- ઓલ્ટ ન્યૂઝના સહ સંસ્થાપક મોહમ્મદ ઝૂબૈરને મોટી રાહત
- સુપ્રીમ કોર્ટે યુપી પોલીસને 20 જૂલાઈ સુધી કોઈ પણ એક્શન ન લેવાના આદેશ આપ્યા
- આ તારીખે થશે આગામી સુનાવણી
ઓલ્ટ ન્યૂઝના સહ સંસ્થાપક મોહમ્મદ ઝુબૈર વિરુદ્ધ 20 જૂલાઈ સુધી ઉત્તર પ્રદેશની પોલીસ એક્શન લઈ શકશે નહીં. સુપ્રીમ કોર્ટે કડક શબ્દોમાં ટિપ્પણી કરતા કહ્યું કે, ઝૂબૈરે તેના વિરુદ્ધ નોંધાયેલા તમામ પાંચ કેસોને રદ કરવાની માગ કરી છે. તેથી જ્યારે સુધી તેની અપીલ પર કોર્ટ કોઈ નિર્ણય ન લે ત્યાં સુધી યુપી પોલીસ તેના વિરુદ્ધ કોઈ એક્શન નહીં લઈ શકે.
UPના અલગ અલગ જિલ્લામાં નોંધાયેલી છે ફરિયાદ
ઝૂબૈર વિરુદ્ધ યુપી પોલીસે 6 કેસ નોંધ્યા છે. તેમાંથી એક લખીમપુર ખીરી જિલ્લામાં છે, તો બે હાથરસ જિલ્લામાં નોંધાયેલા છે. આ ઉપરાંત મુઝફ્ફરનગર અને ગાજિયાબાદમાં પણ વિવાદીત ટ્વિટ્સને લઈને કેસ નોંધાયેલા છે. જસ્ટિસ ડીવાઈ ચંદ્રચૂડ અને એએસ બોપન્નાની ડબલ બેન્ચે તમામ પક્ષોને નોટિસ મોકલીને આ મામલાને 20 જૂલાઈએ સુનાવણી નક્કી કરી છે. બેન્ચે કહ્યું કે, જ્યાં સુધી કોર્ટ ઝૂબૈરની અપીલ સાંભળી ન લે ત્યાં સુધી કોઈ એક્શન ન થાય. હાલમાં ઝૂબૈરને સીતાપુરમાં નોંધાયેલ કેસ સાથે દિલ્હીના કેસોમાં પણ જામીન મળી ચુક્યા છે.
ઝૂબૈરના વકીલે કોર્ટ માટે આ માગ મુકી
ઝૂબૈરના વકીલ વીરેન્દ્ર ગ્રોવરે કોર્ટમાં તાત્કાલિક સુનાવણીની અપીલ કરી હતી. તેમનું કહેવુ હતું કે, યુપી પોલીસ તેમના ક્લાઈન્ટ વિરુદ્ધ ખરાબ દ્રષ્ટિથી કામ કરી રહી છે. તેમને કારણ વગરના પ્રતાડિત કરવામા આવી રહ્યા છે. તેમની અપીલ હતી કે, કોર્ટ આજે જ સુનાવણી કરીને ઝૂબૈરની અરજી પર કોઈ ચુકાદો આપે.
20 જૂલાઈએ થશે આ કેસની સુનાવણી
જસ્ટિસ ડીવાઈ ચંદ્રચૂડ અને એએસ બોપન્નાની ડબલ બેન્ચે કહ્યું કે, અરજી આજે લિસ્ટ પર નથી તો સુનાવણી થઈ શકશે નહીં. બેન્ચે રજિસ્ટ્રીને આદેશ આપ્યો છે કે, 20 જૂલાઈએ અરજી સૂચીબદ્ધ કરવામાં આવે. કોર્ટ તે દિવસે સુનાવણી કરશે. કોર્ટે કહ્યું કે, તમામ કેસોની ભાષા લગભગ એક જેવી જ છે. અમે એક કેસમાં ઝૂબૈરને જામીન આપીએ છીએ તો બીજા કેસમાં તેને રિમાન્ડ પર લેવાની તૈયારી શરૂ થઈ જાય છે. એવું લાગે છે કે, આ એક કુચક્ર છે.
દિલ્હીની તિહાડ જેલમાં ટ્રાંસફર કરવા રજૂઆત
જો કે, ઝૂબૈરના વકીલ વીરેન્દ્ર ગ્રોવરે સીજેઆઈ એનવી રમન્નાની સામે પોતાની વ્યથા રજૂ કરી હતી. તેમનું કહેવુ હતું કે, તેમના ક્લાઈન્ટને હાથરસ કોર્ટમાં લઈ જવામા આવી રહ્યો છે, સીજેઆઈએ ગ્રોવરને જસ્ટિસ ચંદ્રચૂડની બેન્ચ સમક્ષ પોતાની અપીલ કરવા માટે કહ્યું. ગ્રોવરની માગ હતી કે, ઝૂબૈરને પાછો દિલ્હીની તિહાડ જેલમાં લાવવામાં આવે, યુપીમાં તેના જીવને ખતરો છે.
