- બિલાસપુર પહોંચેલા શંકરાચાર્યએ બાગેશ્વર મહારાજને પડકાર્યા
- નામ લીધા વિના કહ્યું- જોશીમઠમાં કોઈ ચમત્કાર કરી બતાવો
- જમીનમાં ધસી રહ્યું છે ઉત્તરાખંડનું જોશીમઠ
સ્વામી જગદગુરુ શંકરાચાર્ય સ્વામી અવિમુક્તેશ્વરાનંદે બાગેશ્વર મહારાજને લઈને મોટું નિવેદન આપ્યું છે. બિલાસપુર પહોંચ્યા બાદ શંકરાચાર્ય સ્વામી અવિમુક્તેશ્વરાનંદે બાગેશ્વર બાબાનું નામ લીધા વિના કહ્યું કે, ચમત્કાર બતાવનાર જોશીમઠ વિશે માહિતી આપે. તેમણે કહ્યું કે, ચમત્કાર બતાવનારા જોશીમઠ આવીને ધસતી જમીને રોકીને બતાવે. જે મકાનોમાં તિરાડો પડી ગઈ છે તેના વિશે જણાવે. ત્યારે હું પણ તેમના ચમત્કારને માન્યતા આપીશ. તેમણે કહ્યું કે, જો તેઓ આવું કરીને બતાવશે તો અમે તેમનું ફૂલોથી સ્વાગત કરીશું. આ ઉપરાંત તેમણે ધર્માંતરણ વિશે કહ્યું કે, ધર્માંતરણની તરફેણમાં બોલાનારા કે વિરોધ કરનારાઓ પાછળ ધાર્મિક કારણ નથી. પરંતુ તેની પાછળ રાજકીય કારણ છે.
શંકરાચાર્યએ આપ્યું મહત્વનું નિવેદન
શંકરાચાર્યએ એમ પણ કહ્યું કે, 'વેદો અનુસાર ચમત્કાર બતાવનારાઓને હું માન્યતા આપું છું. પરંતુ પોતાની વાહવાહી અને ચમત્કારી બાબા બનવાના પ્રયાસો કરનારાઓને હું માન્યતા નથી આપતો.' શંકરાચાર્ય સ્વામી અવિમુક્તેશ્વરાનંદે તાજેતરમાં જ જબલપુરમાં આપેલા નિવેદનને લઈને કહ્યું કે, જ્યારે અંગ્રેજો ભારત છોડીને ગયા હતા, ત્યારે મહમદ અલી ઝીણાએ કહ્યું હતું કે મુસ્લિમોને અલગ કરી દેવામાં આવે, કારણ કે તેઓ પોતાની ધરતી પર જઈને ખુશ રહેશે, આ માટે ભારતના ટુકડા કરવામાં આવ્યા હતા અને પાકિસ્તાન બનાવવામાં આવ્યું હતું.
અખંડ ભારતનું કરવામાં આવે નિર્માણ
તે સમયે પણ કેટલાક મુસ્લિમો ભારતમાં રહ્યા. જો તેમને અહીં સુખ-શાંતિ મળી રહી છે તો પાકિસ્તાન બનાવવાની શું જરૂર છે. એટલા માટે એકવાર આ બાબત પર પુનર્વિચાર થવો જોઈએ અને ફરીથી અખંડ ભારતનું નિર્માણ કરવું જોઈએ. આ દેશમાં રહેવું અને હિન્દુઓની વચ્ચે રહેવું એ હિન્દુ અને મુસ્લિમ બંનેની નિયતિ છે, તો પછી અલગ દેશની આવશ્યકતા નથી. તેથી ફરી એકવાર પાકિસ્તાન પર પુનર્વિચાર કરીને બંને દેશોને એક કરવા જોઈએ.
જોશીમઠમાં હાલ સંકટ છવાયું છે
વાસ્તવમાં ઉત્તરાખંડનું જોશીમઠ જમીનની નીચે ધસી રહ્યું છે. જમીનમાં ધસી જવાને કારણે અનેક વિસ્તારના મકાનોમાં તિરાડો પડી ગઈ હતી. લોકોને તેમના ઘરોમાંથી બહાર કાઢીને સુરક્ષિત સ્થળોએ લઈ જવામાં આવી રહ્યા છે.
