World Cup 2023 / વર્લ્ડકપ ફાઈનલ: 'ઑસ્ટ્રેલિયાને હરાવવું સરળ નથી...', યુવરાજ સિંહે કેપ્ટન રોહિત શર્માને આપી ચેતવણી

• વર્લ્ડ કપ 2023 ફાઈનલને લઈને યુવરાજ સિંહનું મોટું નિવેદન
• ટીમ ઈન્ડિયાનાં કેપ્ટન રોહિત શર્માને આપી ચેતવણી
• કહ્યું ઑસ્ટ્રેલિયાને હરાવવું સરળ નથી..

વિશ્વકપ 2023ની ફાઈનલ મેચ આવતીકાલે 19 નવેમ્બરનાં રોજ અમદાવાદનાં નરેન્દ્ર મોદી સ્ટેડિયમ ખાતે થવાની છે. ભારત અને ઑસ્ટ્રેલિયા વચ્ચેની આ મેચ માટે સમગ્ર વિશ્વ તત્પર છે. આ વખતે ટીમ ઈન્ડિયાને ટ્રોફીના હકદાર માનવામાં આવી રહ્યાં છે. તેવામાં ભારતીય ટીમનાં પૂર્વ ખેલાડી અને ઓલરાઉંડર યુવરાજ સિંહનું મોટું નિવેદન સામે આવ્યું છે. 2011 વિશ્વકપમાં પ્લેયર ઑફ ધ મેચ બનનારા યુવરાજ સિંહે ચેતવણી આપતાં કહ્યું કે ઑસ્ટ્રેલિયાને ફાઈનલમાં હરાવવું એટલું સરળ નથી..

રોહિતને આપી ચેતવણી
વિશ્વકપ 2023ની ફાઈનલ મેચથી પહેલાં યુવરાજ સિંહે કહ્યું કે ઑસ્ટ્રેલિયાએ અનેક વખત ટાઈટલ પોતાને નામ કર્યું છે અને ઑસ્ટ્રેલિયાને દબાણ સહન કરવું ઘણી સારી રીતે આવડે છે. આપણે જોયું કે સેમીફાઈનલ મેચમાં પેટ કેમિન્સ અને મિશેલ સ્ટાર્કે કેવીરીતે પ્રેશરને હેન્ડલ કર્યું અને ટીમને જીત અપાવી. તેમના તો તમામ ટોપ બેટર આઉટ થઈ ગયાં હતાં અને મેચ સાઉથ આફ્રીકાનાં હાથમાં હતી. તેવામાં તેમણે જીત મેળવી. ઑસ્ટ્રેલિયાનો ફાઈનલ જેવી મોટી મેચો જીતવાનો સ્વભાવ રહ્યો છે તેથી રોહિત માટે આ વિજય એટલી સરળ નહીં રહે.

ઑસ્ટ્રેલિયાએ પોતાનું સર્વશ્રેષ્ઠ આપવું પડશે- યુવી
આગળ યુવરાજસિંહે કહ્યું કે, 'વર્ષ 2003નાં વનડે વર્લ્ડકપમાં જેવું પ્રદર્શન ઑસ્ટ્રેલિયા કરી રહ્યું હતું અને ટીમે તમામ મેચ જીતીને ટાઈટલ પોતાના નામ કર્યું હતું એવી જ રીતે હવે મને ટીમ ઈન્ડિયા માટે અનુભવાઈ રહ્યું છે. ઑસ્ટ્રેલિયાએ ફાઈનલમાં પોતાનું સર્વશ્રેષ્ઠ આપવું પડશે કારણકે તેમની પાસે ભારત વિરોધી કોઈ મોકો રહ્યો નથી.'