બંગાળ / ખરેખર ગજબ કહેવાય ! નદીમાં તરતા મળ્યાં 38 લાખના નવા 317 મોબાઈલ, આવી રીતે મૂકાયા પાણીમાં

• બોર્ડર સિક્યુરીટી ફોર્સને નદીમાં તરતા મળ્યાં 317 મોબાઈલ 
• બંગાળમાં બાંગ્લાદેશ તરફ વહેતી પગલા નદીમાંથી ઝડપાયા
• કેળના પાન સાથે બાંધેલા કેનમાં રખાયા હતા મોબાઈલ
• મળેલા મોબાઈલની કિંમત 38 લાખથી વધુ 

ભારત-બાંગ્લાદેશ સરહદે બાંગ્લાદેશ તરફ વહેતી પગલા નદીમાં મોબાઈલની દાણચોરીની એક ઘટના સામે આવી છે.  બાંગ્લાદેશ તરફ પગલા નદીમાં તરતી કેળાની દાંડી સાથે બાંધેલા પ્લાસ્ટિકના કન્ટેનરમાં મોબાઇલ ફોન શનિવારે બોર્ડર સિક્યુરિટી ફોર્સ (બીએસએફ) દ્વારા જપ્ત કરવામાં આવ્યા હતા. દક્ષિણ બંગાળ ફ્રન્ટિયર હેઠળની 70મી બટાલિયનના સૈનિકોએ નદીમાં તરતા કેટલાક કેન જોયા હતા. આ પછી જવાનો દ્વારા તેની ઝડતી લેવામાં આવી હતી અને કેનને કબજે કરાયા હતા અને ખોલીને જોતા તેમાંથી 317 મોબાઈલ મળી આવ્યાં હતા જેની બજાર કિંમત 38 લાખથી વધુ છે. 

BSF troops of Border Out Post Lodhia noticed that some plastic containers tied to banana stems are floating along Pagla river towards Bangladesh. Jawans immediately took them out & when opened, found 317 pieces of mobile phones, estimated to cost Rs 38 lakhs pic.twitter.com/nwqPzO7h9U

— ANI (@ANI) October 9, 2022

સરહદી ચોકી લોઢિયાના સૈનિકોએ ઝડપી પાડ્યાં નદીમાં તરતા મોબાઈલ 
બીએસએફએ એક નિવેદનમાં જણાવ્યું હતું કે, સરહદી ચોકી લોઢિયાના સૈનિકોએ પગલા નદીમાં કેળાની દાંડી સાથે બાંધેલા કેટલાક પ્લાસ્ટિકના કન્ટેનર બાંગ્લાદેશ તરફ તરતા જોયા હતા. જાગૃત જવાનોએ તાત્કાલિક નદીમાંથી કન્ટેનર બહાર કાઢ્યા હતા અને જ્યારે તેઓએ તેને ખોલ્યા ત્યારે તેમની પાસેથી વિવિધ કંપનીઓના 317 મોબાઇલ ફોન મળી આવ્યાં હતા જેની  કિંમત આશરે 38,83,000 રૂપિયા હોવાનો અંદાજ છે. ફોન જપ્ત કર્યા બાદ તેને કાયદેસરની કાર્યવાહી માટે સ્થાનિક પોલીસને સોંપવામાં આવ્યા હતા. 

મોબાઈલની દાણચોરીનું કૃત્ય હોઈ શકે 
બીએસએફના અધિકારીઓને શંકા છે કે આ કોઈ દાણચોરીનું કૃત્ય હોઈ શકે. 70મી બટાલિયનના કમાન્ડિંગ ઓફિસરે જણાવ્યું હતું કે, બોર્ડર સિક્યોરિટી ફોર્સ ભારત-બાંગ્લાદેશ બોર્ડર પર દાણચોરીને રોકવા માટે કડક પગલાં લઈ રહ્યું છે. આ કારણે દાણચોરી જેવી પ્રવૃત્તિ સાથે સંકળાયેલા લોકોને ઘણી મુશ્કેલીઓનો સામનો કરવો પડી રહ્યો છે અને તેમાંથી કેટલાકને પકડવામાં આવી રહ્યા છે, જેમને કાયદા મુજબ સજા પણ કરવામાં આવી રહી છે.