ષડયંત્રનો પર્દાફાશ / દહેગામમાં કોરોના મૃત્યુ સહાયમાં કૌભાંડ: મેડિકલ ઓફિસરના જ ખોટા સિક્કા મારી દીધા, 30 વિરૂદ્ધ ફરિયાદ, 13ની ધરપકડ

• દહેગામમાં કૌભાંડનો પર્દાફાશ
• કોરોના મૃત્યુ સહાયમાં થયું કૌભાંડ 
• 30 સામે નોંધાઈ પોલીસ ફરિયાદ 

સરકારી સહાય મેળવવાનું કૌભાંડ: દહેગામમાં કોરોના મૃત્યુ સહાયમાં મોટું કૌભાંડ થયું હોવાનો પર્દાફાશ થતાં ખળભળાટ મચી ગયો છે. કોરોના મૃત્યુ સહાય કૌભાંડમાં 30 લોકો સામે ફરિયાદ નોંધાઈ છે. જે બાદ પોલીસ દ્વારા 13 લોકોની ધરપકડ કરવામાં આવી છે. કૌભાંડના તાર સાબરકાંઠા અને તલોદ સુધી જોડાયેલા છે. હાલ પોલીસ દ્વારા અન્ય આરોપીઓની શોધખોળ કરવામાં આવી રહી છે.

રાજ્ય સરકારે આપ્યો હતો તપાસનો આદેશ 
ગુજરાત સરકારે કોરોનાકાળમાં જે પરિવારના સ્વજનો મૃત્યુ પામ્યા હોય તેમના માટે રૂપિયા 50 હજારની સહાયની જાહેરાત કરી હતી. ત્યારે આ સહાય મેળવવા માટે જેમના કોરોનાને બદલે અન્ય બીમારીઓથી મૃત્યુ થયા હોય તેવા મૃતકોના પરિજનોએ પણ અરજી કરી હતી. જે બાદ રાજ્ય સરકારે તપાસનો આદેશ આપ્યો હતો. 

30 અરજદારોએ નકલી સર્ટિફેકટ કર્યા રજૂ
તપાસ દરમિયાન ગાંધીનગર જિલ્લાના દહેગામ તાલુકામાં સરકારી સહાય મેળવવાનું કૌભાંડ સામે આવતા હડકંપ મચી ગયો છે. દહેગામ તાલુકાના અલગ અલગ ગામોના 30 જેટલા અરજદારોએ 50 હજારની સહાય માટે મેડિકલ ઓફિસરના ખોટા સિક્કા અને સહીવાળા સર્ટિફિકેટ બનાવી રજૂ કર્યા હતા અને સરકાર તરફથી મળતી રૂ. 50 હજારની સહાય મેળવી લીધી હતી.  

મામલતદારે પ્રમાણપત્રોની કરાવી હતી ખરાઈ
જે બાદ દહેગામના મામલતદારને આ અંગેની જાણ થતાં તેમણે વારસદારો દ્વારા રજૂ કરવામાં આવેલા પ્રમાણપત્રોની ખરાઈ કરાવી હતી. જેમાં 30 જેટલા મૃતકોના વારસદારોએ ખોટા સહી સિક્કા વાળા પ્રમાણપત્રો રજૂ કરી સહાય મેળવી હોવાનું કૌભાંડ આચર્યું હોવાનું બહાર આવ્યું હતું. 

દહેગામ પોલીસ સ્ટેશનમાં નોંધાઈ હતી ફરિયાદ
નાયબ મામલતદાર કૌશલકુમાર ચૌધરીએ દહેગામ પોલીસ સ્ટેશનમાં ફરિયાદ નોંધાવી હતી. આ ફરિયાદના આધારે પોલીસે તપાસ કરતા મેડિકલ સર્ટિફિકેટ પ્રાથમિક આરોગ્ય કેન્દ્ર સાણોદાનું હોવાનું સામે આવ્યું હતું. જેથી ટીમ મેડીકલ ઓફિસર પાસે પહોંચી હતી. જે બાદ મેડિકલ ઓફિસર દ્વારા  મૃતકોના નામ સાથેની વિગતો તપાસ કરવામાં આવતાં આવા કોઈ સર્ટિફિકેટ ઈસ્યૂ કરવામાં આવ્યા ન હોવાનું સામે આવ્યું હતું. 

તમામને અપાશે નોટિસ 
જે બાદ હાલ 30 જેટલા અરજદાર સામે ફરિયાદ નોંધાવવામાં આવી છે. નકલી સર્ટિફેકટ બનાવી સહાય મેળવનારા વારસદારો સામે કાર્યવાહી કરવા તૈયારી તેજ કરી દેવામાં આવી છે. વારસદારોને સરકારી ધારાધોરણ મુજબ વ્યાજ સહિત રિકવરી માટે નોટિસ આપવામાં આવશે. સાથે જ આ ફોર્મની ફરીથી ચકાસણી પણ કરવામાં આવશે. 

સાબરકાંઠામાં પણ થયું હતું કૌભાંડ
મહત્વનું છે કે, 6 મહિના અગાઉ સાબરકાંઠા જિલ્લામાંથી પણ આવું જ કૌભાંડ સામે આવ્યું હતું. 6 મહિના પહેલા સાબરકાંઠાના તલોદ તાલુકામાંથી બહાર આવેલ કૌભાંડમાં દહેગામના વ્યક્તિની સંડોવણી સામે આવી હતી. ત્યારે આ શખ્સની આ કૌભાંડમાં પણ સંડોવણી હોવાનું સામે આવી શકે છે. હાલ પોલીસ દ્વારા આ મામલે તપાસ કરવામાં આવી રહી છે.