દારૂએ દાટ વાળ્યો / રાયબરેલીમાં ઝેરી દારૂ પી જવાથી નવ લોકોના થયા મોત, ડઝનેક લોકોની હાલત છે અતિ ગંભીર

UPમાં ચૂંટણીના માહોલની વચ્ચે ઝેરી દારૂએ તાંડવ મચાવ્યો છે. રાયબરેલીમાં મહારાજગંજ ક્ષેત્રના પહાડપુર ગામમાં દારૂ પિવાથી થોડા કલાકોમાં જ કેટલાય લોકોના મોત થઈ ગયા છે. મંગળવારે મોડી સાંજે શરૂ થયેલ આ મોતનો સિલસિલો બુધવાર બપોર સુધી ચાલુ રહ્યો હતો. બે ડઝન જેટલા લોકોની તબિયત ખરાબ થઈ ગઈ હતી. આ તમામને સીએચસીથી રેફર કરવામાં આવ્યા છે.

જિલ્લા અધિકારી વૈભવ શ્રીવાસ્તવ, અધિક પોલીસ અધિક્ષક વિશ્વજીત શ્રીવાસ્તવ સહિત પોલીસ તથા પ્રશાસનના ઉચ્ચ અધિકારીઓ ગામમાં પહોંચીને તપાસમાં લાગી ગયા છે. જિલ્લા પ્રશાસને આ બાબતે આબકારી ખાતાના એક સિપાહીને સસ્પેન્ડ કરી દીધો છે. આ ઉપરાંત જિલ્લા આબકારી અધિકારી રાજેશ્વર મૌર્યને નોટિસ જાહેર કરીને જવાબ માગવામાં આવ્યો છે.

એડીએમ પ્રશાસને બુધવારે જણાવ્યું હતું કે, પહાડપુર સ્થિત સરકારી દારૂની દુકાન પર ઝેરી દારૂ પી જવાથી અત્યાર સુધીમાં નવ લોકોના મોત થઈ ગયા છે. પોલીસના જણાવ્યા અનુસાર આ દુકાનનું લાયસન્સ ધીરેન્દ્ર સિંહના નામે છે. તેમણે જણાવ્યું કે, દુકાન પર મંગળવાર મોડી સાંજે દારૂ ખરીદીને પીધો હતો.

કુમારે જણાવ્યું કે, મોડી રાતે પોલીસને જાણ થઈ કે, બે વ્યક્તિઓ મહારાજગંજ સ્થિત પ્રાથમિક સ્વાસ્થ્ય કેન્દ્રમાં ભરતી કરવામાં આવ્યા છે. દારૂ પીધેલા લોકોમાં  અન્ય લોકોની હાલત બાદમાં બગડતાં તેમને હોસ્પિટલમાં ભરતી કરવામાં આવ્યા છે.

તેમણે જણાવ્યું હતું કે, અત્યાર સુધીમાં નવ લોકોના મોત થઈ ચુક્યા છે. અન્યની હાલત પણ ગંભીર હોવાનું જણાવ્યું છે . ઝેરી દારૂ પીવાથી મરનારા લોકોમાં પંકજ (28), સરોજ (40), રામસુમેર (40), ગજોધર (46), વંશિલાલ (50), સુખરાની (60) અને ચંદ્રપાલ (50) સહિત અન્ય બેની હાલત અત્યાર સુધીમાં ગંભીર હોવાની સત્તાવાર માહિતી મળી રહી છે. તેમને હોસ્પિટલમાં દાખલ કરવામાં આવ્યા છે. જ્યાં તેમની સારવાર ચાલી રહી છે. કુમારે જણાવ્યું છે કે, દારૂની દુકાનના માલિક હાલમાં ફરાર છે. તેમના વિરુદ્ધ ફરિયાદ દાખલ કરવામાં આવી છે. પોલીસ તેની શોધ કરી રહી છે.
 
અડધો ડઝન લોકોની હાલત ગંભીર

દારૂ પીનારા લોકોમાં અડધો ડઝન લોકોની હાલત ગંભીર બનેલી છે. તેમની સારવાર પ્રાથમિક સ્વાસ્થ્ય કેન્દ્ર તથા જિલ્લા હોસ્પિટલમાં ચાલી રહી છે. જિલ્લા અધિકારી જણાવ્યું છે કે, એક મહિલા સહિત કેટલાય લોકોના મોત થયા છે. તપાસ થઈ રહી છે. અમુક લોકોની હાલત ગંભીર છે. પોલીસ ઘટના સ્થળે પહોંચીને તપાસ કરી રહી છે.