- વડોદરામાં જાહેરમાં થૂંકનારા સામે કરાશે કાર્યવાહી
- શહેરમાં જાહેરમાં થૂંકતા લોકોને દંડ ફટકારવાની કાર્યવાહી
- કમાન્ડ એન્ડ કંટ્રોલ સેન્ટરના CCTVથી વાહનચાલકો પર નજર રખાશે
- CCTVના આધારે 33 વાહનચાલકને નોટિસ ફટકારી
- RTOમાંથી વિગત મેળવી 100 રૂપિયાનો દંડ ફટકારાશે
અમદાવાદ બાદ હવે વડોદરામાં પણ જાહેરમાં થૂંકનારા સામે કાર્યવાહી કરવામાં આવશે. જેના ભાગરૂપે હવે તંત્ર દ્વારા તમામ કવાયત કરી દેવાઈ છે. જે મુજબ શહેરમાં જાહેરમાં થૂંકતા લોકોને દંડ ફટકારવા માટે કમાન્ડ એન્ડ કંટ્રોલ સેન્ટરના CCTVથી વાહનચાલકો પર નજર રખાશે. જે બાદમાં RTOમાંથી વિગત મેળવી 100 રૂપિયાનો દંડ ફટકારાશે.
રાજ્યની મેટ્રો સિટી અમદાવાદમાં તાજેતરમાં જાહેરમાં થૂંકનારા વ્યક્તિઓ સામે તંત્રએ લાલ આંખ કરી હતી. આ તરફ હવે સંસ્કારી નગરી વડોદરામાં પણ આવો જ નિર્ણય કરવામાં આવ્યો છે. વડોદરામાં હવે જાહેરમાં થૂંકનારા સામે કાર્યવાહી કરવામાં આવશે. જે મુજબ શહેરમાં જાહેરમાં થૂંકતા લોકોને દંડ ફટકારવાની કાર્યવાહી શરૂ કરી દેવાઈ છે.
વડોદરામાં જાહેરમાં થૂંકતા લોકો માટે મોટા સમાચાર સામે આવ્યા છે. વડોદરામાં હવે કમાન્ડ એન્ડ કંટ્રોલ સેન્ટરના CCTVથી વાહનચાલકો પર નજર રખાઇ રહી છે. જે મુજબ CCTVના આધારે 33 વાહનચાલકને નોટિસ ફટકારી છે. આ તરફ હવે RTOમાંથી વિગત મેળવી 100 રૂપિયાનો દંડ ફટકારાશે.
અમદાવાદમાં તાજેતરમાં જ કરાયો છે નિર્ણય
અમદાવાદમાં પાન-મસાલાના શોખીનો માટે ઝટકા સમાન સમાચાર આવ્યા છે. અમદાવાદમાં જાહેરમાં થૂંકનારને દંડ ફટકારવામાં આવશે. અમદાવાદ મહાનગર પાલિકાએ જાહેરમાં રસ્તા પર પાન-મસાલા ખાઈ થૂંકી ગંદકી ફેલાવતા લોકોને દંડ ફટકારવાનું શરૂ કર્યું છે. શહેરમાં જાહેરમાં થૂંકનારને ઈ-મેમો ફટકારવામાં આવશે.
જાહેરમાં થૂંકનાર પર રખાશે બાજ નજર
શહેરના રસ્તા પર થૂંકનાર પર AMCના કમાન્ડ એન્ડ કંટ્રોલ સેન્ટરથી નજર રાખવામાં આવશે. જે બાદ મનપા આવા કેસોની વિગતો પોલીસને મોકલશે. છેલ્લા 2 મહિનાના 257 સ્પિટિંગ કેસ પોલીસને મોકલવામાં આવ્યા છે. મહત્વનું છે કે, સુરતમાં પણ આ નિયમ લાગું થઈ ચૂક્યો છે. અહીં જાહેરમાં થૂંકનાર સામે દંડનીય કાર્યવાહી કરવામાં આવી રહી છે.
સુરતમાં 18000 લોકો સામે કરાઈ કાર્યવાહી
એક રિપોર્ટ મુજબ, સુરતમાં જાહેર રસ્તા પર થૂંકનારા 18,000 લોકો સામે કડક કાર્યવાહી કરવામાં આવી છે. આ તમામ લોકોને દંડ ફટકારવામાં આવ્યો છે. શહેરનાં મેયર હેમાલી બોઘાવાળાએ જણાવ્યું હતું કે, સ્વચ્છ ભારત, સ્વચ્છ સુરત હેઠળ નાગરિકોમાં સ્વચ્છતા અંગે જાગૃતિ લાવવા મહાનગરપાલિકા દ્વારા ખાસ પહેલ કરવામાં આવી છે.
ગંદકી ફેલાવતા લોકો સામે કરાઈ રહી છે કાર્યવાહી
તેઓએ જણાવ્યું હતું કે, જાહેરમાં થૂંકતા અને ગંદકી ફેલાવતા લોકો સામે કાર્યવાહી કરવામાં આવી રહી છે. મહાનગરપાલિકાના ઈન્ટિગ્રેટેડ કમાન્ડ એન્ડ કન્ટ્રોલ સેન્ટર માધ્યમથી સુરત પોલીસ વિભાગના વિવિધ જાહેર સ્થળો ઉપર મૂકવામાં આવેલા સીસીટીવી કેમેરાથી મોનિટરિંગ કરીને જાહેર સ્થળ પર થૂંકતા લોકોની ઉપર નજર રાખી દંડનીય કાર્યવાહી કરવામાં આવી છે.
