ગુજરાત / ‘કોરોના વોરિયર’ની યાદીમાં કોવિડ પહેલાં મૃત્યુ પામેલા પોલીસકર્મીનું નામ! અમદાવાદ પોલીસના પોર્ટલ પર સવાલો

અમદાવાદ શહેર પોલીસના સત્તાવાર પોર્ટલ પર શહીદ પોલીસકર્મીઓ અને ‘કોરોના વોરિયર્સ’ની યાદીમાં ગંભીર તથ્યની વિસંગતતા સામે આવતાં પોલીસ વિભાગના રેકોર્ડની વિશ્વસનીયતા અંગે સવાલો ઊભા થયા છે. કેટલીક એન્ટ્રીમાં અધૂરી માહિતી છે તો કેટલીકમાં ઘટનાની વિગતો જ ખોટી અથવા ગેરહાજર હોવાનું સામે આવ્યું છે.

પોર્ટલ પર શહીદ તરીકે ૧૦ પોલીસકર્મીઓનાં નામ દર્શાવવામાં આવ્યાં છે, પરંતુ તેમાંથી માત્ર ત્રણની જ વિગતવાર માહિતી ઉપલબ્ધ છે. બાકીના સાત પોલીસકર્મીઓ અંગે માત્ર હોદ્દાે, પોલીસ સ્ટેશન અને મૃત્યુની તારીખ દર્શાવવામાં આવી છે, જ્યારે તેમને શહીદ તરીકે કેમ જાહેર કરાયા તેની કોઈ નોંધ આપવામાં આવી નથી.

જસવંતસિંહ ચૌહાણ અંગે જોવા મળી

સૌથી મોટી ખામી ઇસ્કોન ફ્લાયઓવર અકસ્માતમાં ફરજ દરમિયાન જીવ ગુમાવનારા ટ્રાફિક પોલીસકર્મી ધર્મેન્દ્રસિંહ પરમાર અને જસવંતસિંહ ચૌહાણ અંગે જોવા મળી છે. ર૦ જુલાઈ, ર૦ર૩ના રોજ તથ્ય પટેલની બેફામ કારની ટક્કરમાં બંનેનાં મોત થયાં હતાં, છતાં પોર્ટલ પર આ ઘટનાનો કોઈ ઉલ્લેખ નથી.

નોંધાયેલી માહિતી અને સત્તાવાર કેસની હકીકતો

બીજી તરફ ક્રાઇમ બ્રાંચના કોન્સ્ટેબલ ચંદ્રકાન્ત મકવાણાના કેસમાં પણ નોંધાયેલી માહિતી અને સત્તાવાર કેસની હકીકતો વચ્ચે વિસંગતતા હોવાનું સામે આવ્યું છે. પોર્ટલમાં દર્શાવાયેલી વિગતો ઘટનાક્રમ સાથે મેળ ખાતી નથી.

‘કોરોના વોરિયર્સ’ની યાદીમાં એક એવા પોલીસકર્મીનું નામ

વિસંગતતાઓ માત્ર શહીદોની યાદી પૂરતી મર્યાદિત નથી. પોર્ટલ પર દર્શાવાયેલા ર૩ ‘કોરોના વોરિયર્સ’ની યાદીમાં એક એવા પોલીસકર્મીનું નામ પણ સામેલ છે, જેમનું મૃત્યુ ૮ નવેમ્બર, ર૦૦૭ના રોજ થયું હતું એટલે કે કોવિડ-૧૯ મહામારી શરૂ થવાનાં લગભગ ૧૩ વર્ષ પહેલાં.

આ પણ વાંચો : RTOમાં કામ કરાવવું છે? પહેલા ઈ-ચલણ ભરો! બાકી દંડ હશે તો લાઈસન્સ-RC ટ્રાન્સફર સહિતની સેવા અટકશે

આ તથ્યની ભૂલોએ પોલીસ વિભાગના ડિજિટલ રેકોર્ડની ચોકસાઈ અને સંવેદનશીલ માહિતીના જતન અંગે પ્રશ્નો ઊભા કર્યા છે. શહીદ પોલીસકર્મીઓનાં બલિદાન અને કોરોના દરમિયાન ફરજ બજાવનાર કર્મચારીઓના સન્માન સાથે જોડાયેલા આવા રેકોર્ડમાં સંપૂર્ણ ચોકસાઈ જળવાય તે જરૂરી હોવાનું જાણકારો માને છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ