વિશ્વ / અમેરિકામાં ભયંકર ઠંડી વચ્ચે બરફવર્ષા, 1,800થી વધુ ફ્લાઇટ્સ રદ

America Storms : અમેરિકાના અનેક રાજ્યોમાં ભારે ઠંડી અને બરફવર્ષા કારણે જનજીવન અસ્તવ્યસ્ત બન્યું છે. શિયાળાના શક્તિશાળી તોફાનને કારણે દેશભરના ઘણા એરપોર્ટ પર ફ્લાઇટ્સની અવરજવર પર ગંભીર અસર પડી છે. હજારો મુસાફરોને તેમની મુસાફરી રદ કરવી પડી છે અથવા લાંબા વિલંબનો સામનો કરવો પડી રહ્યો છે.

એરલાઇન્સના અહેવાલ મુજબ અત્યાર સુધીમાં 1,800થી વધુ ફ્લાઇટ્સ રદ કરવામાં આવી છે, જ્યારે 22,000થી વધુ ફ્લાઇટ્સ મોડી પડી છે. ખાસ કરીને ગ્રેટ લેક્સ વિસ્તારથી લઈને ઉત્તરપૂર્વી અમેરિકા સુધી બરફ અને ઠંડીનો જોર વધારે જોવા મળી રહ્યો છે, જેના કારણે ન્યૂ યોર્ક, ન્યૂ જર્સી, મિશિગન અને આસપાસના વિસ્તારોમાં એરપોર્ટની કામગીરી પર અસર પડી છે.

મોટા શહેરોમાં બરફવર્ષાની ચેતવણી

રાષ્ટ્રીય હવામાન વિભાગે જણાવ્યું છે કે,ન્યૂ યોર્ક સિટી, લોંગ આઇલેન્ડ અને આસપાસના વિસ્તારોમાં 4થી 8 ઇંચ સુધી બરફ પડવાની સંભાવના છે. કેટલાક વિસ્તારોમાં તો 9 ઇંચ સુધી ભારે બરફવર્ષા થઈ શકે છે. આ ચેતવણી શુક્રવાર સાંજથી શનિવાર બપોર સુધી અમલમાં રહેશે. જોન એફ. કેનેડી, લાગાર્ડિયા અને ડેટ્રોઇટ જેવા મોટા એરપોર્ટોએ મુસાફરોને આગોતરા ચેતવણી આપી છે કે, તેમની ફ્લાઇટ્સ મોડી પડી શકે છે અથવા રદ થઈ શકે છે. મુસાફરોને એરપોર્ટ જતાં પહેલા પોતાની ફ્લાઇટની માહિતી તપાસવાની સલાહ આપવામાં આવી છે.

સૌથી વધુ ફ્લાઇટ્સ રદ કરનાર એરલાઇન્સ

જેટબ્લુ એરવેઝે સૌથી વધુ 225 ફ્લાઇટ્સ રદ કરી છે. ત્યારબાદ ડેલ્ટા એર લાઇન્સ, રિપબ્લિક એરવેઝ, અમેરિકન એરલાઇન્સ અને યુનાઇટેડ એરલાઇન્સનો ક્રમ આવે છે. ભારે બરફ અને ખરાબ હવામાનને કારણે આ પગલાં લેવાની ફરજ પડી છે. માત્ર પૂર્વી અમેરિકા જ નહીં, પરંતુ પશ્ચિમ ભાગોમાં પણ ભારે હિમવર્ષાની શક્યતા છે. કેલિફોર્નિયાના ઊંચા પર્વતીય વિસ્તારોમાં 1થી 3 ફૂટ સુધી બરફ પડી શકે છે, જ્યારે કેટલાક રસ્તાઓ પર મુસાફરી જોખમી બની શકે છે.

રજાઓના સમયમાં વધતી મુશ્કેલી

આ સમય રજાઓનો હોવાથી લાખો લોકો મુસાફરી કરે છે. અંદાજ મુજબ આ વર્ષે ગયા વર્ષ કરતાં વધુ લોકો લાંબી મુસાફરી કરશે. પરંતુ અચાનક આવેલા આ શિયાળાના તોફાને મુસાફરોની મુશ્કેલી વધારી દીધી છે.

આ પણ વાંચો : રશિયા-યુક્રેન યુદ્ધને લઈને શાંતિ તરફ મહત્વપૂર્ણ ચર્ચા: ઝેલેન્સકી અને ટ્રમ્પની અહીં થશે મુલાકાત

લા નીનાનો પ્રભાવ

હવામાન નિષ્ણાતોનું કહેવું છે કે આ ખરાબ હવામાન પાછળ ‘લા નીના’ નામની આબોહવા પ્રક્રિયા જવાબદાર છે. આ પ્રક્રિયા કારણે હવામાનમાં અચાનક ફેરફાર થાય છે અને ક્યારેક ભારે ઠંડી, બરફવર્ષા અને કુદરતી આફતો સર્જાય છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ