રાજ્યમાં ભદરવો ભરપૂર હોય તેમ આજે અનેક જિલ્લાઑમાં ધીંગી મેઘમહેર થઇ હતી. જેને લઇને અનેક ડેમો પણ ઓવરફલો થયા છે.
Share
બોટાદ અને ગઢડામા એક કલાકમાં બે ઇંચ વરસાદ
વરસાદને પગલે નીચાણવાળા વિસ્તારોમાં પાણી ભરાયા
કરજણ ડેમના 4 દરવાજા ખોલવામાં
હવામાન વિભાગ દ્વારા કરવામાં આવેલી અગાહીને લઇને આજે સતત ચોથા દિવસે પણ રાજ્યના અનેક શહેરોમાં મેઘાવી માહોલ જોવા મળી રહ્યો છે. ત્યારે આજે બોટાદ અને ગઢડામા ધોધમાર વરસાદ ત્રાટકયો હતો. મેઘરાજાએ તોફાની બેટિંગ કરી એક કલાકમાં બે ઇંચ જેટલુ પાણી વરસાવી દીધું હતું. સાંજના સમયગાળા દરમિયાન કડાકા ભડાકા સાથે જીનનાકા, પોલીસ લાઇન, મધરપાટ રોજમળ વાવડી સહિતના વિસ્તારમાં ધોધમાર વરસાદ પડ્યો હતો. વરસાદને પગલે નીચાણવાળા વિસ્તારોમાં પાણી ભરાયા હતા.
બાગાયતી પાકને નુકસાન
બીજી તરફ ખેડા જિલ્લાના ગળતેશ્વર તાલુકામાં અને બનાસકાંઠામાં પણ ભારે પવન સાથે વરસાદનું આગમન થયું હતુ. વધુમાં ભારે પવનથી બાગાયતી પાકને નુકસાન થયું હોવાનું પણ જાણવા મળી રહ્યું છે. વધુમાં થરાદમાં પણ ભારે પવન ફૂંકાતા ખેતરમાં પશુઓ માટે બનાવેલ અનેક સેડ ભારે પવનથી ઊડ્યાં હતા. અને થરાદના ડોડ ગામે ભારે પવનથી બાગાયતી પાકને પણ નુકસાન થયું હતું. ઉપરાંત સુરત, સુત્રાપાડા,જંબુસર, વેરાવળ, દ્વારકા, ખંભાળિયા, પારડી, કલ્યાણપુર, લાલપુર, જુનાગઢના માંગરોળ, માળિયા, જામજોધપૂર, પાલનપુર,અબડાસા,ભરૂચ સહીતના વિસ્તારોને આજે મેઘરાજાએ ઘમરોડયા હતા. અમરેલી જિલ્લામાં પણ ભારે વરસાદથી રસ્તા પર નદીઓ વહેતી થઇ હતી. જેને લીધે પદ્માવતી નદીમાં પુર આવ્યું હતું.
આ ડેમો થયા ઓવરફ્લો
ઉપરવાસમાં ભારે વરસાદને કારણે સુરતના કડાણા ડેમમાં પાણીની આવક વધી હતી. ડેમમાં 18 હજાર 435 ક્યુસેક પાણીની આવક થતાં ડેમની સપાટી 418.6 ફૂટે પહોંચી છે. વધુમાં ઉકાઈ ડેમમાંથી 97 હજાર ક્યુસેક પાણી છોડાયુ હતું જેને લઇને હરિપુરા કોઝવે પાણીમાં ગરકાવ થયો હતો. માંડવી અને બારડોલી તાલુકાને જોડતો કોઝવે પાણીમાં ગરકાવ થતાં વાહન વ્યવહાર બંધ કરાયો હતો. તથા શેત્રુંજી ડેમમાં પાણીની આવક થતા ડેમ 90 ટકાથી વધુ ભરાયો છે જે એક દિવસની અંદર ઓવરફ્લો થાય તેવી શક્યતા જોવા મળી રહી છે. વધુમાં નર્મદાનો કરજણ ડેમ સંપૂર્ણ ભરાતા કરજણ ડેમના 4 દરવાજા ખોલવામાં આવ્યા હતા. 25 હજાર ક્યુસેક પાણીની આવક સામે 11 હજાર 442 ક્યુસેક પાણી છોડાયું હતું. જેથી હાલ ડેમની સપાટી 112.36 મીટર પર છે. તેમજ જામનગરનો સસોઈ ડેમ પણ ઓવરફ્લો થવાની તૈયારીમાં છે. જે ગમે તે ઘડીએ ઓવરફલો થઇ શકે છે. સસોઈ ડેમથી 35 જેટલા ગામને સિંચાઈનું પાણી મળે છે.
