SHORT & SIMPLE / તલાટીની પરીક્ષા માટે અમદાવાદ આવવાના હોવ તો આ નંબર નોટ કરી લેજો, ખૂબ મદદ મળશે

• 7 મેના રોજ રાજ્યભરમાં યોજાશે તલાટીની પરીક્ષા
• તલાટીની પરીક્ષાને લઈને જિલ્લા વહીવટી તંત્ર સજ્જ
• અમદાવાદ જિલ્લા પંચાયતમાં હેલ્પલાઈન સેન્ટરની વ્યવસ્થા

7 મે ના રોજ રાજ્યભરમાં તલાટીની પરીક્ષા યોજાનાર છે. ત્યારે તલાટીની પરીક્ષાને લઈને જીલ્લા વહીવટી તંત્ર સજ્જ થઈ ગયું છે.  પરીક્ષાર્થીઓને મુશ્કેલી ન પડે તે માટે હેલ્પલાઈન સેન્ટર કાર્યરત કરવામાં આવ્યું છે. જેમાં અમદાવાદ જીલ્લા પંચાયત કચેરી ખાતે હેલ્પલાઈન સેન્ટરની વ્યવસ્થા શરૂ કરવામાં આવી છે.  આ હેલ્પલાઈનનાં માધ્યમથી પરીક્ષાર્થીઓ પરીક્ષા કેન્દ્રની જાણકારી મેળવી શકશે. સેન્ટરના રૂટ માટેની માહિતી પણ હેલ્પલાઈન થકી પરીક્ષાર્થી મેળવી શકશે. અમદાવાદમાં 1 લાખ 35 હજાર પરીક્ષાર્થીઓ પરીક્ષા આપશે.  અમદાવાદ આવતા પરીક્ષાર્થીઓ 079-25508141 નંબર પર સંપર્ક કરી શકશે. અમદાવાદમાં 465 સેન્ટર અને 4 હજાર 500 વર્ગખંડમાં પરીક્ષા લેવાશે.

'7.5 લાખ ઉમેદવાર પરીક્ષા આપે તેવી અમારી ધારણા'
થોડા દિવસ પહેલા હસમુખ પટેલે કહ્યું કે,  જિલ્લા કક્ષાના પોલીસ અધિકારીઓ તથા ST, રેલવેના અધિકારીઓ સાથે વધારાની બસ અને રેલવે મુકવા ચર્ચા કરાઈ છે. વધુમાં તેમણે કહ્યું કે, તલાટીની પરીક્ષા માટે 8.64 લાખ ઉમેદવારોએ ફોર્મ ભર્યા હતા. જેમાંથી 8.19 લાખ ઉમેદવારોએ કોલ લેટર ડાઉનલોડ કર્યા છે. જેથી 7.5 લાખ ઉમેદવાર પરીક્ષા આપે તેવી અમારી ધારણા છે. 

'ઉમેદવારોને જિલ્લા બહાર કેન્દ્રની ફાળવણી કરવામાં આવી છે'
તેમણે કહ્યું કે, પરીક્ષામાં થતી ગેરરીતિ અટકાવવા ઉમેદવારોને જિલ્લા બહાર કેન્દ્રની ફાળવણી કરવામાં આવી છે. જેથી તમામ ઉમેદવારોએ જિલ્લા બહાર પરીક્ષા આપવા જવું પડશે. આ તમામ ઉમેદવારોને રહેવા માટે છાત્રાલયો અને સમાજવાડીઓનો ઉપયોગ કરવામાં આવશે. ઉપરાંત અનેક સ્વૈચ્છિક સંસ્થાઓએ ગત પરીક્ષામાં ઉમેદવારોને મદદ કરી હતી. જેથી આ તમામ સ્વૈચ્છિક સંસ્થાઓ આ વખતે પણ ઉમેદવારને મદદ કરે તેવી અમારી આશા છે.