શ્રદ્ધા / બગદાણાવાળા બજરંગદાસ બાપાના આશ્રમની લોકોને અપીલ, AI, રીલ્સના ઉપયોગ અંગે કરી વાત

આજના ડિજિટલ યુગમાં સોશિયલ મીડિયા અને AI ટેકનોલોજીના વધતા ઉપયોગ વચ્ચે સંત શ્રી બજરંગદાસ બાપા વિશે ફેલાવવામાં આવતી કાલ્પનિક વાતો અને બનાવટી ચિત્રો એક અત્યંત ગંભીર બાબત છે. પૂજ્ય બાપાનું સમગ્ર જીવન પ્રભુ શ્રી રામચંદ્રજી પ્રત્યેની અગાધ શ્રદ્ધા, અખંડ સીતારામ જાપ, સરળતા અને બગદાણા ધામમાં સદાવ્રત જેવી પરમ સેવાભાવના પર આધારિત હતું.

બગદાણા આશ્રમે પોસ્ટ બહાર પાડી

બગદાણા આશ્રમે એક પોસ્ટ બહાર પાડીને કહ્યું કે બાપાએ કયારેય ચમત્કારોનો દાવો નથી કર્યો, પરંતુ પોતાની સાધના અને રામનામના બળે કરોડો શ્રદ્ધાળુઓના હૃદયમાં સ્થાન મેળવ્યું છે. પરંતુ આજે માત્ર વ્યુઝ અને લાઈકસ મેળવવાની ઘેલછામાં લોકો AI વડે કલ્પનાશીલ ફોટા અને મનઘડંત કહાનીઓ જોડીને રીલ્સ બનાવી રહ્યા છે, જે પૂજ્ય બાપાના વાસ્તવિક અને પવિત્ર સ્વરૂપ સાથે મોટો અન્યાય છે.

AIથી બનેલા બજરંગદાસ બાપાના ફોટા શેર ન કરો

બગદાણા આશ્રમે લોકોને અપીલ કરતા કહ્યું કે AIથી બનેલા બજરંગદાસ બાપાના ફોટા શેર ન કરો અને પૂજ્ય બાપાના મૂળ સ્વરુપને જાળવી રાખવું જોઈએ. બગદાણા આશ્રમે કહ્યું કાલ્પનિક વાર્તાઓથી બાપાની છબી વિકૃત ન કરો અને AI ફોટા અને મનઘડંત રીલ્સથી દૂર રહેવું જોઈએ. તેમણે કહ્યું કે આવનારી પેઢી સુધી

બાપાનો સાચો વારસો પહોંચાડવો જોઈએ.આશ્રમે એવું પણ કહ્યું કે સંતો શ્રદ્ધાનો વિષય છે, નહીં કે મનોરંજનનો.

બાપાએ ક્યારેય ચમત્કારોનો દાવો કર્યો નથી

આશ્રમે કહ્યું કે બજરંગદાસ બાપાએ ક્યારેય ચમત્કારોનો દાવો કર્યો નહોતો. આશ્રમ વતી એવું પણ કહેવાયું કે ભક્તોએ બાપાનો સાચો ઈતિહાસ અને સાચી ભક્તિ જાળવી રાખવી જોઈએ.

સંતો મનોરંજનનો નહીં શ્રદ્ધાનું પ્રતીક

આ પરિસ્થિતિમાં આપણી સૌની નૈતિક ફરજ બને છે કે આવી અવાસ્તવિક રીલ્સ કે ફોટાને આગળ શેર ન કરીએ અને તેને પ્રોત્સાહન આપવાનું બંધ કરીએ. સંતો એ કોઈ કલ્પના કે મનોરંજનનો વિષય નથી પણ શ્રદ્ધા અને સમર્પણનું પ્રતીક છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ