રાજકોટ / વધુ એક નકલી અધિકારીની ધરપકડ: કમરે એર ગન લગાવી પોલીસ ઓફિસર તરીકે જમાવતો રોફ

• નકલી પોલીસ ઓફિસર ઝડપાયો
• આરોપી પાસેથી નકલી ID કાર્ડ પણ મળ્યું
• બંદૂક પણ સાથે રાખીને ફરતો હતો આરોપી

રાજ્યમાં નકલી પોલીસકર્મીઓનો સીલસીલો વધતો જાય છે. પોલીસની વર્ધી પહેરીને લોકો પોતાની ધાક જમાવી રહ્યા છે, તો ક્યાંક અસલી પોલીસને બદનામ કરતા હપ્તા ઉધરાવી રહ્યા છે, જ્યારે રાજકોટમાંથી વધુ એક નકલી પોલીસ ઓફિસરને અસલી પોલીસે ઝડપી પાડ્યો છે. સાઈબર ક્રાઈમના 'અંડર કવર' ઓફિસરની છાપ ઉભી કરનાર આરોપીને પોલીસે  જેલહવાલે કર્યો છે. 

સાયબર ક્રાઈમે કરી 19 વર્ષીય યુવકની ધરપકડ
રાજકોટ સાયબર ક્રાઈમ પોલીસે શહેરના કાલાવડ રોડ પર આવેલ વામ્બ આવાસ ક્વાર્ટરમાં રહેતા 19 વર્ષીય સાહિત અનિલભાઈ મુલીયાણા નામના યુવકની ધરપકડ કરી છે. સાયબર ક્રાઈમે યુવકના ઘરેથી એર ગન, પોલીસનું નકલી આઈડી કાર્ડ પણ જપ્ત કર્યું છે. તપાસમાં સામે આવ્યું છે કે, યુવાનને અંડર કવર પોલીસ ઓફિસર બનવાનો અભરખો હતો. ડિપ્લોમા એન્જિનિયરિંગ બાદ સાયબર ક્રાઈમ ઓફિસર બનવું હતું. 

લોકોને આપતા હતો પોલીસ અધિકારીની ઓળખ
તેણે કોઈપણ પરીક્ષા આપ્યા વગર જ સાયબર ક્રાઈમના ફેઈક અંડર કવર ઓફિસરનો સ્વાંગ રચી લીધો હતો. તે લોકોને પોતે પોલીસ અધિકારી હોવાની ઓળખ આપતો હતો. ખોટી ઓળખ આપી કામની 'પતાવટ' કરતો હતો. એટલું જ નહીં તે કિરણ પટેલની જેમ જ નકલી અધિકારી તરીકે અનેક કોલેજોમાં સેમીનર પણ ભરી આવ્યો છે.  સાહિલે પોતાના રહેણાંક મકાન ઉપર પણ સાયબર ક્રાઇમ ગુજરાત પોલીસનું બોર્ડ લગાવ્યું હતું. આ ઉપરાંત તેણે નકલી આઈડી કાર્ડ પણ બનાવડાવ્યું હતું. 

યુવકને કર્યો જેલહવાલે
હાલ પોલીસે તેને જેલના હવાલે કરીને વધુ તપાસ હાથ ધરી છે.  આ ઉપરાંત પોલીસે આરોપીએ કોઈને નિશાન બનાવી પૈસા પડાવ્યા છે કે નહીં તે દિશામાં તપાસ હાથ ધરી છે.