Cyclone Shakhti / 'શક્તિ'એ લીધો યુટર્ન! વાવાઝોડું તો ગુજરાત તરફ આવી રહ્યું છે, દ્વારકાથી બસ આટલા જ કિમી દૂર

Cyclone Shakhti in Arabian Sea : શક્તિ ચક્રવાત ઓમાન નજીક અરબ સાગરમાં સક્રિય છે. હાલ દ્વારકાથી 770 કિમી દૂર ચક્રવાત છે. આજે ચક્રવાત ગુજરાત તરફની દિશા પકડે એવી સંભાવનાઓ છે. મંગળવારે વાવાઝોડું દરિયામાં નબળું પડશે. સૌરાષ્ટ્રભરના બંદરો પર ત્રણ નંબરનું સિગ્નલ યથાવત છે. વાવાઝોડાને લઈ જામનગરનું વહીવટી પ્રશાસન સાબદું છે. જામનગરમાં અડધો અને જોડિયામાં એક ઈંચ વરસાદ પડ્યો હતો. સૌરાષ્ટ્ર-કચ્છમાં 50 કિમી સુધીની ઝડપે પવન ફૂંકાશે.

ભારતીય હવામાન વિભાગે આજે ઉત્તર-પશ્ચિમ ભારતમાં ભારે વરસાદ અને તોફાનની ચેતવણી જારી કરી છે. પંજાબ, હરિયાણા, ચંદીગઢ અને દિલ્હીમાં અલગ અલગ સ્થળોએ ભારેથી અતિ ભારે વરસાદની સંભાવના છે. હવામાન વિભાગે રાજસ્થાન, પંજાબ, હરિયાણા, ઉત્તરાખંડ, હિમાચલ અને જમ્મુ અને કાશ્મીરમાં ભારે વરસાદને ધ્યાનમાં રાખીને ઓરેન્જ એલર્ટ જારી કર્યું છે. આ ચેતવણી પશ્ચિમી વિક્ષેપને કારણે છે જે 7 ઓક્ટોબર સુધી સક્રિય રહેશે. પંજાબ-હરિયાણામાં ભારે વરસાદની સંભાવના છે. બીજી તરફ હવામાન વિભાગે બિહાર સહિત પૂર્વી ભારતના રાજ્યોમાં વરસાદની ચેતવણી જારી કરી છે. દરમિયાન, અરબી સમુદ્રમાં ચક્રવાતી તોફાન 'શક્તિ' નબળુ પડવા લાગ્યું છે.

હવામાન વિભાગે ઓરેન્જ એલર્ટ જારી કર્યું

ઉત્તર-પશ્ચિમ ભારતમાં હાલમાં એક નવો પશ્ચિમી વિક્ષેપ સક્રિય થયો છે. તેના કારણે રવિવારે મધ્યરાત્રિએ દિલ્હી-એનસીઆરમાં ભારે વરસાદ પડ્યો હતો. હવામાન વિભાગે ઓરેન્જ એલર્ટ જારી કર્યું છે, જેમાં દિવસ દરમિયાન વધુ વરસાદની આગાહી કરવામાં આવી છે. ઘણા વિસ્તારોમાં પાણી ભરાઈ જવા અને વૃક્ષો પડી જવાના અહેવાલો પણ મળ્યા છે. હવામાન વિભાગે લોકોને બહાર નીકળતા પહેલા ટ્રાફિક અપડેટ વાંચવાની સલાહ આપી છે. દિલ્હી અને એનસીઆર સહિતના વિસ્તારોમાં આજે વરસાદની આગાહી છે.

હવામાન વિભાગના જણાવ્યા અનુસાર, જમ્મુ અને કાશ્મીર, હિમાચલ પ્રદેશ, ઉત્તરાખંડ, પંજાબ, હરિયાણા, ચંદીગઢ, દિલ્હી, પૂર્વી ઉત્તર પ્રદેશ અને રાજસ્થાનમાં અલગ અલગ સ્થળોએ ભારે વરસાદ પડી શકે છે. અરુણાચલ પ્રદેશ, આસામ, મેઘાલય, નાગાલેન્ડ, મણિપુર, મિઝોરમ, ત્રિપુરા, પશ્ચિમી ઉત્તર પ્રદેશ, રાજસ્થાન, સિક્કિમ, તમિલનાડુ, પુડુચેરી અને કરાઈકલ માટે પણ ભારે વરસાદની ચેતવણી જારી કરવામાં આવી છે. હવામાન વિભાગે જણાવ્યું હતું કે હરિયાણા, ચંદીગઢ, દિલ્હી, પંજાબ, રાજસ્થાન, ઉત્તરાખંડ અને પશ્ચિમી ઉત્તર પ્રદેશમાં 40-50 કિમી પ્રતિ કલાકની ઝડપે પવન સાથે વાવાઝોડાની શક્યતા છે.

રાજસ્થાનમાં ઓરેન્જ એલર્ટ જારી

રાજસ્થાનમાં ઓરેન્જ એલર્ટ જારી કરવામાં આવ્યું છે, જેમાં વીજળીના કડાકા અને ભારે પવન સાથે ભારે વરસાદની ચેતવણી આપવામાં આવી છે. હવામાન વિભાગે ચેતવણી આપી છે કે અલગ અલગ વિસ્તારોમાં 40-50 કિલોમીટર પ્રતિ કલાકની ઝડપે પવન ફૂંકાઈ શકે છે. આગામી 24 કલાક માટે ઓરેન્જ એલર્ટ જારી કરવામાં આવ્યું છે. 7 ઓક્ટોબરે પણ ભારે વરસાદની આગાહી છે.

દ.ગુજરાત, સૌરાષ્ટ્રમાં ભારે વરસાદની આગાહી

IMD આગાહી કરે છે કે ચક્રવાત 'શક્તિ' ધીમે ધીમે પશ્ચિમ-દક્ષિણપશ્ચિમ તરફ આગળ વધતું નબળું પડશે ત્યારબાદ, તે પશ્ચિમ-મધ્ય અને ઉત્તરપશ્ચિમ અરબી સમુદ્ર પર લગભગ પૂર્વ તરફ ફરી વળશે અને 7 ઓક્ટોબરના બપોર સુધીમાં વધુ નબળું પડીને ડિપ્રેશનમાં ફેરવાઈ જશે.

ગુજરાતમાં વાવાઝોડાની અસર 8-9 ઓક્ટોબરે જોવા મળશે અને દ.ગુજરાત, સૌરાષ્ટ્રમાં ભારે વરસાદની આગાહી કરવામાં આવી છે, જામનગર, પોરબંદર, દ્વારકા, સુરત, નવસારી, વલસાડમાં પણ ભારે વરસાદની આગાહી હવામાન વિભાગ દ્વારા કરવામાં આવી છે.

આ પણ વાંચોઃ ગીર સોમનાથ: 3 માળનું મકાન ધરાશાયી થતા 3ના મોત, બાઇકસવારને પણ કાળ ભરખી ગયો

સિઝનનો કુલ સરેરાશ વરસાદ 115 ટકા નોંધાયો

ગુજરાતમાં સિઝનનો કુલ સરેરાશ વરસાદ 115 ટકા નોંધાયો, સૌથી વધુ કચ્છમાં 140.23 ટકા સરેરાશ વરસાદ નોંધાયો છે. નર્મદા ડેમ 97.32 ટકા તેમજ અન્ય 206 જળાશયો કુલ સંગ્રહ ક્ષમતાના 95.10 ટકા જેટલા ભરાયા છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ