માવઠાનો વધુ એક રાઉન્ડ / ગુજરાતમાં ચાર દિવસ વરસાદની આગાહી, તારીખો નોંધી લેજો: સૌરાષ્ટ્રથી લઈને ઉત્તર-મધ્ય ગુજરાતને ઘમરોળશે મેઘરાજા

• મે મહિનામાં માવઠાનો માર
• ખેડૂતો માટે ફરી માઠા સમાચાર
• 4 દિવસ કમોસમી વરસાદની આગાહી

રાજ્યભરમાં અત્યારે મિશ્ર ઋતુ જોવા મળી રહી છે, ત્યારે ઉનાળાની કાળઝાળ ગરમી વચ્ચે હવામાન વિભાગે ફરી કમોસમી વરસાદની આગાહી કરી છે. હવામાન વિભાગની આગાહી પ્રમાણે હજુ ચાર દિવસ રાજ્યભરમાં કમોસમી વરસાદ રહેશે. વેસ્ટર્ન ડિસ્ટર્બન્સ સક્રિય થતાં રાજ્યમાં કમોસમી વરસાદની આગાહી કરવામાં આવી છે. 

આ વિસ્તારમાં કમોસમી કમઠાણની શક્યતા
ખાસ કરીને સૌરાષ્ટ્ર-કચ્છ અને અમદાવાદ, ગાંધીનગર તેમજ મહેસાણામાં વરસાદ વરસી શકે છે. તો સાબરકાંઠા,બનાસકાંઠા અને પાટણમાં પણ વરસાદની શકયતા છે. આ ઉપરાંત આગાહી પ્રમાણે સૌરાષ્ટ્ર અને કચ્છમાં વરસાદ વરસી રહ્યો છે. જ્યારે અમદાવાદ, ગાંધીનગર, મહેસાણામાં વરસાદની શકયતા છે. સુરેન્દ્રનગર, ભાવનગર, ડાંગ, વલસાડ અને ભરૂચમાં વરસાદ વરસે તેવી શકયતા છે. હવામાન વિભાગના કહેવા પ્રમાણે 4 અને 5 મેના રોજ વધુ વરસાદ થવાની શક્યતા છે.  કમોસમી વરસાદની સાથે 30 થી 40 કિલોમીટરની ઝડપે પવન ફૂંકાઇ શકે છે.

24 કલાકમાં 27 તાલુકામાં વરસાદ
ગુજરાતના 27 તાલુકામાં કમોસમી વરસાદ નોંધાયો છે. જેમાંથી વધારે વરસાદ ધારીમાં નોંધાયો છે. અમેરલીના ધારીમાં 24 કલાકમાં 2.5 ઇંચથી વધુ વરસાદ પડ્યો છે. તો સવારકુંડલામાં પણ મેઘરાજાએ ધમાકેદાર બેટિંગ કરી છે, અહીં 24 કલાકમાં દોઢ ઇંચ જેટલો વરસાદ નોંધાયો છે. તો ગઢડામાં દોઢ ઇંચ વરસાદ નોંધાયો છે. આ ઉપરાંત બરવાવાળામાં એક ઇંચ વરસાદ પડ્યો છે. જ્યારે અમરેલી, નખત્રાણા, લાઠી, કલ્યાણપુર, જસદણમાં અડધો ઇંચ વરસાદ પડ્યો છે. 

ફરી એક વાર ગુજરાતમાં માવઠું ખેડૂતોનો પાક બગાડશે
ખાનગી હવામાન વિશેષજ્ઞોના મતે આગામી દિવસોમાં બંગાળનાં ઉપસાગર અને અરબ સાગરમાં ચક્રવાત સર્જાવાની શક્યતા રહેશે. 10-11 મેના દિવસોમાં બંગાળના ઉપસાગરમાં ચક્રવાત સર્જાવાની શક્યતા રહેશે. જે 18 સુધીમાં પ્રચંડ રૂપ ધારણ કરી શકે છે. 8 જૂનથી બંગાળના ઉપસાગરમાં પવનોની અદલાબદી થવાની શક્યતા રહે છે. ફરી એક વાર ગુજરાતમાં માવઠું ખેડૂતોનો પાક બગાડશે.

સૌરાષ્ટ્ર, દક્ષિણ ગુજરાત સહિતના વિસ્તારમાં વરસાદ પડવાની સંભાવનાઃ હવામાન વિભાગ
આ બાબતે હવામાન વિભાગનાં ડાયરેક્ટર મનોરમા મોહંતીએ જણાવ્યું હતું કે, આવનારા દિવસોમાં ગુજરાતના દરિયાકાંઠા વિસ્તારો સહિત સૌરાષ્ટ્ર, કચ્છ, દીવ દમણા, દાદરા નગર હવેલી સહિતનાં વિસ્તારમાં વરસાદ પડવાની સંભાવના છે. ત્યારે ગુજરાતનાં  સૌરાષ્ટ્ર, કચ્છ, જામનગર, મોરબી,  રાજકોટ, અમરેલી તેમજ ભાવનગર સહિતનાં વિસ્તારમાં વરસાદ પડી શકે છે. જ્યારે ઉત્તર ગુજરાતમાં બનાસકાંઠા, પાટણ, મહેસાણા, સાબરકાંઠા, ગાંધીનગર તેમજ અમદાવાદમાં પણ વરસાદની આગાહી કરવામાં આવી છે.  દક્ષિણ ગુજરાતની વાત કરીએ તો વલસાડ, ડાંગ તેમજ તાપીમાં વરસાદ પડવાની સંભાવના છે.