં આવશે, જેથી નુકસાનનું યોગ્ય મૂલ્યાંકન કરીને પાત્ર લાભાર્થીઓને સહાય ચૂકવી શકાય. સરકારનું કહેવું છે કે ફોટો-વિડિયો સાથેના પુરાવા અને સર્વેના આધારે સહાયની પ્રક્રિયા પારદર્શક રીતે હાથ ધરવામાં આવશે.

પશુઓ પ્રત્યે સંવેદના વ્યક્ત કરવામાં આવી

રાજ્યમાં ભારે વરસાદને કારણે કેટલાક વિસ્તારોમાં જાનહાનિ તેમજ પશુઓના મૃત્યુની ઘટનાઓ પણ સામે આવી છે. કેબિનેટ બેઠકની શરૂઆતમાં આવા દુઃખદ બનાવોમાં જીવ ગુમાવનારા લોકો અને પશુઓ પ્રત્યે સંવેદના વ્યક્ત કરવામાં આવી હતી. બેઠક દરમિયાન તેમને શ્રદ્ધાંજલિ અર્પણ કરવામાં આવી અને કુદરતી આફતમાં અસરગ્રસ્ત પરિવારો પ્રત્યે સરકારની સહાનુભૂતિ વ્યક્ત કરવામાં આવી.

કામગીરી કરીને વીજળી પૂર્વવત કરવામાં આવી

ભારે વરસાદ દરમિયાન વીજ પુરવઠો ખોરવાયો હોવા છતાં ઊર્જા વિભાગ દ્વારા અનેક વિસ્તારોમાં ઝડપી કામગીરી કરીને વીજળી પૂર્વવત કરવામાં આવી હતી. કેબિનેટ બેઠકમાં આ કામગીરીની નોંધ લેવામાં આવી હતી. મુખ્યમંત્રી ભૂપેન્દ્ર પટેલે અધિકારીઓને સ્પષ્ટ સૂચના આપી હતી કે વીજ પુરવઠો ઝડપથી પુનઃસ્થાપિત કરવાની સાથે મેદાનમાં કામ કરતા કર્મચારીઓની સુરક્ષાને પણ સર્વોચ્ચ પ્રાથમિકતા આપવામાં આવે. વરસાદી પરિસ્થિતિમાં વીજ વિભાગના કર્મચારીઓ જોખમ વચ્ચે કામ કરતા હોવાથી તેમની સલામતી અંગે વિશેષ ધ્યાન રાખવા પર ભાર મૂકવામાં આવ્યો હતો.

રમતગમત ક્ષેત્રની સિદ્ધિઓનો પણ ઉલ્લેખ કરવામાં આવ્યો

કેબિનેટ બેઠકમાં રમતગમત ક્ષેત્રની સિદ્ધિઓનો પણ ઉલ્લેખ કરવામાં આવ્યો હતો. હાલમાં કોમનવેલ્થ કાર્યક્રમ ગ્લાસ્ગોમાં યોજાઈ રહ્યો છે અને વિશ્વપટલ પર ભારતના ખેલાડીઓએ નોંધપાત્ર પ્રદર્શન કર્યું છે. રાજ્ય કેબિનેટે ખેલાડીઓને અભિનંદન પાઠવ્યા હતા. સાથે જ વર્ષ ૨૦૩૦માં ગુજરાતમાં કોમનવેલ્થ ગેમ્સ યોજાવાની સંભાવના અને તે માટે રાજ્યની તૈયારીઓ અંગે પણ હકારાત્મક ચર્ચા કરવામાં આવી હોવાનું જાણવા મળ્યું છે.

આ પણ વાંચો : 2023 પછી ગુજરાતના આ ગામમાં ખેડૂતો વાવણી જ નથી કરી શક્યા, 150 એકર જમીન પાણીમાં પણ તંત્રની ઉંઘ નથી ઉડતી

રાજ્ય સરકારના આ નિર્ણયો બાદ અમદાવાદના વેપારીઓમાં રાહતની લાગણી જોવા મળી રહી છે. હવે સુરતની જેમ જ અમદાવાદમાં પણ વરસાદથી થયેલા નુકસાન માટે સહાય ચૂકવાશે અને ફોટો-વિડિયો સહિતના પુરાવાના આધારે અરજી કરવાની સુવિધા મળતા અસરગ્રસ્ત વેપારીઓને સહાય મેળવવાની પ્રક્રિયા વધુ સરળ બનશે તેવી અપેક્ષા વ્યક્ત કરવામાં આવી રહી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ