ઇઝરાયલ-ઈરાન તણાવ / તહેરાનમાં ખામેનેઈના 'રાઈટ હેન્ડ'ના મોતથી ઈરાનને ભારે નુકસાન, ઇઝરાયલે બતાવ્યું વિનાશક રૂપ

Israel-Iran War: ઈરાન અને ઇઝરાયલ વચ્ચે ચાલી રહેલો તણાવ હવે વધુ ખતરનાક તબક્કે પહોંચી ગયો છે. ઈરાનના સર્વોચ્ચ નેતા અયાતુલ્લાહ અલી ખામેનેઈના સૌથી વિશ્વાસુ સલાહકારોમાંના એક અલી શામખાનીના મૃત્યુના સમાચારે સમગ્ર ઈરાનને હચમચાવી નાખ્યું છે. ઈરાનના સરકારી મીડિયાએ પુષ્ટિ આપી છે કે ઇઝરાયલના પહેલા હવાઈ હુમલામાં ગંભીર ઇજાઓને કારણે અલી શામખાનીનું મૃત્યુ થયું.

એવું કહેવામાં આવી રહ્યું છે કે ઇઝરાયલે ઈરાનના લશ્કરી અને ગુપ્તચર મથકો પર પ્રારંભિક હવાઈ હુમલા કર્યા ત્યારે અલી શામખાની ગંભીર રીતે ઘાયલ થઈ ગયો હતો. બે દિવસ સુધી હોસ્પિટલમાં તેમની સારવાર કરવામાં આવી, પરંતુ તેમને બચાવી શકાયા નહીં. શામખાનીને ખામેનેઈના વ્યૂહાત્મક સલાહકાર અને ઈરાનની રાષ્ટ્રીય સુરક્ષા નીતિના મુખ્ય શિલ્પી માનવામાં આવતા હતા.

સેના પર પણ અસર પડશે

આ મૃત્યુ ફક્ત એક વ્યક્તિનું નથી, પરંતુ તેને ઈરાનની વ્યૂહાત્મક કરોડરજ્જુ તૂટવા તરીકે જોવામાં આવી રહ્યું છે. અલી શામખાનીએ વર્ષો સુધી ઈરાની નેવીનું નેતૃત્વ કર્યું હતું, અને ઈરાનની સુપ્રીમ નેશનલ સિક્યુરિટી કાઉન્સિલના વડા પણ હતા. તેમના જવાથી માત્ર રાજકીય નુકસાન પર જ નહીં, પરંતુ લશ્કરી સંતુલન પર પણ ઊંડી અસર પડી શકે છે.

હવે ચુપ નહીં બેસે ઈરાન

આ મૃત્યુ પછી ઈરાનમાં ગુસ્સાની લહેર ફેલાઈ ગઈ છે. તેહરાનના રસ્તાઓ પર વિરોધ પ્રદર્શનો શરૂ થઈ ગયા છે અને સરકાર પર બદલો લેવાનું દબાણ વધી રહ્યું છે. ઈરાની સંસદના ઘણા સાંસદોએ આ હુમલાને યુદ્ધની શરૂઆત ગણાવી છે. વરિષ્ઠ સૈન્ય અધિકારીઓએ ચેતવણી આપી છે કે ઈરાન હવે ચૂપ નહીં બેસે.

ઈરાનને કેટલું નુકસાન થયું

રેડ ક્રેસન્ટ સોસાયટીના પ્રવક્તા બાબાક મહમૂદી ખાલદીના જણાવ્યા અનુસાર, ઈરાનના 31 માંથી 18 પ્રાંતો ઇઝરાયલી હુમલાઓથી ખરાબ રીતે પ્રભાવિત થયા છે. ઈરાની મીડિયા અને અધિકારીઓ તરફથી સામે આવી રહેલી માહિતી અનુસાર, ઇઝરાયલી હુમલાઓમાં વધુ એક પરમાણુ વૈજ્ઞાનિક અલી મન્સૂર બકુઈનું મૃત્યુ થયું છે. મઝંદરન પ્રાંતના ગવર્નર જનરલે આ માહિતી આપી. આ પહેલા પણ, ઇઝરાયલ પર ઈરાની પરમાણુ કાર્યક્રમ સાથે સંકળાયેલા વૈજ્ઞાનિકોને નિશાન બનાવવાનો આરોપ મૂકવામાં આવ્યો છે, અને હવે આ હુમલાઓ તે આરોપોને મજબૂત બનાવી રહ્યા છે.

આ પણ વાંચો: ઈરાન-ઇઝરાયલ યુદ્ધ: ભારતે તેના નાગરિકો માટે જાહેર કરી એડવાઇઝરી, 24x7 હેલ્પલાઈન પણ શરૂ

ઇઝરાયલી મીડિયા અહેવાલો અનુસાર, ઇઝરાયલનું સુરક્ષા મંત્રીમંડળ હવે ઈરાનમાં તેના હુમલાઓનો વ્યાપ વધારવાનું વિચારી રહ્યું છે. આ સંકેતો સ્પષ્ટપણે દર્શાવે છે કે આ માત્ર પ્રારંભિક હુમલો નહોતો, પરંતુ એક લાંબી રણનીતિનો ભાગ છે. જો ઈરાન અને ઇઝરાયલ વચ્ચેનો તણાવ આ રીતે વધતો રહેશે તો સમગ્ર પશ્ચિમ એશિયા મોટા સંઘર્ષ તરફ આગળ વધી શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ