દર્દ / 24 કલાકમાં રાજ્યમાં 5 લોકોના હાર્ટએટેકથી મોત, કોઈની ગરબાની છેલ્લી પ્રેક્ટિસ તો કોઈનું કારખાનામાં હાર્ટ ખોટકાયું

• ​​​​​રાજકોટમાં 24 કલાકમાં 3 લોકોને હાર્ટએટેક
• જૂનાગઢમાં ગરબાની પ્રેકટિસ દરમિયાન યુવકને આવ્યો હાર્ટએટેક
• વડોદરામાં ટ્રેનમાં મુસાફરોને આવ્યો હાર્ટએટેક

યુવાનોમાં વધતા હાર્ટએટેકના કિસ્સાએ તબીબ આલમમાં ચિંતાનો વિષય છે. કોરોના બાદ આ કિસ્સાઓમા દિવસેને દિવસે વધારો જોવા મળી રહ્યો છે. આવી સ્થિતિ વચ્ચે 24 કલાકમાં રાજ્યમાં 5 લોકોના હાર્ટએટેકથી મૃત્યુ નિપજયા હોવાનું બહાર આવ્યું છે. રાજકોટમાં 24 કલાકમાં 3 લોકોને હાર્ટએટેક આવ્યાક બાદ જૂનાગઢમાં ગરબાની પ્રેકટિસ દરમિયાન 24 વર્ષીય ચિરાગ પરમાર નામના યુવકને હાર્ટએટેક આવ્યો હતો. જેને લઈને યુવાનનું સારવાર દરમિયાન મોત થયું હોવાનું બહાર આવ્યું છે.

યુવાનોમાં હાર્ટ એટેકનું પ્રમાણ ચિંતાનો વિષય બન્યું

સાથે જ મોરબીના રફાળેશ્વર LLP કારખાનામાં કામકાજ દરમિયાન યુવકને હાર્ટએટેક આવ્યો હતો. જેમાં વિક્રમસિંહ તવર નામના યુવકનું કમકમાટીભર્યું મોત નીપજ્યું હતું. રાજકોટમાં તિરૂપતિ સોસાયટીમાં રહેતા કિશન ધાબલિયા, કોઠારિયા રોડ પરની સોસાયટીમાં રહેતા રાજેન્દ્રસિંહ વાળા અને અવધ હાઉસિંગમાં રહેતા મહેન્દ્ર પરમારનું એકાએક હાર્ટ બેસી જતા તેનું મોત નીપજ્યું હતું. આમ 24 કલાકમાં રાજ્યમાં 5 લોકોના હાર્ટએટેકથી મૃત્યુ નિપજતા અરેરાટી મચી ગઇ છે.

વડોદરામાં ટ્રેનમાં મુસાફરો દરમિયાન યુવાનને હાર્ટએટેક આવ્યો

વધુમાં વડોદરામાં ટ્રેનમાં મુસાફરો દરમિયાન યુવાનને હાર્ટએટેક આવ્યો હોવાનો પણ કિસ્સો સામે આવ્યો હતો. જે અંગે જાણ થતા જ મુસાફર કોન્સ્ટેબલ અને PI દોડી જઇ CPR આપી હતી. જે સારવાર કારગત નીવડી જતા યુવાનનો જીવ બચી ગયો હતો.

જાણી લો કે કોઈને પણ હાર્ટ એટેક ત્યારે આવે છે, જ્યારે દિલમાં બ્લડનો પ્રવાહ ઓછો કે અવરોધિત થઈ જાય છે. ઘણી વાર કોરોનરી ધમનીઓમાં કેલેસ્ટ્રોલ અને ફેટ જમા થઈ જવાને કારણે પણ આમ બને છે. દિલને બ્લડ સપ્લાય કરનાર વાહિકાઓને કોરોનરી ધમનીઓ કહેવાય છે. જણાવી દઈએ કે જો તમને હાર્ટ એટેકનું કોઈપણ લક્ષણ જોવા મળે, તો તેને ઇગ્નોર ન કરશો અને તરત જ ડોક્ટરનો સંપર્ક કરશો. 

 હાર્ટ એટેકના લક્ષણો

 હાર્ટ એટેક આવતા પહેલા આપણાં શરીરમાં ઘણા બદલાવ જોવા મળે છે. આ સંકેતોને જોતાં જ તરત જ એલર્ટ થઈ જવું જોઈએ અને ડૉક્ટરનો સંપર્ક કરવો જોઈએ. જણાવી દઈએ કે હાર્ટ એટેક આવતા પહેલા વ્યક્તિને છાતીમાં દુખાવો, જડબા કે દાંતમાં દુખાવો, શ્વાસ લેવામાં સમસ્યા, પરસેવો આવવો, ગેસ થવો, ચક્કર આવવા, માથું ફરવું, બેચેની થવી જેવી ફરિયાદો જોવા મળે છે.