બચાવ / સુરત રેલવે સ્ટેશન પર ચાલુ ટ્રેનમાં ચડવા જતાં મુસાફર પાટામાં પડ્યો, ટ્રેન શરીર પર ચાલી

સુરત શહેરના વ્યસ્ત રેલવે સ્ટેશન પર પ્લેટફોર્મ નં. 1 પર એક દિલધડક ઘટના સામે આવી છે. જેમાં એક મુસાફર ચાલતી ટ્રેનમાં ચડવાનો પ્રયાસ કરતાં અકસ્માતનો ભોગ બન્યો હતો. જો કે, સદભાગ્યે મુસાફરનો ચમત્કારિક રીતે બચાવ થયો છે.જેને જોઈને “રામ રાખે તેને કોણ ચાખે” કહેવત સાર્થક થઈ ગઈ.

માહિતી અનુસાર મુસાફર અજમેર સ્પેશિયલ ટ્રેનમાં ચડવાનો પ્રયાસ કરી રહ્યો હતો. ત્યારે તે અચાનક સંતુલન ગુમાવી બેઠો અને ટ્રેન અને પ્લેટફોર્મ વચ્ચે પટકાઈ ગયો. ઘટનાના કારણે પ્લેટફોર્મ પર હાજર લોકોમાં ભય અને ગભરાટ ફેલાઈ ગયો.

ટ્રેનને તાત્કાલિક રોકી દેવામાં આવી

મુસાફર લગભગ 20 સેકન્ડ સુધી ટ્રેન અને પ્લેટફોર્મ વચ્ચે ફસાયેલો રહ્યો હતો. આ દરમિયાન આસપાસના લોકોની સતર્કતાના કારણે તરત જ ચેઇન પુલિંગ કરવામાં આવ્યું. જેના કારણે ટ્રેનને તાત્કાલિક રોકી દેવામાં આવી.

ટ્રેન રોકાતા રેલવે પોલીસ સ્ટાફ ઘટના સ્થળે પહોંચ્યો

ટ્રેન રોકાતા જ રેલવે પોલીસ અને અન્ય સ્ટાફ તુરંત ઘટનાસ્થળે પહોંચી ગયા અને મુશ્કેલીમાં મુકાયેલા મુસાફરને સુરક્ષિત રીતે બહાર કાઢ્યો. સદભાગ્યે મુસાફરને ગંભીર ઈજા પહોંચી નથી અને સમયસર મદદ મળતા મોટી દુર્ઘટના ટળી ગઈ.

આ પણ વાંચોઃ સ્થાનિક સ્વરાજ્યની ચૂંટણીમાં કોને ટીકિટ મળશે? ભાજપે જાહેર કરી 'નીતિ'

આ ઘટનાએ ફરી એકવાર મુસાફરોને સાવચેત રહેવાની અને ચાલતી ટ્રેનમાં ચડવા કે ઉતરવા જેવી જોખમી હરકતો ટાળવાની ચેતવણી આપી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ