ઉત્તર પ્રદેશ / મંગળ ગીતો ગવાઈ રહ્યા હતા, વરરાજા સાફો બંધાવી રહ્યા હતા અને આવ્યો હાર્ટ ઍટેક... કરૂણ ઘટના જાણીને હૈયું ધ્રુજી જશે

• ઉત્તર પ્રદેશના બહરાઈચ જિલ્લામાં એક ચોંકાવનારી ઘટના
• લગ્નનો વરઘોડો કાઢવા માટે તૈયાર થઈ રહેલા વરરાજાને હાર્ટ એટેક 
• તાત્કાલિક હોસ્પિટલ લઈ ગયા પણ ડોકટરોએ મૃત જાહેર કર્યો 

ઉત્તર પ્રદેશના બહરાઈચ જિલ્લામાં એક ચોંકાવનારી ઘટના સામે આવી છે. વાત જાણે એમ છે કે, અહીં લગ્નનો વરઘોડો કાઢવા માટે તૈયાર થઈ રહેલા વરરાજાને હાર્ટ એટેક આવ્યો હતો. જેને લઈ પરિવારજનો તેને તાત્કાલિક હોસ્પિટલ લઈ ગયા. જોકે હોસ્પિટલના ફરજ પરના ડૉક્ટરોએ તેને મૃત જાહેર કર્યો. આ તરફ વરરાજાના મૃત્યુના સમાચાર સાંભળતા જ તેના પરિવારજનોમાં શોકનો માહોલ છવાયો હતો. આ તરફ લગ્નના વરઘોડામાં પહોંચેલા લોકો અંતિમયાત્રામાં જોડાયા હતા.

ઉત્તર પ્રદેશના જરવાલ રોડ વિસ્તારના અટવા ગામની આ ઘટનાને લઈ સમગ્ર પંથકમાં શોકનું મોજું ફરી વળ્યું છે. વિગતો મુજબ રામલાલના પુત્ર રાજકમલને કાલે જરવાલ પોલીસ સ્ટેશન વિસ્તારના ક્યોલીપુરવા અટ્ટાઈસા ગામમાં જાન લઈને જવાનું હતું. તેમના ઘરે લગ્નની સંપૂર્ણ તૈયારીઓ કરવામાં આવી હતી. ગઈકાલે રાજકમલ વરઘોડો કાઢવાની તૈયારી કરી રહ્યો હતો. રાજકમલને વરરાજાનો પોશાક પહેરાવવામાં આવ્યો હતો, જ્યારે સાફો બાંધતી વખતે વરરાજાની તબિયત લથડી હતી.

તાત્કાલિક હોસ્પિટલ લઈ ગયા પણ..... 
આ તરફ વરરાજાની તબિયત બગડ્યા બાદ તેને તાકીદે સ્થાનિક મુસ્તફાબાદ સામુદાયિક આરોગ્ય કેન્દ્રમાં લઈ જવામાં આવ્યો, જ્યાં ડોક્ટરોએ રાજકમલને મૃત જાહેર કર્યો. ડોક્ટરોએ જણાવ્યું કે, રાજકમલનું મૃત્યુ હાર્ટ એટેકથી થયું હતું. આ ઘટના બાદ લગ્ન ઘરમાં શોકની લાગણી ફેલાઈ ગઈ હતી. ઘરમાં અફરાતફરીના માહોલ વચ્ચે ઘટનાની જાણ થતાં જ દુલ્હન પક્ષના લોકો પણ રાજકમલના ઘરે પહોંચી ગયા હતા.

જે ઘરે લગ્ન ત્યાંથી જ ઉઠી વરરાજાની અર્થી 
આ તરફ લગ્નની શોભાયાત્રામાં ભાગ લેવા પહોંચેલા લોકો વરરાજાની અર્થી સાથે સ્મશાનગૃહ પહોંચ્યા હતા. શોકમય વાતાવરણમાં મૃતદેહના અંતિમ સંસ્કાર કરવામાં આવ્યા હતા. પુત્રના મૃત્યુથી વરના પિતા રામ લાલ ભાંગી પડ્યા છે. રડવાથી તેઓની હાલત ખરાબ છે. પુત્રને યાદ કરીને તે રડે છે અને કહે છે કે, શું મારે આ દિવસ જોવાનો હતો. આજે દીકરો જીવતો હોત તો ઘરમાં ખુશી જ હોત.