ક્રિકેટ / વસીમ અકરમે આ ભારતીય ખેલાડીની ઇન્ઝમામ-ઉલ-હક સાથે કરી તુલના, કહ્યું 'તેની બેટિંગ જોતા જ...'

• આ ભારતીય ખેલાડીના કર્યા વખાણ
• પૂર્વ દિગ્ગજ ખેલાડી ઈંજમામ ઉલ હક સાથે સરખામણી કરી
• ‘આ ખેલાડી કોઈપણ બોલર સામે શાનદાર શોટ મારે છે’

વર્લ્ડ કપની છેલ્લી લીગ મેચમાં રોહિત શર્મા ફરી એકવાર સદી ફટકારવાથી ચૂકી ગયા છે અને 61 રન પર આઉટ થયા છે. રોહિત શર્માએ 54 બોલમાં 61 રન કર્યા છે, જેમાં 8 ચોગ્ગા અને 2 છગ્ગા શામેલ છે. હિટ મેન રોહિત શર્માએ 112.96ના સ્ટ્રાઈક રેટથી રન કર્યા હતા. રોહિત શર્મા સદી ફટકારી શક્યા નથી, પરંતુ તેમની વાહવાહી કરવામાં આવી રહી છે. રોહિત શર્માએ વર્લ્ડ કપ 2023માં શાનદાર બેટીંગ કરી છે. પાકિસ્તાનના પૂર્વ બોલર વસીમ અકરમે રોહિત શર્માની બેટીંગ બાબતે જણાવ્યું છે અને રોહિતની સરખામણી પાકિસ્તાનની પૂર્વ દિગ્ગજ ખેલાડી ઈંજમામ ઉલ હક સાથે કરી છે. 

વસીમ અકરમે જણાવ્યું કે, ‘રોહિત શર્મા જ્યારે બેટીંગ કરવા આવે છે, ત્યારે એવું લાગે છે કે તેઓ સરળતાથી બેટીંગ કરી રહ્યા છે. બધા શોટ એટલી સરળતાથી રમે ત્યારે લાગે છે કે, રોહિતને રોકવા માટે બોલર પાસે કોઈ લેંથ નથી.’

વસીમ અકરમે વધુમાં જણાવ્યું કે, ‘તેમની બેટીંગ જોઈને ઈંજમામ ઉલ હકની યાદ આવે છે. રોહિત પાસે વધુ ટાઈમ છે. ફાસ્ટ બોલર સામે પણ સરળતાથી રમે છે. રોહિત શર્માની બેટીંગમાં ઈંજમામની ઝલક જોવા મળે છે. બેટીંગ કરે ત્યારે એવું લાગે છે કે, તેમની પાસે ઘણો સમય છે અને એન્ડ સુધી રમશે. રોહિત શર્મા શાનદાર બેટ્સમેન છે, કોઈપણ પરિસ્થિતિમાં શાનદાર રીતે શોટ ફટકારે છે.’

શોએબ મલિકે રોહિત શર્માની બેટીંગ વિશે જણાવ્યું છે કે, ‘કોહલી, રાહુલ તથા અન્ય બેટ્સમેન કોઈ એક બોલર સામે નિશાન સાધે છે. રોહિત શર્મા કોઈપણ બોલર સામે શાનદાર શોટ ફટકારવાની કાબેલિયત ધરાવે છે.’ ભારતીય ટીમે વર્લ્ડ કપ 2023ની છેલ્લી લીગ મેચમાં નેધરલેન્ડને 160 રનથી મ્હાત આપી છે અને 9મી મેચમાં જીત મેળવી છે. અગાઉ 2003ના વર્લ્ડ કપમાં ભારતે સતત 8 મેચાં જીત મેળવી હતી.