VIDEO / સુરત બાદ હવે નવસારીનો વારો, સતત વરસાદથી જ્યાં જુઓ ત્યાં પાણી જ પાણી

દક્ષિણ ગુજરાતમાં છેલ્લા કેટલાક દિવસોથી પડી રહેલા ભારે વરસાદે જનજીવન અસ્તવ્યસ્ત કરી દીધું છે. નવસારી જિલ્લામાં પૂર્ણા અને અંબિકા નદીઓમાં આવેલા ઘોડાપૂરને કારણે અનેક ગામો અને શહેરના નીચાણવાળા વિસ્તારોમાં પાણી ફરી વળ્યા છે. બીજી તરફ સુરત શહેર અને જિલ્લામાં પણ ભારે વરસાદને કારણે અનેક રસ્તાઓ પાણીમાં ગરકાવ થઈ ગયા છે. અનેક સ્થળોએ લોકોને સુરક્ષિત સ્થળે ખસેડવાની કામગીરી હાથ ધરવામાં આવી છે, જ્યારે પોલીસ, વહીવટી તંત્ર અને સ્થાનિક બચાવ ટીમો સતત મેદાનમાં રહી લોકોને મદદ કરી રહી છે.

તોરણવેરામાં પૂરમાં ફસાયેલા બે યુવાનોને આખરે બચાવાયા

નવસારી જિલ્લાના ગણદેવી તાલુકાના તોરણવેરા ગામમાં અંબિકા નદીમાં આવેલા પૂર વચ્ચે બે યુવાનો જીવલેણ પરિસ્થિતિમાં ફસાઈ ગયા હતા. મોડી રાત્રે નદીના જળસ્તરમાં અચાનક વધારો થતાં બંને યુવાનો પૂરના પાણી વચ્ચે ઘેરાઈ ગયા હતા. જીવ બચાવવા માટે તેઓ ઝાડ પર ચઢી ગયા હતા અને રાત્રે લગભગ 3 વાગ્યાથી સવારે 7 વાગ્યા સુધી ઝાડ પર જ બેસી રહ્યા હતા. સવારે નદીનું જળસ્તર ઘટતા સ્થાનિક તરવૈયાઓ તાત્કાલિક મદદે પહોંચ્યા હતા. જોખમ વચ્ચે સફળ રેસ્ક્યૂ ઓપરેશન હાથ ધરી બંને યુવાનોને સુરક્ષિત રીતે બહાર કાઢવામાં આવ્યા હતા. ત્યારબાદ બંનેને તેમના ઘરે પહોંચાડવામાં આવ્યા હતા, જેને પગલે પરિવારજનો અને સ્થાનિકોએ રાહતનો શ્વાસ લીધો હતો.

નવસારીમાં પૂરની સ્થિતિ યથાવત, અનેક વિસ્તારો જળબંબાકાર

નવસારીમાં અવિરત ભારે વરસાદને કારણે પૂર્ણા નદીની સપાટી આશરે 25 ફૂટ પર સ્થિર રહી છે. જોકે નદીકાંઠાના અનેક વિસ્તારોમાં હજુ પણ પૂરના પાણી યથાવત છે. શહેરના ગધેવાન વિસ્તારમાં પાણી ફરી વળતાં લોકો ભારે મુશ્કેલીનો સામનો કરી રહ્યા છે. સ્ટેશન રોડ, બંદર રોડ, મિથિલા નગરી અને શાંતાદેવી રોડ સહિતના વિસ્તારોમાં પાણી ભરાઈ ગયા છે. મચ્છી માર્કેટ વિસ્તારમાં અંદાજે ત્રણ ફૂટ જેટલું પાણી ભરાતા વેપાર-ધંધા પર પણ ગંભીર અસર જોવા મળી રહી છે. પરિસ્થિતિને ધ્યાનમાં રાખીને મોડી રાત્રે અસરગ્રસ્ત વિસ્તારોમાંથી લોકોને સુરક્ષિત સ્થળોએ ખસેડવામાં આવ્યા હતા. ભારે વરસાદ અને પૂરની સ્થિતિને કારણે 200થી વધુ પરિવારો પ્રભાવિત થયા છે. વહીવટી તંત્ર સતત પરિસ્થિતિ પર નજર રાખી રહ્યું છે અને જરૂરી કાર્યવાહી કરી રહ્યું છે.

પૂર્ણા નદી ભયજનક સપાટીએ, 1,770 લોકોનું સ્થળાંતર

નવસારી જિલ્લામાં સતત ભારે વરસાદને કારણે પૂર્ણા નદીમાં ઘોડાપૂર આવ્યું છે. નદીમાં પાણીનો પ્રવાહ સતત વધતા જળસ્તર ભયજનક સપાટીએ પહોંચી ગયું છે. જેના કારણે નદીકાંઠાના નીચાણવાળા વિસ્તારોમાં રહેતા લોકોને સાવચેતીના ભાગરૂપે સુરક્ષિત સ્થળોએ ખસેડવાની કામગીરી હાથ ધરવામાં આવી છે. અત્યાર સુધીમાં કુલ 1,770 લોકોનું સ્થળાંતર કરવામાં આવ્યું છે. જિલ્લા તંત્રએ નદીકાંઠાના વિસ્તારોમાં રહેતા લોકોને સતર્ક રહેવા, બિનજરૂરી અવરજવર ટાળવા અને સત્તાવાર સૂચનાઓનું પાલન કરવાની અપીલ કરી છે.

પાણી ભરાયેલા રસ્તા પર બસ ફસાઈ, મુસાફરોને બચાવાયા

ગુજરાતમાં ભારે વરસાદના કારણે અનેક વિસ્તારોમાં પાણી ભરાઈ ગયા છે. નવસારીમાં પાણી ભરાયેલા રસ્તા પરથી પસાર થઈ રહેલી એક બસ વચ્ચે જ ફસાઈ ગઈ હતી. બસમાં સવાર મુસાફરો મુશ્કેલીમાં મુકાતા ઘટનાની જાણ થતાં જ સ્થાનિક તંત્ર અને બચાવ ટીમો તાત્કાલિક સ્થળ પર પહોંચી હતી. બચાવ ટીમે સફળ કામગીરી કરીને બસમાં ફસાયેલા તમામ મુસાફરોને સુરક્ષિત રીતે બહાર કાઢ્યા હતા. આ ઘટનાના કારણે થોડા સમય માટે વાહનવ્યવહાર પણ પ્રભાવિત રહ્યો હતો.

સુરતમાં અતિ ભારે વરસાદ, પોલીસની ખાસ અપીલ

સુરત શહેરમાં અતિ ભારે વરસાદને કારણે અનેક વિસ્તારોમાં પાણી ભરાઈ ગયા છે. પરિસ્થિતિને ધ્યાનમાં રાખીને પોલીસ કમિશનર વાબાંગ જામીરએ નાગરિકોને બિનજરૂરી બહાર ન નીકળવા અપીલ કરી છે. તેમણે પાણી ભરાયેલા રસ્તાઓ, અન્ડરપાસ અને જોખમી વિસ્તારોમાં જવાનું ટાળવા તેમજ પોલીસ અને વહીવટી તંત્ર દ્વારા આપવામાં આવતી સૂચનાઓનું પાલન કરવા અનુરોધ કર્યો છે. સુરત પોલીસ સતત મેદાનમાં રહી લોકોની સુરક્ષા માટે કામગીરી કરી રહી છે.

સુરત જિલ્લામાં પોલીસે વાહનચાલકોને બચાવ્યા

સુરત જિલ્લામાં ભારે વરસાદને કારણે અનેક રોડ અને હાઈવે પાણીમાં ગરકાવ થઈ ગયા હતા. ધસમસતા પાણીના પ્રવાહમાં કેટલાક વાહનચાલકો ફસાઈ જતા સુરત જિલ્લા પોલીસે તાત્કાલિક બચાવ કામગીરી હાથ ધરી હતી. ઓલપાડ તાલુકાના સાયણ ગામ નજીક એક બાઈકચાલક પાણીથી ઢંકાયેલા ખાડામાં ખાબક્યો હતો. પોલીસે સમયસર કાર્યવાહી કરીને તેને સુરક્ષિત બહાર કાઢ્યો હતો. ઘટનાના પગલે સુરત જિલ્લા પોલીસ વડાએ લોકોને બિનજરૂરી રીતે હાઈવે અથવા પાણી ભરાયેલા રસ્તાઓ પર મુસાફરી ન કરવાની અપીલ કરી છે. હાલમાં હાઈવે પરથી પાણી ઓસરતા વાહનવ્યવહાર ધીમે-ધીમે સામાન્ય બની રહ્યો છે, જેને પગલે સ્થાનિક લોકોએ રાહતનો શ્વાસ લીધો છે.

પોલીસનું લાઈવ મોનિટરિંગ, કંટ્રોલ રૂમથી સતત નજર

ભારે વરસાદની સ્થિતિ વચ્ચે સુરત પોલીસ સંપૂર્ણ એલર્ટ મોડમાં છે. પોલીસ કમિશનર વાબાંગ જામીર અને અન્ય ઉચ્ચ અધિકારીઓ કંટ્રોલ રૂમમાંથી શહેરની સ્થિતિ પર સતત લાઈવ મોનિટરિંગ કરી રહ્યા છે. ટ્રાફિક, બચાવ કામગીરી અને નાગરિકોની સુરક્ષા અંગે સતત સમીક્ષા કરવામાં આવી રહી છે.

કતારગામમાં વરસાદી પાણીમાં લોકો ફસાયા

સુરતના કતારગામ વિસ્તારમાં ભારે વરસાદના કારણે અનેક રસ્તાઓ પાણીમાં ગરકાવ થઈ ગયા હતા. જેના કારણે કેટલાક લોકો વરસાદી પાણી વચ્ચે ફસાઈ ગયા હતા. સ્થાનિક તંત્ર અને બચાવ ટીમોએ સમયસર કામગીરી કરીને લોકોને સુરક્ષિત સ્થળે પહોંચાડ્યા હતા.

અંતિમયાત્રામાં જતો પરિવાર પાણીમાં ફસાયો

સુરતના વરાછા વિસ્તારમાં ભારે વરસાદ વચ્ચે એક પરિવાર અંતિમયાત્રામાં જઈ રહ્યો હતો. દરમિયાન રસ્તામાં ભારે પાણી ભરાઈ જતા પરિવારના સભ્યો વચ્ચે જ ફસાઈ ગયા હતા. ઘટનાની જાણ થતાં જ વરાછા પોલીસ તાત્કાલિક સ્થળ પર પહોંચી હતી. પોલીસે ટ્રેક્ટરની મદદથી પરિવારના તમામ સભ્યોને સુરક્ષિત બહાર કાઢ્યા હતા. સમયસર થયેલી આ કામગીરીને કારણે મોટી દુર્ઘટના ટળી હતી.

આ પણ વાંચો : ભારે વરસાદનો કહેર, ડાંગ-સુરતમાં પાણી ભરાયા, નર્મદા ડેમમાં પાણીની આવક વધી

તંત્રની લોકોને અપીલ

દક્ષિણ ગુજરાતમાં ભારે વરસાદ અને પૂરની સ્થિતિને ધ્યાનમાં રાખીને વહીવટી તંત્ર અને પોલીસ દ્વારા લોકોને નદી, તળાવ અને પાણી ભરાયેલા વિસ્તારોમાં ન જવાની અપીલ કરવામાં આવી છે. બિનજરૂરી મુસાફરી ટાળવા, સત્તાવાર સૂચનાઓનું પાલન કરવા અને કોઈ પણ ઇમરજન્સી સ્થિતિમાં તાત્કાલિક સ્થાનિક તંત્રનો સંપર્ક કરવા સૂચના આપવામાં આવી છે. હાલ નવસારી અને સુરત સહિત દક્ષિણ ગુજરાતના અનેક વિસ્તારોમાં તંત્ર સતત પરિસ્થિતિ પર નજર રાખી રહ્યું છે અને જરૂર પડ્યે વધુ સ્થળાંતર તથા બચાવ કામગીરી માટે ટીમોને તૈયાર રાખવામાં આવી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ