કરુણાંતિકા / ગીર સોમનાથ: 3 માળનું મકાન ધરાશાયી થતા 3ના મોત, બાઇકસવારને પણ કાળ ભરખી ગયો

વેરાવળ શહેરના ખારવાવાડમાં ત્રણ માળનું મકાન ધરાશાયી થતા ત્રણ લોકોના મોત નિપજ્યા હતા. જ્યારે બે લોકોને બચાવી લેવામાં આવ્યા હતા. વેરાવળ શહેરમાં મોડી રાત્રે બનેલી ઘટના બનતા લોકોમાં નાસભાગ મચી જવા પામી હતી.

બાઈક ચાલકનું દટાઈ જતા મોત

મકાન ધરાશાયી થયું તે સમયે લોકોની અવર જવર ચાલુ હતી. અચાનક બનેલી દુર્ઘટનાથી સમગ્ર વિસ્તારમાં લોકોમાં ભયનો માહોલ વ્યાપી જવા પામ્યો હતો. મકાન ધરાશાયી થયું તે સમયે એક બાઈક સવાર વ્યક્તિ મકાન નીચે ઉભો હતો. જેનું કાટમાળમાં દબાઈ જતા ઘટના સ્થળે મોત નિપજ્યું હતું.

બચાવ કામગીરી વહેલી સવાર સુધી ચાલી

મકાન ધરાશાયી થયાની જાણ ફાયર ફાઈટર, પોલીસ તેમજ નગરપાલિકા તેમજ ખારવા સમાજના આગેવાનો તેમજ યુવાનોની ટીમ તાત્કાલીક ઘટના સ્થળે પહોંચી ગઈ હતી. અને બચાવ કામગીરી શરૂ કરી હતી. જે બચાવ કામગીરી સવારે 4.30 વાગ્યા સુધી ચાલી હતી. તેમજ કાટમાળમાંથી ત્રણ મૃતદેહોને બહાર કાઢવામાં આવ્યા હતા. જ્યારે બે લોકોનો આબાદ બચાવ થવા પામ્યો હતો.

મૃતકો

• દિનેશ પ્રેમજી જુંગી (ઉંમર 34 વર્ષ)
• દેવકીબેન શંકરભાઈ સૂયાની (માતા)
• જશોદાબેન શંકરભાઈ સૂયાની (પુત્રી).

આ પણ વાંચોઃ હજુ વરસાદ ગયો નથી! આજેય IMDના 7 રાજ્યોમાં એલર્ટ, જાણો ગુજરાતનું હવામાન

મકાન અંદાજે 80 વર્ષ જુનું હતું

સ્થાનિકોના જણાવ્યા અનુસાર મકાન અંદાજે 80 વર્ષ જુનું હતું તેમજ છેલ્લા ઘણા સમયથી જર્જરિત હોવાનું સામે આવ્યું છે. આ દુર્ઘટનાના કારણે સમગ્ર ખારવા સમાજમાં શોકનું મોજું ફરી વળ્યું છે. તેમજ ફાયર વિભાગ, નગર પાલિકા અને સ્થાનિક સમાજના યુવાનોના સહયોગથી ચાર કલાકની કામગીરી બાદ મૃતદેહોને બહાર કાઢવામાં આવ્યા હતા.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ