રાજનીતિ / મુખ્યમંત્રીની રેસમાંથી શિવરાજે કર્યા હાથ અધ્ધર? કહ્યું હું દાવેદાર નથી, મધ્યપ્રદેશની રાજનીતિ ઉકળી

• મધ્યપ્રદેશમાં મુખ્યમંત્રી પદની રેસ જારી
• શિવરાજ સિંહે કહ્યું કે હું દાવેદાર નથી
• દિલ્હી નહીં પણ છિંદવાડા જશે શિવરાજસિંહ

મધ્યપ્રદેશની વિધાનસભા ચૂંટણીમાં ભાજપનો વિજય તો થઈ ગયો પણ હવે સવાલ એ છે કે આખરે MPનાં નવા મુખ્યમંત્રી કોણ બનશે? કેટલાક લોકો કહી રહ્યાં છે કે શિવરાજ સિંહ ફરી મુખ્યમંત્રી પદ સંભાળશે પણ તેવામાં ખુદ શિવરાજ સિંહનું નિવેદન આવી ગયું છે કે તેઓ મુખ્યમંત્રી પદનાં દાવેદાર નથી.

'હું મુખ્યમંત્રી પદનો દાવેદાર નથી..'
મુખ્યમંત્રી પદની રેસની વચ્ચે શિવરાજ સિંહ ચૌહાણે કહ્યું કે," મેં કોઈ દિવસ પદ માટે કામ નથી કર્યુ. પાર્ટીએ મને જેમ કહ્યું અને મારામાં જેટલું સામાર્થ્ય હતું તે અનુસામ તમામ કામ પૂરું કરવાનો પ્રયાસ કર્યો. હું મુખ્યમંત્રી પદનો દાવેદાર પહેલા પણ નહોતો અને ન તો આજે છું. હું એક કાર્યકર્તા તરીકે પાર્ટી મને જે પણ કામ આપશે તે કામ સમર્પિત ભાવે પાર્ટી માટે કરતો રહીશ."

હું દિલ્હી નથી જઈ રહ્યો
CM શિવરાજે કહ્યું કે હું દિલ્હી નથી જઈ રહ્યો. હું દિલ્હીની જગ્યાએ આવતી કાલે છિંદવાડા જઈશ. ત્યાંનાં કાર્યકર્તાઓ સાથે મુલાકાત કરીશ. છિંદવાડામાં અમે સીટ હાર્યા છીએ. હવે અમારે લોકસભા ચૂંટણીની તૈયારીઓમાં લાગવાનું છે. આ વખતે છિંદવાડા સીટ પર પણ ભાજપનો જ કબ્જો હશે.

..ફરી કોંગ્રેસ કઈ રીતે જીતી
ચૂંટણીમાં ગડબડી અને EVMમાં છેડછાડનાં કોંગ્રેસનાં આરોપોની વચ્ચે શિવરાજ સિંહ ચૌહાણે પૂછ્યું કે, 'જો ઈવીએમમાં ગડબડી છે તો પછી છિંદવાડાની તમામ 7 સીટો કોંગ્રેસે કઈ રીતે જીતી. તેમની પાસે EVM પર સવાલ ઊઠાવ્યાં સિવાય બીજો કોઈ મુદો છે જ નહીં.'