હાલ ભારતીય સ્થાનિક ક્રિકેટમાં અંડર-23 કર્નલ સીકે નાયડુ ટ્રોફી રમાઈ રહી છે. આ ટૂર્નામેન્ટમાં આંધ્રપ્રદેશના બેટ્સમેન વામશી કૃષ્ણાએ પોતાની જોરદાર બેટિંગથી બધાને ચોંકાવી દીધા છે. આ 22 વર્ષના યુવા બેટ્સમેને ટેસ્ટ ક્રિકેટ ફોર્મેટ ટૂર્નામેન્ટમાં T-20ની જેમ તોફાની બેટિંગ કરી અને એક જ ઓવરમાં સતત 6 સિક્સ ફટકારી. BCCIએ જ વામશીની વિસ્ફોટક બેટિંગનો વીડિયો જાહેર કર્યો છે, જે સોશિયલ મીડિયા પર ખૂબ જ ઝડપથી વાયરલ થઈ રહ્યો છે.
આંધ્રપ્રદેશે 378 રન બનાવ્યા હતા
અંડર-23 કર્નલ સીકે નાયડુ ટ્રોફીમાં આંધ્ર પ્રદેશ અને રેલવે વચ્ચે મેચ રમાઈ હતી. આ મેચમાં પ્રથમ બેટિંગ કરવા આવેલી આંધ્રપ્રદેશની ટીમના ઓપનર વામશી કૃષ્ણાએ રેલવેના સ્પિનર દમનદીપ સિંહની એક ઓવરમાં સતત 6 છગ્ગા ફટકાર્યા હતા. વામશીએ માત્ર 64 બોલમાં 110 રનની શાનદાર સદી ફટકારી હતી. તેના શાનદાર પ્રદર્શનના આધારે આંધ્રપ્રદેશની ટીમે પ્રથમ દાવમાં 378 રન બનાવ્યા હતા.
એક ઓવરમાં 6 છગ્ગા ફટકાર્યા બાદ વામશી કૃષ્ણ રવિ શાસ્ત્રી (1985), યુવરાજ સિંહ (2007) અને રુતુરાજ ગાયકવાડ (2022)ની ક્લબમાં જોડાયા છે. જ્યારે, રેલવે તરફથી, એસઆર કમર અને એમડી જયસ્વાલે સૌથી વધુ ત્રણ-ત્રણ વિકેટ લીધી હતી.
રેલવેનું પણ જબરજસ્ત પર્ફોર્મન્સ
વાયએસ રાજા રેડ્ડી ACA ક્રિકેટ સ્ટેડિયમ, વિશાખાપટ્ટનમમાં રમાયેલી આ મેચમાં રેલ્વેએ આંધ્રપ્રદેશને 378 રનના સ્કોર પર આઉટ કર્યા બાદ બેટિંગમાં પણ મજબૂતી બતાવી હતી. રેલવેના ઓપનર અંશ યાદવે બોલરોની જોરદાર ધોલાઇ કરી હતી, 597 બોલમાં 14 ચોગ્ગા અને 2 છગ્ગાની મદદથી 268 રન બનાવ્યા.
આ સિવાય રવિ સિંહે પણ 311 બોલમાં 17 ચોગ્ગા અને 13 છગ્ગાની મદદથી 258 રન બનાવ્યા હતા. અંચિત યાદવે 219 બોલમાં 13 ચોગ્ગા અને 2 છગ્ગાની મદદથી 133 રનની સદી ફટકારી હતી. રેલવેએ પ્રથમ દાવમાં 9 વિકેટે 865 રનનો પહાડ બનાવીને 487 રનની લીડ મેળવી હતી. જોકે આ મેચ ડ્રોમાં સમાપ્ત થઈ હતી.
