OMG / 65000નું નવું સ્કૂટર ખરીદ્યું, શોરૂમની બહાર આવ્યું અને આવ્યો 1 લાખનો મેમો

• નંબર પ્લેટ વગરના નવા નક્કોર સ્કૂટરને 1 લાખનો દંડ
• ઓડિશાના ભુવનેશ્વરની ઘટના 

એક લાખનો અધધધ દંડ

નોંધનીય છે કે, ઓડીશા પોલીસે એક બ્રાંડ ન્યૂ સ્કૂટરને અટકાવ્યુ હતું અને તેના માલિકની પૂછપરછ બાદ ડીલરને સીધો એક લાખ રુપિયાનો દંડ ફટકાર્યો હતો. આ સ્કૂટરના માલિકે ગત 28 ઓગષ્ટના રોજ ભુવનેશ્વર ખાતેથી ખરીદ્યું હતું.

રજિસ્ટ્રેશન પ્લેટ ન લગાવવાના આરોપથી ફટકાર્યો દંડ

12 મી સપ્ટેમ્બરના રોજ કટકના એક ચેકપોસ્ટ પર પરિવહન અધિકારીઓએ તેને અટકાવ્યું અને એક લાખ રૂપિયાનો દંડ ફટકાર્યો હતો. આ દંડ વાહન પર રજિસ્ટ્રેશન નંબર ન હોવાના કારણે RTO એ ડીલરને રજિસ્ટ્રેશન પ્લેટ ન લગાવવાના આરોપસર ફટકાર્યો હતો. જેની રકમ એક લાખ રૂપિયા હતી. 

ટ્રેડ લાયસન્સ રદ્દ કરવાના અપાયા આદેશ

આપને જણાવી દઇએ કે, અધિકારીઓએ મોટર વ્હીકલ એક્ટનું ઉલ્લંઘન કરવા બદલ ચલાણ કાપ્યું હતું. ત્યારબાદ, RTO એ ભુવનેશ્વરના અધિકારીઓને ડીલરનું ટ્રેડ લાયસન્સ રદ્દ કરવા માટે જણાવ્યું હતું, તેમણે કહ્યું કે, ડોક્યુમેન્ટ વગર વાહનની ડિલેવરી કેવી રીતે કરવામાં આવી. 

કટકના RTO દિપ્તી રંજન પાત્રોએ જણાવ્યું કે, જૂના મોટર વ્હીકલ અધિનિયમન હેઠળ ડીલરે ગ્રાહકોને વાહન સોંપતા પહેલા રજિસ્ટ્રેશન નંબર, ઈન્સ્યોરન્સ અને પોલ્યુશન સર્ટિફિકેટ સોંપવું જરુરી છે. વાહનની કિંમત 65000 ની આસપાસ છે. 

ટ્રકને ફટકારાયો હતો 6 લાખનો દંડ

નવા મોટર વ્હીકલ એક્ટ લાગૂ થયા બાદ વાહનોના તાબડતોડ ચલાણ કાપવામાં આવી રહ્યા છે. કેટલીક વખત ચલાણની રકમ એટલી વધુ હોય છે કે લોકો હેરાન થઇ જાય છે. હાલમાં એક કિસ્સો સામે આવ્યો છે જેમાં ઓડિસાના સંબલપુરમાં એક ટ્રક ડ્રાઇવરને 6 લાખ 53 હજાર 100 રૂપિયાનો દંડ ફટકારાયો છે.