Gujarat Elections 2022 / ગુજરાતના સૌથી મોટા સમાચાર: વિધાનસભાની ચૂંટણીમાં કોંગ્રેસ-NCP વચ્ચે થઈ શકે છે ગઠબંધન, વાતચીત ચાલું

• ગુજરાત વિધાનસભા ચૂંટણી પહેલા મોટા સમાચાર 
• ચૂંટણીમાં કોંગ્રેસ અને NCP વચ્ચે થઇ શકે છે ગઠબંધન
• ગઠબંધન કરવા કોંગ્રેસે NCP પાસે રાખી શરતઃ સૂત્રો 

ગુજરાત વિધાનસભાની ચૂંટણી જેમ જેમ નજીક આવી રહી છે તેમ તેમ રાજકીય માહોલ અને મતદારોને આકર્ષવા અલગ-અલગ પક્ષો દ્વારા અલગ અલગ જાહેરાતો કરવામાં આવી રહી છે.  ગુજરાતનો ગઢ જીતવા દરેક રાજકીય પાર્ટીઓ મથામણ કરી રહી છે.  આ દરમિયાન એક મોટા સમાચાર સામે આવી રહ્યા છે. 

કોંગ્રેસ અને એનસીપી વચ્ચે થઈ શકે છે ગઠબંધન

ગુજરાત વિધાનસભાની ચૂંટણીમાં કોંગ્રેસ અને એનસીપી ગઠબંધન કરી શકે છે. એવું કહેવામાં આવી રહ્યું છે કે, NCPએ કોંગ્રેસ પાસે 10 બેઠકોની માંગ કરી છે. તો ગઠબંધન કરવા કોંગ્રેસે NCP સમક્ષ કેટલીક શરતો મૂકી છે. કોંગ્રેસના નેતાઓએ કાંધલ જાડેજાને લઇ સવાલ ઉઠાવ્યા છે.

બંને વચ્ચે ચાલી રહી છે વાતચીત

આ સાથે એવું પણ કહેવામાં આવી રહ્યું છે કે,  હજુ સુધી કોંગ્રેસ 10 બેઠકને લઈને સહમત થઈ નથી, હાલ બંને વચ્ચે આ મામલે વાતચીત ચાલી રહી છે. કાંધલ જાડેજા મામલે સ્ટેન્ડ ક્લીઅર કરવા કોંગ્રેસે એનસીપીને જણાવ્યું છે. નોંધનીય છે કે, ગત રાજ્યસભા ચૂંટણીમાં NCPના ધારાસભ્ય કાંધલ જાડેજાએ ક્રોસ વોટિંગ કર્યું હતું.

હજુ સુધી નથી કરાઈ સત્તાવાર જાહેરાત

આ સમાચારને લઇને હજુ સુધી કોઇ સત્તાવાર જાહેરાત કરવામાં નથી આવી. જો બંને પક્ષ વચ્ચે બધુ જ યોગ્ય રહેશે તો ટૂંક સમયમાં આ જાહેરાત કોંગ્રેસ દ્વારા કરવામાં આવશે. આપને જણાવી દઈએ કે, વર્ષ 2017ની ચૂંટણીમાં કોંગ્રેસ અને એનસીપી વચ્ચેનું ગઠબંધન તુટ્યુ હતું.