નારાજગી / ચૂંટણી પહેલાં કોંગ્રેસના દિગ્ગજ નેતાનું રાજીનામું, કહ્યું રાજ્યની ટીમ સાથે કામ કરવું અઘરું

કેરળ વિધાનસભાની ચૂંટણીના થોડા સમય પહેલા કોંગ્રેસને એક મોટો ઝટકો લાગ્યો છે. કેરળના કોંગ્રેસના સિનિયર નેતા પીસી ચાકોએ પાર્ટી છોડવાની જાહેરાત કરી દીધી છે.

પીસી ચાકોએ કહ્યું કે મેં કોંગ્રેસ છોડી દીધી છે અને પાર્ટી અધ્યક્ષ સોનિયા ગાંધીને રાજીનામુ મોકલી આપ્યું છે.

I have quit Congress and sent my resignation to party's interim chief Sonia Gandhi: Senior Congress leader PC Chacko pic.twitter.com/YJsoZch1oE

— ANI (@ANI) March 10, 2021

પોતાના રાજીનામાના પત્રમાં ચાકોએ કહ્યું મેં પાર્ટી માટે તનતોડ મહેનત કરી છે પરંતુ હવે મારે માટે કેરળ કોંગ્રેસમાં કામ કરવું અશક્ય બન્યું છે. કોંગ્રેસના તમામ નિર્ણયોને મેં ટેકો આપ્યો છે પરંતુ હવે મારે માટે કોંગ્રેસને ટેકો આપવો  અઘરો બન્યો છે. તમે એક કેન્દ્રીય નેતાની આગેવાનીમાં પાર્ટીને ન ચલાવી શકો.

પીસી ચાકોએ કોંગ્રેસ પર કર્યાં ગંભીર આક્ષેપ
પોતાના રાજીનામા બદલ પીસી ચાકોએ કેરળ કોંગ્રેસ લીડરશીપને જવાબદાર ઠેરવી. તેમણે કહ્યું કે કેરળમાં કોંગ્રેસ બે જૂથો વચ્ચે ચાલી રહી છે અને મોવડીમંડળ મૂકપ્રેક્ષક બનીને જોઈ રહ્યું છે.ચાકોએ કહ્યું કે કેરળમાં કોંગ્રેસ એક પાર્ટી તરીકે નહીં પરંતુ બે જૂથ વચ્ચે કોર્ડિનેશન કમિટી તરીકે કાર્ય કરી રહી છે. ગ્રુપ લીડર એ અને આઈ કોંગ્રેસનું સંચાલન કરી રહ્યાં છે. ઈલેક્શન કમિટીની અંદર વિધાનસભાની ચૂંટણી માટે ઉમેદવારો અંગે ચર્ચા પણ થતી નથી. કેરળ કોંગ્રેસ નેતા ઓમન ચાંડી અને રમેશ ચેન્નીથલા પર પ્રહાર કરતા ચાકોએ જણાવ્યું કે આ બન્ને નેતાઓ પાર્ટીમાં જૂથવાદ ચલાવી રહ્યાં છે અને હાઈ કમાન્ડ મૂકપ્રેક્ષક બનીને જોઈ રહ્યો છે. મારાથી આ જોવાતું નથી અને તેથી મારે માટે રાજીનામું આપવા સિવાય બીજો કોઈ વિકલ્પ બચ્યો નથી. 

વાયનાડમાં 4 નેતાઓએ રાજીનામું આપ્યું હતું
ગત અઠવાડિયે પૂર્વ કોંગ્રેસ અધ્યક્ષ રાહુલ ગાંધીના સંસદીય મતવિસ્તાર વાયનાડમાં 4 નેતાઓએ રાજીનામું આપ્યું હતું. કેરળ પ્રદેશ કોંગ્રેસ કમિટીના પૂર્વ સભ્ય કેકે વિશ્વનાથન, કેપીસીસી સચિવ એમએસ વિશ્વનાથન, ડીસીસી મહાસચિવ પીકે અનિલ કુમાર અને મહિલા કોંગ્રેસ નેતા સુજાયા વેણુગોપાલે પણ પાર્ટીમાંથી રાજીનામું આપી દીધું હતું.