હેલ્થ ન્યૂઝ / 'ઉંઘમાં ખલેલ અને નસકોરાં મગજની નસોને કરે છે ડેમેજ': AIIMSના રિસર્ચમાં આંખ ઉઘાડતો ખુલાસો

સ્વાસ્થ્ય માટે રાતની ઊંઘ ખૂબ જ જરૂરી છે. તેના મહત્વને નજરઅંદાજ કરવાની ભૂલ તમને ઘણી ગંભીર બીમારીઓનો શિકાર બનાવી શકે છે. હાલમાં AIIMSના ન્યુરોલોજી વિભાગ દ્વારા હાથ ધરવામાં આવેલા એક અભ્યાસમાં બહાર આવ્યું છે કે ઓબ્સટ્રક્ટિવ સ્લીપ એપનિયા (OSA) અને ઊંઘની નબળી ગુણવત્તાના લક્ષણો મગજ પર પ્રતિકૂળ અસર કરે છે. આ અભ્યાસમાં 6,795 વ્યક્તિઓના ડેટાનું વિશ્લેષણ કરવામાં આવ્યું હતું, જેમાં 50 વર્ષ અને તેથી વધુ વયની 49 ટકા મહિલાઓનો સમાવેશ થાય છે. જેમાં સામે આવ્યું છે કે OSA મગજના તે ભાગમાં કોષોને નબળા બનાવવાનું કામ કરે છે જ્યાં મેમરી સંગ્રહિત થાય છે અને માહિતીની પ્રક્રિયા થાય છે. તેની અસર 50-60 વર્ષની વયના લોકોમાં સમજણ શક્તિમાં ઘટાડો થવાના સ્વરૂપમાં નોંધવામાં આવી છે.

ઓબ્સટ્રક્ટિવ સ્લીપ એપનિયા શું છે?

જ્હોન્સ હોપકિન્સ મેડિસિન અનુસાર, જ્યારે ઊંઘ દરમિયાન તમને 10 સેકન્ડથી વધુ સમય માટે શ્વાસ લેવામાં અવરોધનો અનુભવ થાય છે ત્યારે ઓબ્સટ્રક્ટિવ સ્લીપ એપનિયા થાય છે. આ એક આનુવંશિક સમસ્યા છે. આ ઉપરાંત જે લોકો નાક બંધ થવું, થાઇરોઇડ વિકૃતિઓ, મેનોપોઝ, સ્થૂળતા, માથા અને ગરદનને ટેકો આપતા પેશીઓમાં ખામી, ડાઉન સિન્ડ્રોમ અને ધુમ્રપાન કરતા હોય તેવા લોકોમાં તેનું જોખમ વધારે છે.

ઓબ્સટ્રક્ટિવ સ્લીપ એપનિયાના લક્ષણો

કેટલાક લોકોને કોઈપણ લક્ષણો વિના ઓબ્સટ્રક્ટિવ સ્લીપ એપનિયા હોય છે. જ્યારે ઘણા લોકોમાં આ સમસ્યા નસકોરાં, સવારે માથાનો દુખાવો, દિવસ દરમિયાન વારંવાર ઉંઘ આવવી, સરળતાથી ચીડિયાપણું, હતાશા, વસ્તુઓ યાદ રાખવામાં મુશ્કેલી જેવા લક્ષણોના રૂપમાં જોવા મળે છે.

OSA ની અસર મગજ પર થઈ શકે છે
આ મામલે નિષ્ણાંતોએ જણાવ્યું હતું કે જે વ્યક્તિઓમાં ઊંઘની ગુણવત્તા નબળી હોય અથવા OSA ના કોઈ ચિહ્નો હોય તેઓને યાદશક્તિમાં ઘટાડો થઈ શકે છે. કોઈપણ પ્રતિકૂળ અસરો ટાળવા માટે તેની સારવાર કરાવવી જરૂરી છે. 

વધુ વાંચો : જમતા સમયે વાત કરતાં હોય તો થઈ જશો અરોફૈઝિયાના શિકાર, લક્ષણો દર્દ અને હવાવાળા

સારી ઊંઘ માટે આ વાતોનું ધ્યાન રાખો

સારી ઊંઘ મેળવવા માટેની ટિપ્સ આપતાં નિષ્ણાંતોએ કહ્યું કે વ્યક્તિએ દરરોજ એક જ સમયે સૂવું અને જાગવું જોઈએ. આ સાથે આલ્કોહોલ, કેફીન, નિકોટિન અને અન્ય ઉત્તેજક પદાર્થોનું સેવન ઓછું કરવું જોઈએ. ખાસ કરીને બપોરે 2 વાગ્યા પછી. સાંજ કે રાત્રે ધ્યાન કરો અથવા મનને આરામ આપનારી કસરતો કરો. સૂવાના ઓછામાં ઓછા 3 કલાક પહેલાં ખોરાક લો. ધ્યાન રાખો કે રાત્રિભોજન વધારે મસાલેદાર ન હોવું જોઈએ.

VTV Gujarati Newsની તમામ અપડેટ સૌથી પહેલા મેળ​વ​વા માટે અમારી WhatsApp ચેનલ ફોલો કરો