દુર્ઘટના / UPના અમેઠીમાં ગમખ્વાર અકસ્માત, જાનૈયાઓથી ભરેલી બોલેરો ટ્રક સાથે અથડાતા 6નાં મોત તો 4 ઘાયલ

• UPના અમેઠીમાં મોડી રાત્રે ભયાનક માર્ગ અકસ્માત
• જાનૈયાઓથી ભરેલી બોલેરો ટ્રક સાથે ધડાકાભેર અથડાઇ
• અકસ્માતમાં છ લોકોના મોત થયા છે જ્યારે ચાર લોકો ઘાયલ

ઉત્તરપ્રદેશના અમેઠીના ગૌરીગંજ પોલીસ સ્ટેશન વિસ્તારમાં લગ્નમાંથી પરત ફરી રહેલા જાનૈયાઓથી ભરેલી સ્પીડમાં જઇ રહેલી બોલેરો સામેથી આવી રહેલા ટ્રક સાથે ધડાકાભેર અથડાઈ હતી. જેથી આ અકસ્માતમાં છ લોકોના મોત થયા છે જ્યારે ચાર લોકો ઘાયલ થયા છે. હાલમાં ઘાયલોની હાલત નાજુક હોવાનું કહેવાય છે.

उत्तर प्रदेश: अमेठी में गौरीगंज कोतवाली क्षेत्र के बाबूगंज सागर के पास सड़क दुर्घटना में एक बच्चे सहित 6 लोगों की मृत्यु हो गई।

SP दिनेश सिंह ने बताया, "सभी नसीराबाद से बारात से लौट रहे थे तभी उनकी गाड़ी दुर्घटनाग्रस्त हुई। जिसमें 6 लोगों की मृत्यु हुई है और 3 लोग घायल हैं।" pic.twitter.com/quGHAa8ElG

— ANI_HindiNews (@AHindinews) April 18, 2022

મળતી માહિતી મુજબ, રવિવારે મધરાત બાદ લગભગ 12.15 વાગ્યે જાનમાંથી પરત ફરી રહેલી બોલેરો ગંભીર રોડ અકસ્માતનો શિકાર બની હતી. રાયબરેલી જિલ્લાના નસીરાબાદ વિસ્તારમાં શોભાયાત્રામાંથી પરત ફરી રહેલી બોલેરોમાં કેટલાંક બાળકો પણ સવાર હતા. બોલેરો હજુ તો ગૌરીગંજ પોલીસ સ્ટેશન વિસ્તારમાં બાબુગંજ જ પહોંચી હતી ત્યારે સામેથી આવતી ટ્રક ધડાકાભેર અથડાઈ હતી.

ટક્કર એટલી જોરદાર હતી કે બોલેરો ફંગોળાઇ ગઇ

હાઇસ્પીડ બોલેરો અને ટ્રક વચ્ચેની ટક્કર એટલી જોરદાર હતી કે બોલેરો ફંગોળાઇ ગઇ. બે વાહનોની ટક્કરનો જોરદાર અવાજ સાંભળીને આસપાસના લોકો પણ તુરંત ઘટનાસ્થળે દોડી આવ્યા હતા. જો કે, ઘટનાસ્થળે પહોંચેલા લોકોએ બોલેરોમાં ફસાયેલા ઇજાગ્રસ્તોને બચાવવાના પ્રયાસો શરૂ કર્યા અને તાત્કાલિક પોલીસને અકસ્માતની જાણ કરી હતી. માહિતી મળતા જ પોલીસની ટીમ પણ તુરંત ઘટનાસ્થળે પહોંચી ગઈ હતી.

તમામ ઘાયલોની હાલત નાજુક

ઘટનાસ્થળે પહોંચેલી પોલીસે તમામને બોલેરોમાંથી બહાર કાઢ્યા અને તાત્કાલિક તેઓને નજીકની હોસ્પિટલમાં સારવાર માટે લઈ ગયા. જ્યાં ડોક્ટરોએ છ લોકોને મૃત જાહેર કર્યા. અન્ય ચાર ઘાયલોની પણ સારવાર ચાલી રહી છે. તમામ ઘાયલોની હાલત નાજુક હોવાનું કહેવાય છે. અકસ્માતનું કારણ ગાડીની ઝડપ વધારે હોવાની આશંકા સેવાઇ રહી છે.