કાર્યવાહી / લો બોલો, સુરતની કોલેજમાંથી ઝડપાયો BBAનો વિદ્યાર્થી AI ચશ્માંથી ચોરી કરતો વિદ્યાર્થી, પછી થઇ જોવા જેવી!

સુરતની એક કોલેજમાં બીબીએના પ્રથમ વર્ષનો વિદ્યાર્થી પરીક્ષામાં ચોરી કરવા માટે સ્માર્ટ ચશ્માંનો ઉપયોગ કરતા ઝડપાઈ ગયો છે. આ વિદ્યાર્થીને સંબંધિત વિષયની પરીક્ષા એક વર્ષ સુધી આપવા પર પ્રતિબંધ મૂકવામાં આવ્યો છે. સુરતના વરાછા વિસ્તારમાં આવેલી અને વીર નર્મદ દક્ષિણ ગુજરાત યુનિવર્સિટી સાથે સંલગ્ન કોલેજમાં આ ઘટના બની હતી. લગભગ એક અઠવાડિયા પહેલાં વિદ્યાર્થીને સુનાવણી માટે બોલાવવામાં આવ્યો ત્યારે તેણે પરીક્ષામાં ચોરી કરી હોવાનું કબૂલ્યું હતું.

કોલેજમાં માર્ચ-એપ્રિલ દરમિયાન પ્રથમ વર્ષ બીબીએની પરીક્ષાઓ ચાલી રહી હતી. તે સમયે યુનિવર્સિટીની ફ્લાઇંગ સ્ક્વોડ પરીક્ષા કેન્દ્રની તપાસ કરી રહી હતી. દરમિયાન વિદ્યાર્થી પોતાના વાંચવાના ચશ્માં સાથે વિચિત્ર ચેડાં કરતો જોવા મળ્યો હતો. યુનિવર્સિટીના સૂત્રોના જણાવ્યા મુજબ, તપાસ કરતાં આ ચશ્માં આર્ટિફિશિયલ ઇન્ટેલિજન્સ (એઆઈ)થી સજ્જ સ્માર્ટ ચશ્માં હોવાનું જણાયું હતું.

વિદ્યાર્થીને અન્ય રૂમમાં લઈ જઈ પ્રિન્સિપાલ અને પ્રોફેસરોની હાજરીમાં તેની સઘન પૂછપરછ કરવામાં આવી હતી. દરમિયાન તેણે પરીક્ષા ખંડમાં આ ચશ્માં લાવ્યા હોવાનું કબૂલ્યું હતું અને ચશ્માં કેવી રીતે કામ કરતા હતા તે પણ બતાવ્યું હતું.

ચશ્માંમાં કેમેરા, માઇક્રોફોન અને સ્પીકર લગાવવામાં આવ્યા હતા અને તેની કિંમત આશરે રૂ. ૩૫,૦૦૦ હોવાનું જણાવ્યું હતું. કેમેરા પ્રશ્નપત્રની તસવીર ખેંચતો, ત્યાર બાદ એઆઈ તેના જવાબો તૈયાર કરતું અને વિદ્યાર્થીને તે જવાબો ખુલ્લા કાનવાળા સ્પીકર દ્વારા સંભળાતા હતા.

પ્રિન્સિપાલે ચશ્માં જપ્ત કરી લીધાં હતાં અને વિદ્યાર્થી પાસે લેખિત માફી મગાવી હતી. વિદ્યાર્થીના માતા-પિતાને પણ બોલાવવામાં આવ્યાં હતાં અને પરીક્ષામાં એઆઈથી તૈયાર થયેલા ચશ્માંનો ઉપયોગ કરીને ચોરી કરવા બદલ રૂ. ૧૦,૦૦૦નો દંડ ભરવા જણાવાયું હતું. વિદ્યાર્થીએ દંડ ભર્યા બાદ લગભગ એક અઠવાડિયા પહેલાં ચશ્માં કોલેજ સત્તાવાળાઓએ પરત કર્યાં હતાં.

કોલેજના એક પ્રોફેસરે શુક્રવારે જણાવ્યું હતું કે, “વિદ્યાર્થીના માતા-પિતાને બોલાવવામાં આવ્યા હતા અને તેને AIથી તૈયાર થયેલા વાંચવાના ચશ્માંનો ઉપયોગ કરીને પરીક્ષામાં ચોરી કરવા બદલ દંડ ભરવા જણાવાયું હતું. તેને એક વર્ષ સુધી એ જ વિષયની પરીક્ષા નહીં આપી શકે તેમ પણ જણાવાયું હતું.”

આ પણ વાંચોઃ ગુજરાતની 70 ખાનગી બી.એડ. કોલેજો હવે સરકારના રડાર પર, જાણો કેમ?

VNSGUના વાઇસ ચાન્સેલર ડો. કે. એન. ચાવડાએ જણાવ્યું, “અમારી સામે આવો એક કિસ્સો આવ્યો છે. આ કોલેજ VNSGU સાથે સંલગ્ન છે. આ અંગે મારી પાસે વધુ માહિતી નથી.”

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ