વિશ્વ / પાક ડેપ્યુટી PM ના સંબંધીની લંપટગીરી: વિદેશી મહિલા સાથે ગેંગરેપ બાદ માંગી 1 લાખ ડોલરની ખંડણી

પાકિસ્તાનના નાયબ વડાપ્રધાન અને વિદેશ મંત્રી ઇશાક ડારના નજીકના સંબંધી મોહમ્મદ રઝા ડાર અને તેના 3 સાથીઓ દ્વારા બે વિદેશી મહિલાઓનું અપહરણ કરી તેમની પર સામૂહિક દુષ્કર્મ (ગેંગરેપ) ગુજારવાના કેસમાં એક નવો અને ચોંકાવનારો વળાંક આવ્યો છે. આ ચકચારી મામલાની એક પીડિત મહિલાએ મેજિસ્ટ્રેટ સમક્ષ સનસનીખેજ ખુલાસો કરતા જણાવ્યું છે કે, પાકિસ્તાની વિદેશ મંત્રીના સંબંધી અને તેના સાથીઓએ તેમને કેદમાંથી મુક્ત કરવાના બદલામાં 1 લાખ અમેરિકન ડોલરની ભારેખમ ખંડણી વસૂલી હતી.

CRPC ની કલમ 164 હેઠળ મેજિસ્ટ્રેટ સમક્ષ નિવેદન

આ સમગ્ર વિગત ત્યારે પ્રકાશમાં આવી જ્યારે બંને વિદેશી પીડિતાઓ પૈકીની એક, એસ્ટ્રિડ ગેબ્રિએલા રોબિન્સન બ્રાચોએ CrPC ની કલમ 164 હેઠળ જ્યુડિશિયલ મેજિસ્ટ્રેટ સમક્ષ પોતાનું સત્તાવાર નિવેદન નોંધાવ્યું હતું. પોતાના નિવેદનમાં મહિલાએ ગંભીર આક્ષેપ કર્યો હતો કે અપહરણ અને સામૂહિક દુષ્કર્મના મુખ્ય આરોપી મોહમ્મદ રઝા ડારે તેમને છોડવા માટે 1 લાખ અમેરિકન ડોલરની માંગણી કરી હતી જે તેને ચૂકવવામાં આવી હતી.

સિંગાપોરથી લાહોર પહોંચતા જ હુમલો અને ક્રિપ્ટોકરન્સીની માંગ

પાકિસ્તાની મીડિયા ન્યૂઝના રિપોર્ટ અનુસાર, પીડિત મહિલા એસ્ટ્રિડે મેજિસ્ટ્રેટને જણાવ્યું કે તે પોતાની બહેનપણી સ્ટેફની એડ્રિયાના સાથે સિંગાપોરથી લાહોર પહોંચી હતી. લાહોર આવ્યાના ગણતરીના સમયમાં જ કેટલાક હથિયારધારી શખ્સોએ તેઓ જ્યાં રોકાયા હતા તે ઠેકાણા પર હુમલો કરી દીધો હતો. હુમલાખોરોએ તે બંને મહિલાઓને દોરડાથી બાંધીને એક રૂમમાં પૂરી દીધી હતી. મુખ્ય આરોપી રઝા ડાર સતત એસ્ટ્રિડ પાસે તેના કમ્પ્યુટર તેમજ ક્રિપ્ટોકરન્સી ફંડનો એક્સેસ અને પાસવર્ડ માંગી રહ્યો હતો. એસ્ટ્રિડે જ્યારે જણાવ્યું કે પૈસાવાળું કમ્પ્યુટર લીલા રંગની બેગમાં છે, ત્યારે ડારે તે મેળવી લીધું હતું.

1 લાખ ડોલર મળ્યા બાદ કાર અકસ્માત અને પીડિતાઓનો બચાવ

પીડિતાએ વધુમાં આક્ષેપ કર્યો હતો કે રઝા ડારે તેના જ મોબાઈલ ફોનનો ઉપયોગ કરીને તેના નજીકના સંબંધીઓને પૈસાની માંગણી કરતા અનેક મેસેજ મોકલ્યા હતા. શરૂઆતમાં કોઈ જવાબ ન મળ્યો, પરંતુ બાદમાં સ્ટેફનીની માતાએ જણાવ્યું કે તેમણે 1 લાખ અમેરિકન ડોલરની વ્યવસ્થા કરી લીધી છે. કેદના છેલ્લા દિવસે રઝા ડારે સ્વીકાર્યું કે તેને પૈસા મળી ગયા છે અને હવે બંને મહિલાઓ મુક્ત છે.

વધુ વાંચો: પંજાબ કોંગ્રેસમાં મોટી હલચલ, અમિત શાહને મળવા દિલ્હી પહોંચ્યા કોંગ્રેસી સાંસદ સુખજિંદર સિંહ રંધાવા

ત્યારબાદ જ્યારે બંને યુવતીઓને તેમના પાસપોર્ટ પરત આપીને એરપોર્ટ લઈ જવામાં આવી રહી હતી, ત્યારે રસ્તામાં તેમની કારનો અકસ્માત થયો હતો. આ અકસ્માતનો લાભ ઉઠાવીને એસ્ટ્રિડ અને સ્ટેફની ગાડીમાંથી ભાગી છૂટ્યા હતા અને રસ્તા પર મદદ માટે બૂમો પાડવા લાગ્યા હતા. ત્યાં હાજર એક ટ્રાફિક પોલીસ ઓફિસરે બંને વિદેશી મહિલાઓની સ્થિતિ જોઈને તેમને તાત્કાલિક બચાવી લીધા હતા અને સુરક્ષિત સ્થાને પહોંચાડ્યા હતા.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ