VIDEO / ચોમાસામાં તારંગા હિલસ્ટેશનનું બદલાયું રૂપ, હરિયાળી અને ધુમ્મસ વચ્ચે કુદરતનો અદ્ભૂત નજારો જોવા ઉમટ્યા પ્રવાસીઓ

ચોમાસાના વરસાદથી મહેસાણા જિલ્લાના તારંગા હિલસ્ટેશનમાં પ્રકૃતિએ જાણે નવું રૂપ ધારણ કર્યું હોય તેવો અહેસાસ થઈ રહ્યો છે. સતત વરસાદ બાદ સમગ્ર વિસ્તાર હરિયાળીની ચાદરથી ઢંકાઈ ગયો છે, જ્યારે ડુંગરો, વૃક્ષો અને ખીણોમાં છવાયેલું ધુમ્મસ પ્રવાસીઓને મંત્રમુગ્ધ કરી રહ્યું છે.

સવાર અને સાંજના સમયે ઠંડા પવન અને ધુમ્મસભર્યા વાતાવરણને કારણે તારંગાની સુંદરતામાં અનેકગણો વધારો થયો છે. વરસાદી માહોલમાં અહીંના કુદરતી નજારા લોકો માટે આકર્ષણનું મુખ્ય કેન્દ્ર બન્યા છે. ખાસ કરીને ફોટોગ્રાફી અને પ્રકૃતિનો આનંદ માણવા આવતા પ્રવાસીઓ માટે તારંગા આ દિવસોમાં પસંદગીનું સ્થળ બની ગયું છે.

વીકેન્ડ દરમિયાન અમદાવાદ, ગાંધીનગર, મહેસાણા સહિત આસપાસના જિલ્લાઓમાંથી મોટી સંખ્યામાં પરિવારો અને યુવાનો તારંગાની મુલાકાત લઈ રહ્યા છે. હરિયાળી વચ્ચે ફરવાની, ઠંડા વાતાવરણની મજા માણવાની અને પ્રકૃતિની નજીક સમય પસાર કરવાની તક મળતા પ્રવાસીઓમાં ભારે ઉત્સાહ જોવા મળી રહ્યો છે.

આ પણ વાંચોઃ લીલીયામાં શેત્રુંજી નદીના પૂરે મચાવ્યો કહેર: જૂનાસાવરની જમીન પાણીમાં ગરકાવ, ઉભો પાક તણાયો; ખેડૂતોને લાખોનું નુકસાન

સ્થાનિક લોકોના જણાવ્યા મુજબ, ચોમાસાની ઋતુમાં તારંગાનું સૌંદર્ય અન્ય દિવસોની સરખામણીએ વધુ ખીલી ઊઠે છે. વરસાદ પછી ડુંગરો પર પથરાયેલી લીલીછમ હરિયાળી અને મનમોહક વાતાવરણના કારણે તારંગા ફરી એકવાર પ્રકૃતિપ્રેમીઓ માટે આકર્ષણનું કેન્દ્ર બન્યું છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ