તમારા કામનું / GSTમાં ફેરફારથી iPhone સસ્તા થશે કે મોંઘા? જાણો ભાવ પર કેટલી અસર પડશે

દિવાળીના તહેવારો પહેલા ભારત સરકારે ગ્રાહકોને મોટી રાહત આપતાં GST (ગુડ્સ એન્ડ સર્વિસ ટેક્સ) દરોમાં ફેરફારની જાહેરાત કરી છે. આ નવા દરો 22 સપ્ટેમ્બર, 2025થી અમલમાં આવશે. આ ફેરફારથી સાબુ, શેમ્પૂ, દૂધ, દહીં, એસી, ટીવી અને કાર જેવી ઘણી વસ્તુઓની કિંમતોમાં ઘટાડો થશે. આ સમાચારથી ગ્રાહકોમાં ખુશીનો માહોલ છે, પરંતુ શું આ રાહત સ્માર્ટફોન ખરીદનારાઓને પણ મળશે? ખાસ કરીને, આગામી સપ્તાહે લોન્ચ થનારી Appleની iPhone 17 સિરીઝની કિંમતો પર આની કેવી અસર થશે? ચાલો, આ વિશે વિગતવાર જાણીએ.

iPhone 17 સિરીઝની કિંમતો પર GST ફેરફારની કોઈ અસર નહીં

Apple iPhone 17 સિરીઝની સત્તાવાર કિંમતોની જાહેરાત હજુ થઈ નથી, પરંતુ કેટલાક અહેવાલો અનુસાર, ભારતમાં આ સિરીઝની શરૂઆતી કિંમત 84,499 રૂપિયા હોઈ શકે છે. જોકે, GST દરોમાં થયેલા ફેરફારની આ કિંમતો પર કોઈ અસર થશે નહીં. આનું કારણ એ છે કે સ્માર્ટફોન હાલ 18 ટકા GSTના સ્લેબમાં આવે છે, અને આ દરમાં કોઈ ફેરફાર કરવામાં આવ્યો નથી. અગાઉ પણ સ્માર્ટફોન પર 18 ટકા GST લાગતો હતો, અને નવા નિયમો પછી પણ આ જ દર યથાવત રહેશે. આનાથી iPhone સહિત તમામ સ્માર્ટફોનની કિંમતોમાં કોઈ ઘટાડો થશે નહીં. જેમ કે સ્માર્ટ ટીવી અને એસીની કિંમતોમાં ઘટાડો થયો છે, તેવી રાહત સ્માર્ટફોન ગ્રાહકોને મળશે નહીં.

ICEAની સરકારને માંગ

ઈન્ડિયા સેલ્યુલર એન્ડ ઈલેક્ટ્રોનિક્સ એસોસિએશન (ICEA)એ સરકારને સ્માર્ટફોનને 5 ટકા GSTના સ્લેબમાં લાવવાની માંગ કરી હતી. ICEAનું માનવું છે કે સ્માર્ટફોન હવે લોકોની મૂળભૂત જરૂરિયાત બની ગયા છે અને ડિજિટલ ઈન્ડિયા મિશનનો મહત્વનો હિસ્સો છે. GST લાગુ થયા પહેલા મોટાભાગના રાજ્યો સ્માર્ટફોનને આવશ્યક ચીજવસ્તુઓની શ્રેણીમાં રાખતા હતા. જોકે, સરકારે હાલ આ માંગને સ્વીકારી નથી. ઉલ્લેખનીય છે કે GSTની શરૂઆતમાં સ્માર્ટફોન પર 12 ટકા ટેક્સ હતો, જેને 2020માં વધારીને 18 ટકા કરવામાં આવ્યો હતો.

વધુમાં વાંચો: તમારા ઘરનું સ્માર્ટ TV જ તમારું દુશ્મન! ચોરી છુપેથી કરી રહ્યું છે તમારી જાસૂસી

ગ્રાહકો માટે શું છે મહત્વનું?

જો તમે દિવાળી પહેલા નવો સ્માર્ટફોન, ખાસ કરીને iPhone 17 ખરીદવાનું વિચારી રહ્યા છો, તો GST દરોમાં ફેરફારથી કિંમતોમાં કોઈ રાહત મળવાની નથી. જોકે, અન્ય ઘણી વસ્તુઓ પર ઘટેલા ટેક્સનો લાભ ગ્રાહકોને મળશે, જે તહેવારોની ખરીદીને વધુ આકર્ષક બનાવશે. સરકારના આ નિર્ણયથી બજારમાં ઉત્સાહ વધશે, પરંતુ સ્માર્ટફોન ખરીદનારાઓએ હજુ થોડી રાહ જોવી પડશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ